హీరో హోండా కొత్త బ్రాండ్ నేమ్, లోగోల డిజైన్

ప్రస్తుతం హీరో గ్రూప్ తమ కొత్త ఉత్పత్తులకు బ్రాండ్ నేమ్, లోగోను డిజైన్ చేసే కాంట్రాక్టును లండన్‌కు చెందిన ఓమ్నికాన్ గ్రూప్‌లో భాగమైన "వోల్ఫ్ ఓలిన్స్"కు అప్పగించింది. అంతర్జాతీయ స్థాయిలో వినూత్నతకు మారుపేరుగా నిలిచిన వోల్ఫ్ ఓలిన్స్ సంస్థ కొత్త బ్రాండ్‌ ఐడెంటిటీ (బ్రాండ్ ఆర్కిటెక్చర్, బ్రాండ్ నేమ్, బ్రాండ్ లోగో, బ్రాండ్ పొజిషనింగ్)ని అందరూ మెచ్చే రీతిలో తీర్చిదిద్దగలదని భావిస్తున్నట్టు హీరో హోండా మోటార్స్‌ లిమిటెడ్‌ మేనేజింగ్ డైరెక్టర్ పవన్‌ ముంజాల్‌ పేర్కొన్నారు. భారతీయత ఉట్టిపడేలా ఈ బ్రాండ్ ఇమేజ్ ఉంటుందని ఆయన చెప్పారు. కాగా.. ప్రపంచ వ్యాప్తంగా పేరుగాంచి ఈ భారతదేశ కంపెనీతో కలిసి పనిచేయడం తమకు ఎంతో సంతోషాన్ని కలిగిస్తోందని వోల్ఫో ఓలిన్స్ మేనేజింగ్ డైరెక్టర్ చార్లెస్‌ రైట్‌ తెలిపారు.