కస్టమర్ల కోసం ఆన్‌లైన్ దుకాణం తెరచిన హీరో మోటోకార్ప్

హీరో మోటోకార్ప్ ఇ-షాప్ నుంచి కొనుగోలు చేయదలచిన కస్టమర్లు కంపెనీ అధికారిక వెబ్‌సైట్ www.heromotocorp.com ను సందర్శించి అందులో ఇ-షాప్ (eSHOP) విభాగాన్ని ఎంచుకోవటం ద్వారా ఆన్‌లైన్ షాప్‌ను యాక్సెస్ చేసుకోవచ్చు. ఇందులో వాహనాల కొనుగోలుకు సంబంధించిన సమాచారం, తదుపరి చర్యలను చాలా సులువుగా, పారదర్శకంగా రూపొందించారు.

ఇ-షాప్‌ను సందర్శించిన కస్టమర్లు తమకు నచ్చిన వాహనాన్ని ఎంచుకోవటం లేదా తమ సమీపంలోని డీలరు నుంచి బుక్ చేసుకోవటం చేయవచ్చు. అలాగే, ఇందులో ప్రస్తుత ఆన్-రోడ్ ధర, మీరు ఎంచుకున్న మోడల్ స్టాక్‌లో ఉందా లేదా, ఆన్‌లైన్ ద్వారా సమర్పించాల్సిన డాక్యుమెంట్స్, సమీప డీలరుకు తక్షణ సమాచారం అందించడం, ఫైనాన్సింగ్ ఆప్షన్స్, సేల్ ఆర్డర్ కన్ఫర్మేషన్, విన్ (VIN) నెంబర్ కేటాయింపు, డెలివరీ తేదీ వంటి అనేక అంశాలను కూడా దశల వారీగా తెలుసుకోవచ్చు.

ఈ సైట్‍‌లో కస్టమర్లు తమకు నచ్చిన వాహనం, వేరియంట్, కలర్ మరియు తాము డెలివరీ తీసుకోవాల్సిన నగరాన్ని కూడా ఎంచుకోవచ్చు. మీరు ఎంచుకునే మోడల్ అవైలబిలిటీని బట్టి డీలర్‌షిప్ కేటాయింపు ఉంటుంది లేదా కస్టమర్లు తమకు నచ్చిన డీలరును ఎంచుకుని, చెల్లింపులు చేసే వెసలుబాటు కూడా ఉంటుంది.

ఒక్కసారి కస్టమర్ తనకు నచ్చిన వాహనాన్ని ఎంచుకున్న తర్వాత పేమెంట్ చేయాల్సి ఉంటుంది, పేమెంట్ చేసేందుకు గాను వెరిఫికేషన్ కోసం కస్టమర్ల మొబైల్ ఫోన్‌కు ఓ విశిష్టమైన ఓటిపి పంపించబడుతుంది. ఇలా వెరిఫికేషన్ పూర్తయ్యాక కస్టమర్లు ఎంచుకున్న డీలర్‌షిప్ నుంచి సేల్స్ అసిస్ట్‌కు అనుసంధానం చేయబడుతుంది. ఒకవేళ కస్టమర్‌కు ఆసక్తి ఉంటే, పేమెంట్ ప్రాసెస్ సమయంలో ఫైనాన్స్ ఆప్షన్‌ను కూడా ఎంచుకోచ్చు.

రోజు రోజుకి పెరుగుతున్న కోవిడ్-19 కేసుల నేపథ్యంలో, కొనుగోలుదారుల భద్రతను దృష్టిలో ఉంచుకొని రానున్న రోజుల కోసం కంపెనీ అనేక డిజిటల్ ఆఫ్టర్ సేల్స్ సర్వీస్ ప్రణాళికను కంపెనీ తీసుకొచ్చింది. అంటే, ఇకపై కస్టమర్లు తమకు కావల్సిన సేవల కోసం షోరూమ్‌ను సందర్శించాల్సిన అవసరం లేకుండానే అన్నింటినీ ఆన్‌లైన్ ద్వారా పరిష్కరించుకునే వెసలుబాటు అన్నమాట. ఈ సేవల్లో భాగంగా, డిజిటల్ సర్వీస్ జాబ్ కార్డ్, అకనాలెడ్జ్‌మెంట్ రిసీప్ట్, యాప్-బేస్డ్ సర్వీస్ బుకింగ్, వర్క్‌షాప్ పనిగంటలను పెంచడం వంటి ప్రణాళికలను హీరో మోటోకార్ప్ సిద్ధం చేసింది.

హీరో యాప్ (Hero App)ను ఉపయోగించి కస్టమర్లు తమకు సమీపంలో ఉన్న వర్క్‌షాప్ నుంచి బైక్ సర్వీస్ అపాయింట్‌మెంట్‌ను ముందుగానే బుక్ చేసుకోవచ్చు. జాబ్ కార్డులను కూడా నేరుగా యాప్‌లోనే ఉంచడం ద్వారా సర్వీస్‌కు సంబంధించిన పేపర్లను చేతులు మార్చుకునే అవకాశం ఉండదు. సామాజిక దూరం (సోషల్ డిస్టాన్స్)ను దృష్టిలో ఉంచుకొని ఈ కొత్త విధానాన్ని ప్రవేశపెట్టారు.

హీరో మోటోకార్ప్ ఇ-షాప్ ఆన్‌లైన్ స్టోర్‌పై డ్రైవ్‌స్పార్క్ అభిప్రాయం.

ప్రస్తుత కోవిడ్-19 పరిస్థితులను చూస్తుంటే, వైరస్ వ్యాప్తి నివారణ కోసం హీరో మోటోకార్ప్ తీసుకున్న నిర్ణయం చాలా మంచిదనే చెప్పాలి. కొనుగోలుదారుల ఆసక్తిని దెబ్బతీయకుండా అలాగే కరోనా వైరస్ వ్యాప్తి నివారణకు అన్ని విధాలుగా ప్రయత్నిస్తూ, కేవలం కొన్ని క్లిక్కులతోనే కస్టమర్లు తమకు నచ్చిన బైక్‌ను కోనుగోలు చేయటం అనేది ఓ కొత్త అనుభూతిగా ఉంటుంది.