అంతర్జాతీయ మార్కెట్లపై బజాజ్ ఆటో భారీ అంచనాలు

దేశపు ద్వితీయ అగ్రగామి ద్విచక్ర వాహన తయారీ కంపెనీ బజాజ్ ఆటో దేశీయ మార్కెట్ కన్నా అంతర్జాతీయ మార్కెట్‌కే ఎక్కువ ప్రధాన్యత ఇస్తోంది. రానున్న మూడేళ్లలో ఎగుమతుల ద్వారా 50 శాతం అమ్మకపు ఆదాయం నమోదు చేయాలనే లక్ష్యంతో విస్తరణ, అభివృద్ధి ప్రణాళికలకు రూపకల్పన చేశామని కంపెనీ ఓ ప్రకటనలో పేర్కొంది.

ప్రస్తుతం బజాజ్ ఆటో ఉత్పత్తి చేస్తున్న మోటార్‌‌సైకిళ్లలో 35 శాతం అంతర్జాతీయ మార్కెట్లకు ఎగుమతి అవుతున్నాయి. 2011-12 వార్షిక నివేదిక ప్రకారం బజాజ్ ఆటో లిమిటెడ్ ఎగుమతులు 31 శాతం వృద్ధిని సాధించాయి. ఈ సమయంలో కంపెనీ మొత్తం 15.8 లక్షల వాహనాలు ఎగుమతి చేసింది. ఈ ఎగుమతుల ద్వారా కంపెనీ ఆదాయం 35 శాతం వృద్ధిని సాధించి రూ.6,604 కోట్లుగా నమోదైంది. బజాజ్ ఆటో విదేశాలకు ఎగుమతి చేస్తున్న మోడళ్లలో బజాజ్ పల్సర్‌ 135 మోటార్‌సైకిల్‌కు అత్యంత క్రేజ్ ఉంది.