అధికారికంగా వెల్లడైన 4 వ తరం కియా కార్నివాల్ ఎంపివి, చూసారా !

కొత్త కియా కార్నివాల్ ప్రత్యేకత ఏమిటంటే ఇందులో కొత్తగా పునర్నిర్మించిన కార్నివాల్ ప్రస్తుత తరం కంటే 40 మిల్లీమీటర్ల పొడవు మరియు 10 మిల్లీమీటర్ల వెడల్పుతో ఉంటుంది. దీనితో పాటు 3090 మి.మీ వీల్‌బేస్‌, 627 లీటర్ల బూట్ స్పెస్ కలిగి ఉంటుంది.

దాని వెనుక సీటర్ ను మడతపెట్టి దాని బూట్ స్థలాన్ని 2,905 లీటర్ల వరకు చేయవచ్చు. కియా కొత్త కార్నివాల్‌ను "గ్రాండ్ యుటిలిటీ వెహికల్" గా ప్రదర్శిస్తుంది. ఈ కారు బయట వైపు టైగర్ నోస్ గ్రిల్ మొదట అందరి దృష్టిని ఆకర్షిస్తుంది.

ఇది కాకుండా దాని గ్రిల్‌లో డైమండ్-మాష్ నమూనా మరియు క్రోమ్ ఇన్సర్ట్‌లు ఉన్నాయి. ఇది స్లిమ్ హెడ్‌లైట్ క్లస్టర్ హౌసింగ్, స్టెప్డ్ ఎల్‌ఇడి డిఆర్‌ఎల్ మరియు వెనుకవైపు ఎల్‌ఇడి లైట్ బార్‌ను కలిగి ఉంది.

కారు ఇప్పటికే ఉన్న స్లైడింగ్ డోర్స్ కలిగి ఉంది, కానీ దాని సి-పిల్లర్ పునఃరూపకల్పన చేయబడింది. ఈ కారు యొక్క ఇంటీరియర్స్ గమనించినట్లయితే ఇది 3-రో లేదా 4-రో ఎంపికను కలిగి ఉంది. ఇది కాకుండా 12.3 అంగుళాల టచ్ స్క్రీన్ ఇన్ఫోటైన్‌మెంట్ సిస్టమ్ మరియు డిజిటల్ ఇన్స్ట్రుమెంట్ క్లస్టర్ కూడా ఇవ్వబడింది.

నాల్గవ తరం కార్నివాల్ మూడు ఇంజన్ ఎంపికలతో అంతర్జాతీయ మార్కెట్లో అందించబడుతుంది. అందులో మొదటిది 3.5-లీటర్ జిడిఐ వి 6 పెట్రోల్ ఇంజన్. ఇది 290 బిహెచ్‌పి మరియు 355 ఎన్ఎమ్ టార్క్ ఉత్పత్తి చేస్తుంది. రెండవది 3.5-లీటర్ ఎంపిఐ వి 6 పెట్రోల్ ఇంజన్. ఈ ఇంజిన్ 268 బిహెచ్‌పి మరియు 332 ఎన్ఎమ్ టార్క్ ఉత్పత్తి చేస్తుంది. ఇక చివర మూడవది 2.2-లీటర్ డీజిల్ ఇంజన్. ఇది 199 బిహెచ్‌పి శక్తిని మరియు 404 ఎన్ఎమ్ టార్క్ ఉత్పత్తి చేస్తుంది.

ఈ కారులో ఫార్వర్డ్ కొలిషన్ అవాయిడెన్స్ అసిస్ట్, పాదచారుల మరియు సైక్లిస్ట్ డిటెక్షన్, లేన్ కీప్ అసిస్ట్, ఇంటెలిజెంట్ స్పీడ్ లిమిట్ అసిస్ట్, డ్రైవర్ అటెన్షన్ వార్ణింగ్, స్మార్ట్ క్రూయిస్ కంట్రోల్, హై-బీమ్ అసిస్ట్, లేన్ ఫాలోయింగ్ అసిస్ట్ మరియు హైవే డ్రైవింగ్ అసిస్ట్ వంటి సేఫ్టీ ఫీచర్స్ ఉంటాయి.