ఏప్రిల్ నెలలో 12 శాతం తగ్గిన బజాజ్ ఆటో అమ్మకాలు

ఏప్రిల్‌ 2013లో బజాజ్ ఆటో అమ్మకాలు 12.12 శాతం తగ్గి 3,00,827 యూనట్లుగా నమోదయ్యాయి. గడచిన సంవత్సరం ఇదే నెలలో కంపెనీ అమ్మకాలు 3,42,324 యూనిట్లుగా ఉన్నట్లు బజాజ్ ఆటో ఓ ప్రకటనలో పేర్కొంది. ఇక ఈ సమయంలో కంపెనీ ఎగుమతుల విషయానికి వస్తే, అవి 22.89 శాతం పెరిగి 1,30,329 యూనిట్లుగా నమోదయ్యాయని, అంత క్రితం సంవత్సరంలో ఇవి1,69,010 యూనిట్లుగా ఉన్నాయని కంపెనీ తెలిపింది.

ఇకపోతే బజాజ్ ఆటో విక్రయిస్తున్న త్రిచక్ర వాహనాల విషయానికి వస్తే, ఈ సమయంలో కంపెనీ అమ్మకాలు 10.40 శాతం వృద్ధి చెంది 39,266 యూనిట్ల నుంచి 43,351 యూనిట్లకు పెరిగాయని కంపెనీ తెలిపింది. మొత్తమ్మీద చూసుకుంటే, ఏప్రిల్ కంపెనీ మొత్తం అమ్మకాలు 3,44,178 యూనిట్లుగా నమోదు కాగా, అంతకు ముందు సంవత్సరం ఇదే సమయానికి 3,81,590 యూనిట్లుగా ఉన్నాయి. గత ఏడాదితో పోల్చుకుంటే కంపెనీ మొత్తం అమ్మకాలు 9.80 శాతం తగ్గుదలను నమోదు చేశాయి.