హీరోహోండా లాభాల స్పీడ్

Published: Tuesday, April 20, 2010, 11:32 [IST]

న్యూఢిల్లీ: హీరోహోండా సంస్ధ 2009-10 ఆర్థిక సంవత్సరానికి 2,232 కోట్ల రూపాయల నికర లాభాన్ని నమోదు చేసుకుంది. గత ఏడాదితో పోల్చితే నికర లాభం 74 శాతం వృద్ధి చెందినట్లు కంపెనీ వెల్లడించింది. ఈ కాలంలో కంపెనీ మొత్తం టర్నోవర్ 28 శాతం వృద్ధితో 15,861 కోట్ల రూపాయలుగా ఉంది. రెండు రూపాయల ముఖ విలువ గల ప్రతీ షేరుపై 30 రూపాయల (1500 శాతం) తుది డివిడెండ్‌ను హీరో హోండా ప్రకటించింది.

హరిద్వార్ ప్లాంట్ ఉత్పత్తి సామర్థ్యాన్ని పెంచటానికి 130 కోట్ల రూపాయల పెట్టుబడితో పాటు మొత్తం మూలధన వ్యయంలో 350 కోట్ల రూపాయలను పెట్టుబడిగా పెట్టనున్నట్లు కంపెనీ సిఎఫ్ ఒ రవి సూద్ తెలిపారు. ఆగస్టు - సెప్టెంబర్ నాటికి కంపెనీ ఉత్పత్తి సామర్థ్యాన్ని ఏటా 5.7 మిలియన్ యూనిట్లకు విస్తరించనున్నట్లు పేర్కొన్నారు. కంపెనీ మార్చితో ముగిసిన త్రైమాసికానికి 4,122 కోట్ల రూపాయల మొత్తం టర్నోవర్‌పై 599 కోట్ల రూపాయల నికర లాభాన్ని ఆర్జించింది. గత ఏడాది ఇదే కాలంతో పోల్చితే కంపెనీ లాభం 49 శాతం పెరగటం విశేషం. కంపెనీకి చెందిన ప్రస్తుత మూడు ప్లాంట్లు 2010-11లో పూర్తి సామర్థ్యాన్ని చేరుకున్న తర్వాత నాలుగో ప్లాంట్‌ను గురించి యోచిస్తామని సూద్ తెలిపారు.

Article Published On: Tuesday, April 20, 2010, 11:32 [IST]

More from DriveSpark