జూన్ నెలలో 30 శాతం పెరిగిన యమహా మోటార్స్ విక్రయాలు

జపాన్‌కు చెందిన ప్రముఖ ద్విచక్ర వాహన తయారీ సంస్థ ఇండియా యమహా మోటార్స్ జూన్ నెల విక్రయాలలో ప్రోత్సాహకర వృద్ధిని నమోదు చేసుకుంది. గడచిన నెలలో కంపెనీ విక్రయాలలో 29.98 శాతం వృద్ధిని సాధించి 36,595 యూనిట్లను విక్రయించింది. గతేడాది ఇదే సమయంలో యమహా విక్రయాలు 28,155 యూనిట్లుగా ఉన్నాయి. కాగా.. దేశీయ మార్కెట్లో యమహా ద్విచక్ర వాహన విక్రయాలు గతేడాది ఇదే కాలంతో పోలిస్తే.. 28.86 శాతం వృద్ధి చెంది 21,157 యూనిట్ల నుంచి 27,263 యూనిట్లకు పెరిగాయి.

ఇదే సమయంలో కంపెనీ ఎగుమతులు కూడా 33.35 శాతం వృద్ధిని సాధించి 6,998 యూనిట్ల నుంచి 9,332 యూనిట్లకు పెరిగాయి. ఈ సందర్భంగా ఇండియా యమహా మోటార్ డైరెక్టర్ (సేల్స్ అండ్ మార్కెటింగ్) జున్ నకటా ప్రస్తుత సంవత్సరంలో స్థిరమైన విక్రయాల వృద్ధిని చూసి సంతోషంగా ఉన్నామని కొత్తగా విడుదల చేసిన ఎఫ్‌జెడ్ సిరీస్ బైక్‌ల వల్ల ఇటు దేశీయ అటు విదేశీయ మార్కెట్లలో విక్రయాలు జోరందుకున్నాయని తెలిపారు. ప్రస్తుతం కంపెనీ టైర్-2, టైర్-3 నగరాలకు చేరుకునేందుకు సేల్స్ మరియు సర్వీస్ నెట్‌వర్క్‌లను విస్తరిస్తున్నట్లు తెలిపారు.