100సీసీ బాక్సర్‌ను విడుదల చేసేందుకు బజాజ్ సన్నాహాలు

వాస్తవానికి గ్రామీణ రోడ్లకు శక్తివంతమైన మోటార్‌సైకిళ్లు అవసరమైనప్పటికీ, మైలేజ్ విషయంలో బాక్సర్ 150 పెద్దగా కొనుగోలుదారులను ఆకట్టుకోలేకపోయింది. ఈ రోడ్లకు పవర్‌తో పాటుగా మైలేజ్‌ని కూడా ఇచ్చే మోటార్‌సైకిళ్లు అవసరం. గతంలో బజాజ్ బాక్సర్ రూరల్ మార్కెట్లో మంచి క్రేజ్ ఉండేది. ఇప్పటికీ సెకండ్ బైక్ మార్కెట్లో పాత బాక్సర్ బైక్‌లకు ఓ ప్రత్యేకమైన డిమాండ్ ఉంది. ఈ నేపథ్యంలో 100సీసీ ఇంజన్ సామర్థ్యం కలిగిన బాక్సర్‌ను ప్రవేశపెట్టాలని కంపెనీ కసరత్తులు చేస్తుంది.

ఇప్పటికే, బజాజ్ వద్ద ఉన్న 100సీసీ ఇంజన్లను (బహుశా బజాజ్ డిస్కవర్ 100సీసీలో ఉపయోగిస్తున్నవి కావచ్చు) ఉపయోగించుకొని కొత్త బాక్సర్‌ను డిజైన్ చేస్తున్నట్లు తెలుస్తుంది. ప్రస్తుతం బజాజ్‌కు 100సీసీ సెగ్మెంట్లో ప్లాటినా, డిస్కవర్ బ్రాండ్‌లు ఉన్నాయి. ఇవి రెండు కూడా మార్కెట్‌ను పెద్దగా ఆకట్టుకోలేకపోయాయి. 100సీసీ సెగ్మెంట్లో బజాజ్ తన హవాను కొనసాగించాలంటే, ఈ విభాగంలో మరిన్ని మోడళ్లను ప్రవేశపెట్టాల్సిన ఆవశ్యకత ఎంతైనా ఉంది.