ఇండియన్ డ్రైవర్ల కోసం ప్రత్యేక హారన్ల తయారీ: ఆడి

Gallery

అవసరం లేకపోయినా చెవులు చిల్లులు పడేలా పోమ్.. పోమ్.. అంటూ హారన్‌ను మ్రోగించటం మనకే చెల్లుతుందని చెప్పవచ్చు. విదేశీ రోడ్లపై అక్కడి డ్రైవర్లు హారన్ తక్కువగా మ్రోగిస్తారు. అందుకే వారి కోసం ప్రత్యేకంగా హారన్లను తయారు చేస్తారు. విదేశీ కార్లలో ఉపయోగించే హారన్లను మనదేశపు కార్లలో ఉపయోగిస్తే, మనం నొక్కే నొక్కుడుకి అవి కొద్ది రోజులకే పాడైపోతాయి.

ఈ విషయం గురించి ఆడి ఇండియా హెడ్ మైఖేల్ ప్రెస్కీ ప్రస్తావిస్తూ.. ఇండియా కోసం ప్రత్యేకమైన హారన్ల అవసరం ఉంది. ఉదాహరణకు యూరప్‌లో ఉపయోగించే హారన్లను ఇండియాలో ఉపయోగిస్తే అవి కేవలం ఒకటి రెండు వారాల్లోనే చెడిపోతాయి. ముంబైలో ఒక్కరోజు మ్రోగించే హారన్ శబ్ధం, జర్మనీలో సంవత్సరం పాటు మ్రోగించే హారన్ శబ్ధంతో సమానమని ఆయన వివరించారు.

అందుకే ఇండియన్ మార్కెట్ కోసం మరింత శక్తివంతమైన, సమర్థవంతమైన హారన్లను అభివృద్ధి చేస్తున్నామని, ఈ హారన్‌ను రెండు వారాల పాటు నిరంతరం మ్రోగిస్తూ విభిన్న పద్ధతుల్లో పరీక్షించామని ఆయన తెలిపారు. ఇవి తమ కార్లు మరింత భద్రతను కల్పిస్తాయని ఆయన ధీమా వ్యక్తం చేశారు.