అత్యంత తక్కువ ధరకే హీరో మోటోకార్ప్ బైక్‌లు!

Gallery | More Images

ప్రస్తుతం హీరో మోటోకార్ప్ అందిస్తున్న చౌవక మోటార్ సైకిల్ సిడి డాన్ (ఎక్స్-షోరూమ్ ధర రూ.34,500). దీని కన్నా తక్కువ ధరకే మార్కెట్లో ఉత్పత్తులను అందిచడం ద్వారా మార్కెట్ వాటాను విస్తృత స్థాయిలో పెంచుకుని, ద్విచక్ర వాహన విభాగంలో తిరుగులేని శక్తిగా నిలవాలని హీరో మోటోకార్ప్ యోచిస్తోంది. ముఖ్యంగా మోపెడ్లను (టీవీఎస్ ఎక్స్ఎల్ వంటివి) వినియోగించే కస్టమర్లను బైక్‌ల వైపుకు మళ్లించాలనే లక్ష్యంతో హీరో మోటోకార్ప్ పావులు కదుపుతుంది.

ఈ ప్రైస్ రేంజ్ సెగ్మెంట్లో మంచి అవకాశాలు ఉన్నాయని, అందుకే ఇలాంటిదేది ఏదైనా చేయాలనే ఉద్దేశ్యంతో తాము ఉన్నామని, అయితే ప్రస్తుత ఉత్పాదక వ్యయాలు, పెరిగిన ధరలను బట్టి చూస్తే ఇది అనుకున్నంత సులువైనది కాకపోయినప్పటికీ, దీన్ని నిజం చేసేందుకు తమ వద్ద ప్రణాళికలున్నాయని హీరో మోటోకార్ప్ మేనేజింగ్ డైరెక్టర్ ఓ ఆంగ్ల పత్రికతో తెలిపారు.

ప్రస్తుతం విక్రయిస్తున్న మోడళ్ల కన్నా తక్కువ ధరకే వీటిని అందిచాలనుకుంటున్నామని, ఎలాంటి వ్యక్తిగత రవాణా సదుపాయం లేని వారిని దృష్టిలో ఉంచుకుని వీటిని రూపొందించనున్నామని ఆయన తెలిపారు. హీరో మోటోకార్ప్ ఇటీవలే అమెరికాకు చెందిన ఎరిక్ బ్యూయెల్ మోటార్‌సైకిల్ కంపెనీతో చేతులు కలిపిన సంగతి తెలిసిందే.