మార్చి నెలలో మార్కెట్లోకి రానున్న హోండా సిబిఆర్ 150ఆర్

Published: Friday, January 13, 2012, 19:02 [IST]

జపాన్ ద్విచక్ర వాహన దిగ్గజం యమహా తాజాగా మార్కెట్లో ప్రవేశపెట్టిన రిఫ్రెష్డ్ వెర్షన్ "ఆర్15 వెర్షన్ 2.0" స్పోర్ట్స్ బైక్‌ను గురిపెడుతూ.. మరో జపాన్ ద్విచక్ర వాహన దిగ్గజం హోండా ఇటీవలే ముగిసిన 2012 ఢిల్లీ ఆటో ఎక్స్‌పోలో ఆవిష్కరించిన స్పోర్ట్స్ బైక్ "సిబిఆర్ 150ఆర్" రానున్న మార్చి నెలాఖరు నాటికి వాణిజ్య పరంగా మార్కెట్లో లభ్యం కానుంది.

నిజమైన రేసింగ్ అనుభూతి (ట్రూ రేసింగ్ సెన్సేషన్) స్ఫూర్తితో రూపొందించిన ఈ సరికొత్త హోండా సిబిఆర్ 150ఆర్‌లో సరికొత్త డిజైన్, ఆకర్షనీయమైన బాడీ గ్రాఫిక్స్‌, 150సీసీ లిక్విడ్ కూల్డ్, డిఓహెచ్‌సి పిజిఎమ్-ఎఫ్ఐ ఇంజన్ వంటి విశిష్టమైన ఫీచర్లు ఉన్నాయి. ఈ ఇంజన్ 10,500 ఆర్‌పిఎమ్ వద్ద 18 బిహెచ్‌పిల శక్తిని, 7500 ఆర్‌పిఎమ్ వద్ద 12.6 ఎన్ఎమ్‌ల టార్క్‌ను విడుదల చేస్తుంది.

హోండా సిబిఆర్ 150ఆర్‌ నిర్మాణంలో ట్విన్ ట్యూబ్లర్ ఫ్రేమ్‌ను ఉపయోగించారు. ఇది కూడా సిబిఆర్ 250ఆర్ మాదిరిగానే వెనుకవైపు మోనో సస్పెన్షన్ (సింగిల్ షాక్ అబ్జార్వర్)ను కలిగి ఉంటుంది. అయితే, ఇందులో ఏబిఎస్ (యాంటీ-లాక్ బ్రేకింగ్ సిస్టమ్) లేదు. ఏబిఎస్ స్థానంలో ముందు వెనుక వైపు డిస్క్ బ్రేక్‌లను ఉపయోగించారు. అలాగే ముందు, వెనుక విశాలమైన ట్యూబ్‌లెస్ టైర్లను అమర్చారు.

హోండా సిబిఆర్ 150ఆర్‌లో ఉపయోగించిన అడ్వాన్స్ ఓ2 సెన్సార్, ఎయిర్ ఇండక్టర్‌లు తక్కువ కర్బన ఉద్ఘారాలను వెలువడేలా చేస్తాయి. ఇది స్టాండర్డ్, డీలక్స్ అనే రెండు వేరియంట్లలో, రెండు రంగులలో లభ్యం కానుంది. ఇక దీని ధర విషయానికి వస్తే, ఇది రూ.1.2 లక్షలకు దిగువన ఉండొచ్చని అంచనా.