ఇప్పుడు బిఎస్ 6 టివిఎస్ రేడియన్ కొత్త ధరలు వచ్చేశాయ్

టివిఎస్ మోటార్ కంపెనీ ఈ ఏడాది ఏప్రిల్ ప్రారంభంలో బిఎస్-6 కంప్లైంట్ రేడియన్ మోటార్‌సైకిల్‌ను భారత్‌లో విడుదల చేసింది. ఈ మోటార్‌ సైకిల్ బిఎస్ 6 ఉద్గార ప్రమాణాలకు అనుకూలంగా నవీనీకరించబడింది. ఈ కారణంగా కంపెనీ బైక్ ధరలను రూ. 8,600 వరకు పెంచింది.

కొత్త టివిఎస్ రేడియన్ బైక్ బేస్-స్పెక్ ధర రూ. 59,742 వద్ద ప్రారంభం కాగా, టాప్-ట్రిమ్ ధర రూ. 65,742 (ఎక్స్-షోరూమ్, ఢిల్లీ) వరకు ఉంటుంది. ఈ టివిఎస్ రేడియన్ బైక్ మూడు వేరియంట్లలో లభిస్తుంది. అవి బేస్, డ్రమ్ మరియు డిస్క్ అనే మూడు వేరియంట్లు.

కొత్త టివిఎస్ బైక్ కేవలం ధర పెరుగుదల తప్ప బిఎస్ 6 టివిఎస్ రేడియన్ మోటార్‌సైకిల్‌లో ఇతర మార్పులు చేయలేదు. ఈ బైక్ 109 సిసి సింగిల్ సిలిండర్ ఎయిర్-కూల్డ్ ఇంజన్ కలిగి ఉంటుంది. ఇది 7,350 ఆర్‌పిఎమ్ వద్ద 8 బిహెచ్‌పి మరియు 4,500 ఆర్‌పిఎమ్ వద్ద 8.7 ఎన్ఎమ్ పీక్ టార్క్ ఉత్పత్తి చేస్తుంది. ఇది 4-స్పీడ్ గేర్‌బాక్స్‌తో జతచేయబడి ఉంటుంది.

బిఎస్ 6 మోడల్‌ను ప్రారంభించిన సమయంలో, టివిఎస్ అప్‌డేట్ చేసిన రేడియన్ తన మునుపటి బిఎస్ 4 బైక్ కంటే 15 శాతం మెరుగైన ఇంధన సామర్థ్యాన్ని అందిస్తుందని కంపెనీ ప్రకటించింది. టీవీఎస్ బిఎస్ 6 రేడియన్ బైక్ 10-లీటర్ ఇంధన ట్యాంక్ సామర్త్యాన్ని కలిగి ఉంటుంది. ఇది 79 కిలోమీటర్ల మైలేజీని అందిస్తుంది.

టివిఎస్ ఇటీవల భారతీయ మార్కెట్లో తమ ప్రసిద్ధ అపాచీ ఆర్టీఆర్ 160 4 వి మరియు ఆర్టీఆర్ 200 4 వి మోడళ్ల ధరలను కూడా పెంచింది. మోడల్ మరియు ఎంచుకున్న వేరియంట్‌ను బట్టి రెండు మోడళ్ల ధరల పెరుగుదల సుమారు రూ. 2,500 వరకు ఉంటుంది. టివిఎస్ అపాచీ ఆర్టీఆర్ 160 4 వి, ఆర్టీఆర్ 200 4 వి ధరలు ఇప్పుడు వరుసగా రూ. 1.2 లక్షలు, రూ .1.27 లక్షలు (ఎక్స్-షోరూమ్, ఢిల్లీ).

ఇటీవల కాలంలో టివిఎస్ మాత్రమే కాకుండా ఇతర కంపెనీలు తమ బ్రాండ్ వాహనాల రేట్లను కొంతవరకు పెంచాయి. టీవీఎస్ ప్రత్యర్థి అయిన బజాజ్ ఆటో ఇటీవలే దేశంలో తన మొత్తం ఉత్పత్తి శ్రేణి ధరలను కూడా పెంచింది.