క్యూ3లో 8 శాతం పెరిగిన హీరో మోటోకార్ప్ లాభం

భారతదేశపు అగ్రగామి ద్విచక్ర వాహన తయారీ కంపెనీ హీరో మోటోకార్ప్ డిసెంబర్ 31, 2013తో ముగిసిన 3వ త్రైమాసికానికి గాను నికరల లాభంలో 7.53 శాతం వృద్ధిని సాధించామని పేర్కొంది. గడచిన ఆర్థిక సంవత్సరంలో కంపెనీ నికర లాభం రూ.487.89 కోట్లుగా నమోదు కాగా, ఈ ఏడాది అది రూ.524.66 కోట్లకు పెరిగిందని కంపెనీ ఓ ప్రకటనలో తెలిపింది.

ఇక ఇదే కంపెనీ అమ్మకాలు 11 శాతం వృద్ధి చెంది రూ.6,151 కోట్ల నుంచి రూ.6,846 కోట్లకు పెరిగాయి. ఈ కాలంలో మొత్తం 16,80,940 వాహనాలను విక్రయించినట్లు హీరో మోటోకార్ప్ వివరిచింది. కాగా.. గతంలో ఇదే కాలానికి 15,73,135 యూనిట్ల అమ్మకాలు నమోదయ్యాయి.

కాగా.. తాము కొత్తగా టాంజానియా, ఉగాండా, ఈజిప్ట్ తదితర నూతన మార్కెట్లకు వాహన ఎగుమతులను ప్రారంభించామని, లాటిన్ మార్కెట్లలో తమ వాహనాలను విక్రయించేందుకు వీలుగా కొలంబియాలో ఓ తయారీ ప్లాంట్‌ను ఏర్పాటు చేసే సన్నాహాల్లో ఉన్నామని కంపెనీ పేర్కొంది.