పది వసంతాలు పూర్తి చేసుకున్న బజాజ్ పల్సర్..

భారత్‌లో బజాజ్ స్కూటర్లు ఎంత ప్రాచుర్యాన్ని సంపాధించుకున్నాయో, కంపెనీ అందిస్తున్న స్పోర్ట్స్ బైక్ పల్సర్ కూడా అంతే ప్రాచుర్యాన్ని దక్కించుకుంది. తొలుత కమ్యూంటిగ్ ప్రయోజనం కోసం తయారైన ఈ 150సీసీ బైక్ ఆ తర్వాతి కాలంలో క్రమేణా మార్పులు చెందుతూ, వచ్చి ప్రస్తుతం యువత మెచ్చిన భారతదేశపు నెంబర్ వన్ స్పోర్ట్స్ బైక్‌గా నిలిచింది.

ప్రస్తుతం భారత్‌లో అమ్ము ఏ జపనీస్ స్పోర్ట్స్ బైక్‌తో పోల్చుకున్నా దాని కన్నా ఐదు రెట్లు ఎక్కువగా బజాజ్ పల్సర్ బైక్‌లు అమ్మడువుతున్నాయంటే, మనవారు ఈ బైక్‌ను ఎంతగా ఆదరిస్తున్నారో ఇట్టే అర్థమైపోతుంది. 2001లో విడుదలై మార్కెట్లో ఓ సంచలనాన్ని సృష్టించిన బజాజ్ పల్సర్ ప్రస్తుతం పది విజయవంతమైన సంవత్సరాలను పూర్తి చేసుకుంది.

ఇది ఎప్పటికప్పుడు నూతనతను సంతరించుకుంటూ, లుక్, డిజైన్, పవర్, పెర్ఫామెన్స్, మెయింటినెన్స్ వంటి విషయాల్లో తనకంటూ ఓ ప్రత్యేక గుర్తింపును సంతరించుకుంది. తొలుత 150సీసీ, 180సీసీ ఇంజన్ ఆప్షన్‌తో పల్సర్ బ్రాండ్ మోటార్‌సైకిళ్లను బజాజ్ ప్రవేశపెట్టింది. అనంతరం, డిటిఎస్ఐ ఇంజన్, అల్లాయ్ వీల్స్, డిస్క్ బ్రేక్స్, ఇలా ఎప్పటికప్పుడు అభివృద్ధి చెందుతున్న సాంకేతిక పరిజ్ఞానాన్ని ఉపయోగించుకుంటూ నేడు ఈ సెగ్మెంట్లో నెంబర్ వన్‌గా ఉంది.

సరే ఇదంతా అటుంచితే, బజాజ్ పల్సర్ బ్రాండ్‌లో త్వరలోనే మరో సంచలనానికి తెరలేపనుంది. గతంలో బజాజ్ ఆటో మేనేజింగ్ డైరెక్టర్ రాజీవ్ బజాజ్ వ్యాఖ్యానించిన దాని ప్రకారం, ప్రపంచంలోనే ఇప్పటి వరకూ ఏ ద్విచక్ర వాహన కంపెనీ పరిచయం చేయని సరికొత్త సాంకేతిక పరిజ్ఞానాన్ని తమ కొత్త బజాజ్ పల్సర్‌లో ప్రవేశపెట్టనున్నామని ప్రకటించారు. ప్రస్తుతం బైక్ లవర్స్ దృష్టంతా కొత్త పల్సర్‌పైనే ఉంది. ఏదైతేనేం విజయవంతమైన పల్సర్ పదేళ్ల సుధీర్ఘ ప్రయాణానికి మనమూ అభినందనలు తెలియజేద్దాం.