హ్యార్లీ డేవిడ్‌సన్‌ను వరించిన అత్యుత్తుమ పురస్కారం

అమెరికాకు చెందిన ప్రముఖ మోటార్‌సైకిల్ కంపెనీ హ్యార్లీ డేవిడ్‌సన్ ఇండియాను అత్యుత్తమ ప్రతిభా అవార్డ్ దక్కింది. తయారీ విధానంలో కంపెనీ ప్రదర్శించిన అత్యుత్తమ నిర్వహణకు గాను 10వ ఇండో-అమెరికన్ ట్రేడ్ ఎక్సలెన్స్ అవార్డ్స్ 2014 వరించింది. ఈ అవార్డుల కార్యక్రమాన్ని ఇండో-అమెరికన్ చాంబర్ ఆఫ్ కామర్స్ (ఐఏసిసి) నిర్వహించింది.

భారత్, అమెరికా దేశాలకు చెందిన వ్యాపార మరియు ప్రభుత్వ ఉన్నతాధికారులు, ప్రముఖులు, నిపుణులు మరియు మీడియా సమక్షంలో హ్యార్లీ డేవిడ్‌సన్ ఇండియా ప్లాంట్ ఆపరేషన్స్ డైరెక్టర్ బల్జీత్ మోఖా ఈ అవార్డును అందుకున్నారు.

భారతదేశంలో తాము గడచిన 5 ఏళ్లుగా కార్యకలాపాలు నిర్వహిస్తున్నామని బల్జీత్ మోఖా గుర్తు చేశారు. హ్యర్లీ డేవిడ్‌సన్‌కు భారత్‌లోని బవాల్ వద్ద అసెంబ్లింగ్ యూనిట్ ఉంది. 2010లో ప్రారంభమైన ఈ అసెంబ్లింగ్ యూనిట్‌లో ఇప్పుడు స్ట్రీట్ 750, స్ట్రీట్ 500 మోటార్‌సైకిళ్లను కూడా ఉత్పత్తి చేస్తున్నారు. సికెడి రూపంలో విడిభాగాలను ఇక్కడికి దిగుమతి చేసుకొని అసెంబ్లింగ్ చేస్తున్నారు.