భారత్‌లో 2012 నాటికి స్కూటర్లను ప్రవేశపెట్టనున్న యమహా

భారత మార్కెట్లో పేరుగాంచిన జపాన్ ద్విచక్ర వాహన తయారీ సంస్థ 'ఇండియా యమహా మోటార్' కంపెనీ 2012 నాటికి దేశీయ మార్కెట్లో తమ ప్రారంభ స్థాయి (ఎంట్రీ లెవల్) స్కూటర్లను విడుదల చేయనున్నట్లు ప్రకటించింది. "ప్రస్తుతం యూరప్, అమెరికా వంటి దేశాల్లో అధిక సంఖ్యలో స్కూటర్లు ఉన్నాయి. భారత మార్కెట్‌ను అధ్యయనం చేస్తున్నాం. త్వరలోనే ఇక్కడ ఎంట్రీ లెవల్ స్కూటర్లను విడుదల చేస్తాం" అని యమహా మోటార్ ఇండియా డైరెక్టర్ మరియు ఛీఫ్ సేల్స్ ఆఫీసర్ జున్ కటా వెల్లడించారు.

కంపెనీకు చెందిన మరో అధికారి మాట్లాడుతూ... 2012 నాటికి ఈ స్కూటర్ల విడుదలను అంచనా వేయవచ్చునని చెప్పారు. సూరజ్‌పూర్ మరియు ఫరీదాబాద్‌ వద్ద యమాహా ఉత్పత్తి కేంద్రాలలో ఈ స్కూటర్లను తయారుచేసే అవకాశం ఉంది. 2012 నాటికి కంపెనీ స్కూటర్ల సామర్థ్యాన్ని 10 లక్షలకు పెంచుకునేందుకు గానూ కంపెనీ 10 మిలియన్ డాలర్ల పెట్టుబడులను వెచ్చించిందని ఇండియా యమహా సీఈఓ మరియు ఎండి హిరోయుకి సుజుకి వెల్లడించారు. దీంతో కంపెనీ మొత్తం ద్విచక్ర వాహన ఉత్పత్తి సామర్థ్యం సాలీనా ఆరు లక్షల యూనిట్లను తాకనుంది. ప్రస్తుతం కంపెనీ ఉత్పత్తి ఏటా ఐదు లక్షల యూనిట్లు.