ఆటో ఎక్స్‌పోలో వెస్పా స్కూటర్లను ఆవిష్కరించిన పియాజ్జియో

మీ అందరికీ వెస్పా స్కూటర్లు గుర్తుండే ఉంటాయి. ఒకప్పుడు ద్విచక్ర వాహన విభాగంలో అత్యంత కీలక పాత్ర పోషించిన వెస్పా స్కూటర్లు ప్రస్తుతం మళ్లీ మన ముందుకు వచ్చేశాయి. ప్రముఖ వాహనాల తయారీ సంస్థ పియాజ్జియో, గతంలో చెప్పినట్లుగానే వెస్పా స్కూటర్లను తిరిగి భారత మార్కెట్లో ప్రవేశపెట్టింది. అభివృద్ధి చెందిన అత్యాధునిక సాంకేతిక పరిజ్ఞానాన్ని ఉపయోగించుకొని తీర్చిదిద్దిన వెస్పా స్కూటర్లను ప్రస్తుతం న్యూఢిల్లీలో జరుగుతున్న 11వ ఆటో ఎక్స్‌పోలో కంపెనీ ప్రదర్శనకు ఉంచింది.

త్వరలోనే వెస్పా స్కూటర్లను వాణిజ్య పరంగా అందుబాటులోకి తీసుకురానున్నామని కంపెనీ తెలిపింది. తొలి వెస్పా స్కూటర్ 1946వ సంవత్సరంలో విడుదలైంది. ఇప్పటి వరకూ దాదాపు వందకు పైగా దేశాల్లో 170 లక్షల వెస్పా స్కూటర్లు అమ్ముడయ్యాయి. ఈ ఏడాదిలో వెస్పా క్లబ్‌ను కూడా ప్రారంభించాలని భావిస్తున్నామని కంపెనీ పేర్కొంది. మన మర్చిపోతున్న పురాతన రోజులను గుర్తు చేసేందుకు వెస్పా సిద్ధంగా ఉంది. మరి వెస్పాను సొంతం చేసుకునేందుకు మీరు సిద్ధంగా ఉన్నారా..?