నవంబర్‌లో కొనసాగిన ద్విచక్ర వాహన కంపెనీల జోరు

హోండా నవంబర్ అమ్మకాలు రెట్టింపు:
దేశీయ ద్విచక్ర వాహన మార్కెట్లో నాల్గవ స్థానంలో ఉన్న జపాన్ ఆటో దిగ్గజం హోండా, నవంబర్ అమ్మకాలలో రెట్టింపు వృద్ధిని సాధించింది. గడచిన నెలలో కంపెనీ అమ్మకాలు 53.64 శాతం వృద్ధిని సాధించి 1,99,154 యూనిట్లను విక్రయించింది. గడచిన సంవత్సరం ఇదే సమయానికి కంపెనీ అమ్మకాలు 1,29,627 యూనిట్లుగా ఉన్నట్లు కంపెనీ ఓ ప్రకటనలో పేర్కొంది. మోటార్‌సైకిల్ అమ్మకాలు 32.82 శాతం వృద్ధిని సాధించి 60,025 యూనిట్ల నుండి 79,724 యూనిట్లకు పెరగగా, స్కూటర్ల అమ్మకాలు 71.59 శాతం వృద్ధిని సాధించి 69,601 యూనిట్ల నుండి 1,19,430 యూనిట్లకు పెరిగాయి.

యమహాను ముందుకు నడిపిన ఎ‌స్‌జెడ్, ఎఫ్‌జెడ్:
ఇకపోతే జపాన్‌కు చెందిన ప్రముఖ ద్విచక్ర వాహన తయారీ సంస్థ ఇండియా యమహా మోటార్ ప్రై లి నంబర్ నెల అమ్మకాలు 29 శాతం వృద్ధిని సాధించి 39,162 యూనిట్లను విక్రయించింది. గడచిన సంవత్సరం ఇదే కాలంలో అమ్మకాలు 30,130 యూనిట్లుగా ఉన్నట్లు కంపెనీ ఓ ప్రకటనలో పేర్కొంది. ఈ ఏడాది వరుసగా పెరుగుతున్న అమ్మకాల వృద్ధి పట్ల తాము చాలా సంతోషంగా ఉన్నామని, తమ కంపెనీ అమ్మకాలు పెరగడానికి కొత్తగా ప్రవేశపెట్టిన వైజెడ్ఎఫ్-ఆర్15 వెర్షన్ 2.0, ఎఫ్‌జెడ్, ఎస్‌జెడ్ మోడళ్లు ఎంతగానో సహకరించాయని కంపెనీ డైరెక్టర్ (సేల్స్ అండ్ మార్కెటింగ్) జున్ నకటా తెలిపారు.