మార్కెట్ నుంచి తొలగిపోనున్న హోండా సిబిఎఫ్ స్టన్నర్

జపనీస్ టూవీలర్ కంపెనీ హోండా మోటార్‌సైకిల్ అండ్ స్కూటర్స్ ఇండియా (హెచ్ఎమ్ఎస్ఐ) దేశీయ విపణిలో అందిస్తున్న 125సీసీ మోటార్‌సైకిల్ 'హోండా సిబిఎఫ్ స్టన్నర్' (CBF Stunner) ఇకపై మార్కెట్ నుంచి పూర్తిగా తొలగిపోనుంది. ఈ మోడల్ అమ్మకాలు అంతంత మాత్రంగానే ఉండటంతో కంపెనీ ఈ నిర్ణయం తీసుకున్నట్లు తెలుస్తోంది.

హోండా గడచిన సంవత్సరంలో ఈ మోడల్‌లో ఫ్యూయెల్ ఇంజక్షన్ వేరియంట్ ఉత్పత్తిని నిలిపి వేసింది. కాగా.. ప్రస్తుతం అందుబాటులో ఉన్న కార్బురేటెడ్ వేరియంట్ ఉత్పత్తిని కూడా నిలిపివేయాలని హోండా భావిస్తోంది. ఒకప్పుడు హోండా సిబిఎఫ్ స్టన్నర్‌కు మార్కెట్లో మంచి డిమాండ్ ఉండేది, అప్పట్లో ఈ మోడల్‌కు గట్టి పోటీనిచ్చే 125సీసీ బైక్ లేకపోవటమే దీని విజయానికి కారణమైంది.

హోండా ఇప్పటికే తమ సిబి డాజ్లర్ మోడల్‌ను నిలిపివేసిన సంగతి తెలిసినదే. కొందరు డీలర్లు తెలిపిన సమాచారం ప్రకారం, గడచిన మూడు నెలలుగా తాము ఒక్క సిబిఎఫ్ స్టన్నర్‌ను కూడా అందుకోలేదట. హోండా స్టన్నర్‌లో ఉపయోగించిన 124.7సీసీ, సింగిల్-సిలిండర్, ఎయిర్-కూల్డ్ ఇంజన్ గరిష్టంగా 8000 ఆర్‌పిఎమ్ వద్ద 11 బిహెచ్‌పిల శక్తిని, 6500 ఆర్‌పిఎమ్ వద్ద 11 ఎన్ఎమ్‌ల టార్క్‌ను ఉత్పత్తి చేస్తుంది.