హీరో స్ప్లెండర్‌కు చెక్ పెట్టేందుకు వస్తున్న హోండా బడ్జెట్ బైక్

భారత టూవీలర్ మార్కెట్లో అత్యధికంగా అమ్మడవుతున్న హీరో స్ప్లెండర్ మోటార్‌సైకిల్‌ను టార్గెట్ చేస్తూ, జపనీస్ టూవీలర్ కంపెనీ హోండా మోటార్‌సైకిల్ అండ్ స్కూటర్స్ ఇండియా (హెచ్ఎమ్ఎస్ఐ) ఓ బడ్జెట్ బైక్‌ను విడుదల చేయనుంది. ప్రధానంగా మాస్ మార్కెట్లను లక్ష్యంగా చేసుకొని, 100-110సీసీ విభాగంలో ఓ చవక బైక్‌ను హోండా ప్రవేశపెట్టనుంది. ప్రస్తుతం కంపెనీ అందిస్తున్న అత్యంత చవక బైక్ హోండా డ్రీమ్ యుగకు దిగువన ఈ కొత్తత బడ్జెట్ బైక్ విడుదల కానుంది.

డ్రీమ్ యుగ ప్లాట్‌ఫామ్‌పై డ్రీమ్ సిరీస్‌లో తక్కువ ధరకే లభ్యం కానున్న ఈ బైక్‌ను కంపెనీ ఇప్పటికే కె23 అనే కోడ్‌ నేమ్‌తో అభువృద్ధి చేస్తున్నట్లు సమాచారం. మరో రెండు నెలల్లో ఇది మార్కెట్లో అందుబాటులోకి రావచ్చని తెలుస్తోంది. ఈ కొత్త అధిక మైలేజ్‌ని ఆఫర్ చేస్తూ, ఈ సెగ్మెంట్లోని హీరో స్ప్లెండర్, బజాజ్ డిస్కవర్, స్టార్ సిటీ వంటి మోడళ్లతో తలపడనుంది. ఏప్రిల్ 2013 నుండి ప్రారంభం కానున్న కొత్త ఆర్థిక సంవత్సరంలో హెచ్ఎమ్ఎస్ఐ 6 లక్షల 100-110సీసీ బైక్‌లను విక్రయించాలని లక్ష్యంగా పెట్టుకుంది.

ఈ సంఖ్య హీరో స్ప్లెండర్ బ్రాండ్ అమ్మకాల్లో కేవలం 25 శాతం మాత్రమే. ఇదే సమయంలో హీరో మోటోకార్ప్ 21-22 లక్షల స్ప్లెండర్ బ్రాండ్ వాహనాలను విక్రయిస్తోంది. హీరో స్ప్లెండర్ బ్రాండ్‌లో స్ప్లెండర్ ప్లస్, స్ప్లెండర్ ప్రో, స్ప్లెండర్ ఎన్ఎక్స్‌జి, సూపర్ స్ప్లెండర్ మోడళ్లు ఉన్నాయి. ఈ నేపథ్యంలో, వచ్చే ఆర్థిక సంవత్సరంలో హోండా ప్రస్తుతం దేశీయ విపణిలో అందిస్తున్న డ్రీమ్ యుగ మరియు త్వరలో మార్కెట్లో విడుదల చేయనున్న డ్రీమ్ సిరీస్ బడ్జెట్‌ బైక్‌లను కలిపి మొత్తం 12 లక్షల యూనిట్లను విక్రయించాలని లక్ష్యంగా నిర్దేశించుకుంది.