మరో 18 నెలల్లో ఆంధ్రా ప్లాంట్ నుంచి బైక్స్: హీరో మోటోకార్ప్

భారతదేశపు అగ్రగామి ద్విచక్ర వాహన తయారీ సంస్థ హీరో మోటోకార్ప్ తమ 6వ ప్లాంట్‌ను ఆంధ్రప్రదేశ్ రాష్ట్రంలోనే ఏర్పాటు చేసేందుకు సిద్ధమైన సంగతి తెలిసినదే. ఈ మేరకు హీరో మోటోకార్ప్ మరియు ఆంధ్రప్రదేశ్ సర్కారు మధ్య ఓ పరస్పర సహకార ఒప్పందం కుదింరింది. ఆంధ్రప్రదేశ్ రాష్ట్రంలోని చిత్తూరు జిల్లాలో ఉన్న శ్రీసిటీలో హీరో మోటోకార్ప్ ప్లాంట్ కోసం ఆ రాష్ట్ర సర్కారు స్థలాన్ని కేటాయించింది.

హీరో మోటోకార్ప్ ఈ ప్లాంట్ పనులను వీలైనంత త్వరగా ప్రారంభించి, ప్లాంట్ నిర్మాణాన్ని కూడా సాధ్యమైనంత త్వరలో పూర్తి చేయాలని యోచిస్తోంది. మరో 18 నెలల సమయంలో ఈ ప్లాంట్ నుంచి ద్విచక్ర వాహనాలను ఉత్పత్తి చేస్తామని హీరో మోటోకార్ప్ ప్రకటించింది.

చిత్తూరులోని శ్రీసిటీలో ఏర్పాటు చేయనున్న హీరో మోటోకార్ప్ ప్లాంట్ వలన సుమారు 3000 మందికి ప్రత్యక్షంగా ఉపాధి లభించనుండగా, పరోక్షంగా మరో 7000 మందికి ఉపాధి లభించనుంది.

ఈ కొత్త ప్లాంట్ పూర్తిస్థాయిలో నిర్వహణలోకి వచ్చినట్లయితే, ఈ ప్లాంట్ ప్రతి ఏటా 1.8 మిలియన్ మోటార్‌సైకిళ్లు మరియు సైకిళ్లు ఉత్పత్తి అవుతాయి. ఇది హీరో మోటోకార్ప్‌కు భారతదేశంలో 6వ ప్లాంట్, ఈ ప్లాంట్ పూర్తిస్థాయిలో నిర్వహణలోకి వస్తే, కంపెనీ మొత్తం దేశీయ ఉత్పత్తి సామర్థ్యం 12 మిలియన్ యూనిట్లకు చేరుకుంటుంది.