భారత్‌లోకి టామ్ టామ్ కార్ నావిగేషన్ ఉత్పత్తులు

Published: Wednesday, September 28, 2011, 12:12 [IST]

నెథర్లాండ్స్‌కు చెందిన ఆటోమొబైల్ నావిగేషన్ సిస్టమ్‌ల తయారీ సంస్థ టామ్ టామ్ భారత్‌లో తమ వ్యాపారాన్ని విస్తరించనున్నట్లు ప్రకటించింది. దేశంలో కార్లు కొనుగోలు చేసేవారి కోసం తమ ఉత్పత్తులను విడుదల చేస్తున్నామని కంపెనీ తెలిపింది. గడచిన పదేళ్లుగా భారత్‌లో మ్యాప్‌లను అభివృద్ధి చేస్తున్న టామ్ టామ్ పూణేలో తమ హెడ్‌క్వార్టర్‌ను ఏర్పాటు చేసి, ఈ ఏడాది చివరి నాటికి సిబ్బంధిని 400కు పెంచనున్నట్లు తెలిపింది.

భారతదేశం అద్భుతంగా వృద్ధి చెందుతోందని, ప్రస్తుతం తాము విడుదల చేసిన కొత్త నావిగేషన్ సిస్టమ్‌లు ప్రత్యేకించి భారత మార్కెట్ కోసం డిజైన్ చేశామని టామా టామ్ ఇండియా మేనేజింగ్ డైరెక్టర్ జోక్లిన్ విగ్రుక్స్ తెలిపారు. వయా 100, వయా 120 మరియు వయా 1125 అనే మూడు కొత్త ఉత్పత్తులను టామ్ టామ్ విడుదల చేసింది. వచ్చే నెల నుండి ఇవి మార్కెట్లో లభ్యం కానున్నాయి. వీటి ధరలు రూ.15,000 నుండి ప్రారంభమవుతాయని కంపెనీ తెలిపింది.