యుబిసిఓ టూవీల్ డ్రైవ్ ఎలక్ట్రిక్ బైక్స్ - డీటేల్స్

ఈ రెండింటినీ ఆన్ రోడ్ మరియు ఆఫ్ రోడ్ ప్రయోజనం కోసం ఉపయోగించుకోవచ్చు. మెరుగైన టార్క్, ఎక్కువ పవర్ మరియు ట్రాక్షన్‌లతో ఈ రెండు బైక్‌లు గతంలో కంటే మరింత రగ్గడ్ పెర్ఫార్మెన్స్‌ను ఆఫర్ చేస్తాయని కంపెనీ తెలిపింది.

ఈ ఎలక్ట్రిక్ బైక్‌ల డిజైన్ చాలా సింపుల్‌గా ఉన్నప్పటికీ, వీటి నిర్మాణం మాత్రం చాలా ధృడంగా ఉంటుంది. ఈ రెండు ఎలక్ట్రిక్ వాహనాలపై ఎలాంటి ఫైబర్ ఆప్రాన్ కానీ లేదా ప్లాస్టిక్ కవరింగ్స్ కానీ ఉండవు. పూర్తి ఫ్రేమ్ బయటకు కనిపించేలా నేక్డ్ బాడీ స్టైల్‌లో కనిపిస్తాయి. దీని ఫలితంగా ఇవి తేలిక బరువును కలిగి ఉండి, ఎక్కువ రేంజ్‌ను ఆఫర్ చేయడంలో సహకరిస్తాయి.

ఈ బైక్ రూపం ఇతర బైక్‌ల కంటే భిన్నంగా ఉంటుందని కంపెనీ తెలిపింది. ఈ బైక్‌లను V ఆకారపు ఫ్రేమ్‌ను ఉపయోగించి తయారు చేశారు. ఇది చాలా బలంగా ఉంటుంది. బైక్ మధ్య భాగంలో బరువును బ్యాలెన్స్ చేసేందుకు తొలగించగల బ్యాటరీ కంపార్ట్మెంట్ ఉంటుంది. ఈ రెండు బైక్‌లలో తగిన భద్రతా ఫీచర్లు కూడా ఉంటాయి.

ఈ బైక్‌లను బ్లాక్ అండ్ రెడ్ ఫ్రేమ్ కలర్స్‌లో అందిస్తున్నారు. కమ్యూటర్ వేరియంట్లలో ఇక్కడ సాధారణ టైర్లను అమర్చారు, అడ్వెంచర్ వేరియంట్లలో ఆఫ్-రోడ్ టైర్లను అందిస్తాయి. ఈ బైక్ మూడు పవర్ ఆప్షన్లలో లభిస్తుంది. ఇందులో 2.1 కిలోవాట్, 2.6 కిలోవాట్ మరియు 3.1 కిలోవాట్ ఎలక్ట్రిక్ మోటార్ ఆప్షన్లు ఉంటాయి.

ఈ రెండు బైక్‌ల గరిష్ట వేగం గంటకు 50 కిమీ. ఈ బైక్‌లు పూర్తి చార్జీపై గరిష్టంగా 120 కి.మీ రేంజ్‌ని ఆఫర్ చేస్తాయని కంపెనీ పేర్కొంది. బైక్‌లోని రెండు చక్రాలలో ఒక్కొక్కటి చొప్పున 1 కిలోవాట్ ఎలక్ట్రిక్ మోటార్లు ఉంటాయి.

ఈ బైక్ అన్ని ఉపరితలాలపై నడపడానికి మన్నికైన సస్పెన్షన్ సెటప్‌ను కలిగి ఉంటుంది. డ్రైవర్ తన సౌలభ్యం ప్రకారం సస్పెన్షన్ సెటప్‌ను సర్దుబాటు చేసుకోవచ్చు. యుబిసిఓ తమ 2x2 ఎలక్ట్రిక్ బైక్ కాన్సెప్ట్‌ను తొలిసారిగా 2014లో ప్రవేశపెట్టింది. ఈ బైక్ బరువు తక్కువగా ఉండటంతో నడపటానికి చాలా ప్రాక్టికల్‌గా ఉంటుంది.