హీరో బైక్‌ల ధరల పెంపు, త్వరలోనే కొత్త మోడళ్ల విడుదల

Published: Thursday, May 3, 2012, 10:07 [IST]

భారత అగ్రగామి ద్విచక్ర వాహన తయారీ కంపెనీ హీరో మోటోకార్ప్ (గతంలో హీరో హోండా) దేశీయ విపణిలో అందిస్తున్న ఉత్పత్తుల ధరలు మరింత ప్రియం అయ్యాయి. ఈ మేరకు అన్ని ఉత్పత్తి మోడల్‌ను బట్టి ధరలను రూ.500 నుండి రూ.1,000 మేర పెంచుతున్నామని కంపెనీ పేర్కొంది. అయితే, ఏయే మోడల్‌పై ఎంత మేర ధర పెంచుతున్నామనే విషయాన్ని మాత్రం కంపెనీ స్పష్టం చేయలేదు. ముడి సరుకుల ధరలతో పాటు ఉత్పాదక వ్యయం కూడా పెరిగిపోతున్న నేపథ్యంలో, తప్పనిసరై ఉత్పత్తుల ధరలను పెంచాల్సిన వచ్చిందని, పెరిగిన ధరలు బుధవారం నుంచే అమల్లోకి వస్తాయని కంపెనీ పేర్కొంది.

కాగా.. గడచిన ఆర్థిక సంవత్సరం (2011-12) మార్చి 31, 2012తో ముగిసిన నాల్గవ త్రైమాసికంలో కంపనీ ప్రోత్సాహకర ఆర్థిక ఫలితాలు ప్రకటించింది. క్యూ4లో హీరో మోటోకార్ప్ నికర లాభం 20.33 శాతం వృద్ధిని సాధించి రూ.603.59 కోట్లు నమోదయ్యింది. అమ్మకాలు జోరుగా సాగటమే ఇందుకు ప్రధానకారణం. ఇదివరకటి ఆర్థిక సంవత్సరం (2010-11)లో మార్చి 31, 2011తో ముగిసిన నాల్గవ త్రైమాసికంలో కంపెనీ నికర లాభం రూ.501.61 కోట్లుగా ఉంది.

ఇకపోతే, ఇదే కాలానికి కంపెనీ మొత్తం ఆదాయం రూ.5,471.30 కోట్ల నుంచి రూ.6,139.90 కోట్లకు పెరిగాయి. క్యూ4లో హీరో మోటోకార్ప్ మొత్తం 15,72,027 యూనిట్ల ద్విచక్ర వాహనాలను విక్రయించగా, మొత్తం 2011-12 ఆర్థిక సంవత్సరానికి గాను 62,35,205 యూనిట్ల ద్విచక్ర వాహనాలను విక్రయించింది. పూర్తి సంవత్సరంలో 15.41 శాతం అమ్మకాల వృద్ధిని నమోదు చేశామని, మొత్తం టర్నోవర్‌ 21.55 శాతం పెరిగి 23,579 కోట్ల రూపాయలకు, నికర లాభం 2,378 కోట్లకు చేరిందని హీరోమోటోకాప్‌ చైర్మన్‌ బ్రిజ్‌మోహన్‌లాల్‌

జపాన్ భాగస్వామి హోండా నుండి విడిపోయిన తర్వాత తామేమీ ఒంటరి ప్రయాణం చేయటం లేదని, భారతీయులంతా తమ వెంట ఉన్నారని ఆయన అన్నారు. రానున్న రోజుల్లో మరిన్ని ఆకర్షనీయమైన ఉత్పత్తులను తీసుకువచ్చేందుకు ప్రణాళికలు రూపొందిస్తున్నామని, గడచిన జనవరిలో జరగిన 2012 ఢిల్లీ ఆటో ఎక్స్‌పోలో ప్రదర్శించిన హైబ్రిడ్‌ స్కూటర్‌ 'లీప్‌', 100 సిసి ప్యాషన్‌ ఎక్స్‌ప్రో, 125 సిసి బైక్‌ ఇగ్నిటార్‌లను త్వరలో మార్కెట్లోకి విడుదల చేస్తామని, డీలర్ నెట్‌వర్క్ విస్తరణలో భాగంగా దేశవ్యాప్తంగా మరో 400 టచ్‌ పాయింట్లను ఏర్పాటు చేయనున్నామని సంస్థ ఎండి పవన్‌ ముంజాల్‌ తెలిపారు.

Article Published On: Thursday, May 3, 2012, 10:07 [IST]

English summary

After declaring sales growth of 7% for the month of April, Hero Motocorp has announced price hike of Rs 500 to Rs 1,000 on most of its vehicles. Rising input costs have been stated by the company as the reason for the price hike. Meanwhile, the company also plans to increase capacity at three of its plants.

More from DriveSpark