హీరో-హోండాల పోటీ: మూడో ప్లాంటు ఏర్పాటుకు హోండా రెడీ

Published: Thursday, May 26, 2011, 14:45 [IST]

హీరో హోండా జాయింట్ వెంచర్ నుంచి విడిపోయిన తర్వాత జపాన్ ఆటో దిగ్గజం హోండా మోటార్ కంపెనీ భారత్‌లో మూడో ప్లాంటును ఏర్పాటు చేయనున్నట్లు ప్రకటించింది. పెరుగుతున్న డిమాండును అందుకోవడంతో పాటు తమ వాహనాల డెలివరీకి వెయింటింగ్ పీరియడ్‌ను తగ్గించి, హీరో గ్రూపుకు గట్టి పోటీ ఇచ్చేందుకు కంపెనీ ప్రణాళికలు రూపొందిస్తుంది. ఇందులో భాగంగానే 2013 సంవత్సరం మధ్యభాగం నాటికి టూ-వీలర్ ఉత్పత్తి సామర్థ్యాన్ని దాదాపు రెండింతలకు పెంచుకోనున్నట్ల కంపెనీ పేర్కొంది. కర్ణాటక రాష్ట్రంలోని నర్సాపురం వద్ద సాలీనా 12 లక్షల యూనిట్లను ఉత్పత్తి చేసే సామర్థ్యం కలిగిన మూడో ప్లాంటును ఏర్పాటు చేయనున్నట్లు హోండా మోటార్ కంపెనీ ఓ ప్రకటనలో పేర్కొంది.

అయితే మూడో ప్లాంటుకు సంబంధించి కేటాయిచిన పెట్టుబడి వివరాల గురించి మాత్రం హోండా వెల్లడించలేదు. అలాగే రాజస్థాన్ రాష్ట్రంలోని తపుకరా వద్ద హోండా నిర్మిస్తున్న రెండో ప్లాంటు ఉత్పత్తి సామర్థ్యాన్ని కూడా ఈ ఆర్థిక సంవత్సరం చివరినాటికి రెండింతలకు పెంచనున్నట్లు కంపెనీ తెలిపింది. ప్రస్తుతం తపుకరా ప్లాంటు కోసం జపాన్‌కు చెందిన హోండా మోటార్ కార్పోరేషన్ పూర్తి భారతీయ అనుబంధ సంస్థ అయిన 'హోండా మోటార్‌సైకిల్ & స్కూటర్స్ ఇండియా' (హెచ్ఎమ్ఎస్ఐ) రూ. 500 కోట్లను వెచ్చింది. ఈ ప్లాంటు జూన్ 1న ప్రారంభం కానుంది. తపుకరా ప్లాంటు ప్రారంభ ఉత్పత్తి సామర్థ్యం 6 లక్షల యూనిట్లు. మరోవైపు హీరో హోండా బ్రాండ్‌ విషయంలో ముంజాల్ ప్రమోట్ చేసిన హీరో గ్రూపు ముమ్మరంగా ప్రయత్నిస్తున్న సంగతి తెలిసిందే.

చైనా తర్వాత ప్రపంచంలోనే వేగంగా ఎదుగుతున్న రెండో అతిపెద్ద ఆటోమొబైల్ మార్కెట్ అయిన భారత మార్కెట్లో ఈ రెండు కంపెనీలు ఎవరికి వారు అగ్రగామిగా నిలవాలని పోటాపోటీగా అభివృద్ధి ప్రణాళికలకు వ్యూహరచనలు చేస్తున్నాయి. ఇందులో భాగంగానే భారత రోడ్ల కోసం ప్రస్తుతం ఉన్న హీరో హోండా స్ప్లెండర్, ప్యాషన్‌లకు పోటీ ఇచ్చేందుకు హోండా కంపెనీ ఓ 100సీసీ బైక్‌ను కూడా అభివృద్ధి చేస్తుంది. మరి కొద్ది సంవత్సరాల్లోనే మార్కెట్ లీడర్ ఎవరనే విషయం తేలనుంది. కాగా.. ప్రస్తుతం హోండా కంపెనీ భారత మార్కెట్లో డియో, ఆక్టివా, ఏవియేటర్ స్కూటర్లతో పాటుగా ట్విస్టర్, షైన్, స్టన్నర్, యునికార్న్, యునికార్న్ డాజ్లర్ మోటార్‌సైకిళ్లను మరియ స్పోర్ట్స్ బైక్ సిబిఆర్ 250ఆర్‌తో సహా మరో మూడు క్రూయిజ్ బైక్‌లను అందిస్తోంది.

Article Published On: Thursday, May 26, 2011, 14:45 [IST]

English summary

Japanese auto giant Honda said it will set up a third two-wheeler manufacturing facility in India at Narsapuram, in Karnataka, with an installed annual capacity of 12 lakh units by 2013.

More from DriveSpark