క్యూ2లో 9 శాతం పెరిగిన హీరో మోటోకార్ప్ లాభం

భారతదేశపు అగ్రగామి ద్విచక్ర వాహన తయారీ కంపెనీ హీరో మోటోకార్ప్ ఈ ఆర్థిక సంవత్సరం సెప్టెంబర్ నెలతో ముగిసిన ద్వితీయ త్రైమాసికంలో ప్రోత్సాహకర ఆర్థిక ఫలితాలను నమోదు చేసింది. గడచిన ఆర్థిక సంవత్సరం ఇదే త్రైమాసికంతో పోల్చుకుంటే కంపెనీ ఏకీకృత నికర లాభం 9.26 శాతం వృద్ధి చెంది రూ.481.40 కోట్లుగా నమోదైంది. గత ఏడాది ఇదే కాలంలో హీరో మోటోకార్ప్‌ రూ.440.58 కోట్ల లాభాన్ని ఆర్జించింది.

ఇదే సమయంలో కంపెనీ మొత్తం ఆదాయం కూడా 10.58 శాతం వృద్ధి చెంది రూ.5,151 కోట్ల నుంచి రూ.5,696 కోట్లకు పెరిగింది. ప్రస్తుత ఆర్థిక సంవత్సరం జూలై-సెప్టెంబర్ త్రైమాసికంలో కంపెనీ మొత్తం 14,16,276 వాహనాలను విక్రయించింది. అంతకు ముందు సంవత్సరం ఇదే సమయంలోకంపెనీ మొత్తం అమ్మకాలు 13,32,805 యూనిట్లుగా ఉన్నాయి. ఈ సమయంలో కంపెనీ అమ్మకాలు గడచిన సంవత్సరంతో పోల్చుకుంటే 6.26 శాతం వృద్ధిని కనబరచాయి.