భారత్‌కు రానున్న యమహా ఎక్స్ఎస్ఆర్ 155; ఫీచర్లు, వివరాలు

పాత-కొత్త కలయిక మాదిరిగా ఉండే ఈ రెట్రో-మోడ్రన్ లుకింగ్ మోటార్‌సైకిల్‌ను భారత మార్కెట్లో విడుదల చేసినట్లయితే, దీని ధర సుమారు రూ.1.4 లక్షలు (ఎక్స్-షోరూమ్) వరకూ ఉండొచ్చని మార్కెట్ నిపుణులు అంచనా వేస్తున్నారు.

ప్రపంచ మార్కెట్లలో యమహా విక్రయిస్తున్న 'స్పోర్ట్ హెరిటేజ్' విభాగంలో యమహా ఎక్స్ఎస్ఆర్ 155 అతి చిన్న బైక్. దీని డిజైన్ చూడటానికి ఓల్డ్ స్కూల్ మాదిరిగా అనిపించినప్పటికీ, ఫీచర్ల పరంగా మొత్తం మోడ్రన్ టచ్‌తో ఈ బైక్‌ని డెవలప్ చేశారు.

గుండ్రటి హెడ్‌లైట్, మజిక్యులర్ లుకింగ్ ఫ్యూయెల్ ట్యాంక్‌తో ఇది పాత కాలపు మోటార్‌సైకిళ్ల డిజైన్‌ను తలపిస్తుంది. ఇక ఇన్‌స్ట్రుమెంట్ క్లస్టర్ విషయానికి వస్తే ఇది పూర్తిగా డిజిటల్ ఫామ్‌లో ఉండి నేటి తరం టెక్నాలజీని ప్రతిభింభింపజేస్తుంది. అలాగే ఇందులోని సింగిల్ పీస్ సీట్ డిజైన్ కూడా రెట్రో డిజైన్‌ని తలపిస్తుంది.

యమహా ఎక్స్ఎస్ఆర్ 155 బైక్‌లోని గుండ్రటి ఇన్‌స్ట్రుమెంట్ క్లస్టర్ రైడర్‌కు కావల్సిన సమాచారాన్ని అందిస్తుంది. ఇందులో ట్రిప్ మీటర్, ఫ్యూయెల్ గేజ్, స్పీడో మీటర్, గేర్ ఇండికేటర్, ట్రిప్ ఇండికేటర్, టర్న్ ఇండికేటర్ అన్నీ కూడా డిజిటల్ రూపంలోనే ఉంటాయి. ఇందులో సంకేతాలను చదవటం / అర్థం చేసుకోవటంలో సులువుగా ఉండేలా దీనిని డిజైన్ చేశారు.

ఇక ఇంజన్ విషయానికి వస్తే.. కొత్త యమహా ఎక్స్ఎస్ఆర్ 155 బైక్‌లో 155సీసీ లిక్విడ్ కూల్డ్ సింగిల్ సిలిండర్ ఇంజన్‌ను ఉపయోగించారు. యమహీ వివిఏ టెక్నాలజీతో తయారైన ఈ ఇంజన్ గరిష్టంగా 18.9 బిహెచ్‌పిల శక్తిని, 14.7 ఎన్ఎమ్‌ల టార్క్‌ని ఉత్పత్తి చేస్తుంది. ఇది స్లిప్ అసిస్ట్ క్లచ్‌తో కూడిన సిక్స్-స్పీడ్ గేర్‌బాక్స్‌తో వస్తుంది. యమహా అందిస్తున్న ఎమ్‌టి-15 మరియు ఆర్15 వి3.0లో కూడా ఇదే తరహా ఇంజన్‌ను ఉపయోగిస్తున్నారు.

ఈ రెండు మోడళ్లలో ఉపయోగించిన అనేక విడిభాగాలను కొత్త యమహా ఎక్స్ఎస్ఆర్ 155 బైక్‌లోను ఉపయోగించే అవకాశం ఉంది. ఇలా చేయటం వలన దీని ఉత్పత్తి వ్యయాన్ని అదుపులో ఉంచి, పోటీ ధరకే ఈ మోడల్‌ను విడుదల చేసే అవకాశం ఉంటుంది. ఈ మోడళ్లలో ఉపయోగించిన ఫ్రేమ్, సస్పెన్షన్, బ్రేక్స్ వంటి భాగాలను కొత్త ఎక్స్ఎస్ఆర్ 155లోనూ ఉపయోగించవచ్చని అంచనా.

రైడ్ చేస్తున్నప్పుడు మాగ్జిమం రిగిడిటీని ఆఫర్ చేసేలా కొత్త యమహా ఎక్స్ఎస్ఆర్ 155 బైక్‌ని స్టీల్-డెల్టాబాక్స్ ఫ్రేమ్ ఉపయోగించి తయారు చేశారు. ముందు వైపు అప్‌సైడ్ డౌన్ ఫోర్క్స్ (యూఎస్‌డి) మరియు వెనుక వైపు మోనోషాక్ సస్పెన్షన్‌ను ఉపయోగించారు. అలాగే ముందు వైపు 282 ఎమ్.ఎమ్. డిస్క్ బ్రేక్‌ను మరియు వెనుక వైపు 240 ఎమ్.ఎమ్. డిస్క్ బ్రేక్‌ను ఉపయోగించారు. ఇందులో డ్యూయెల్ ఛానెల్ ఏబిఎస్ స్టాండర్డ్‌గా లభించే ఆస్కారం ఉంది.

భారత మార్కెట్లో యమహా ఎక్స్ఎస్ఆర్ 155 బైక్ విడుదలైతే ఇది కంపెనీ అందిస్తున్న ఎమ్‌టి-15 మరియు ఆర్15 వి3.0 మోడళ్లకు దిగువన ప్రవేశపెట్టే అవకాశం ఉంది. అంతేకాకుండా 150 సీసీ సెగ్మెంట్లో యమహా ఆఫర్ చేయనున్న మొట్టమొదటి నియో-రెట్రో మోటార్‌సైకిల్‌గా కూడా ఇది నిలువనుంది. గ్లోబల్ వెర్షన్‌కి ఇండియన్ వెర్షన్‌కి ఫీచర్ల పరంగా దాదాపు అన్నీ ఒకేలా ఉన్నప్పటికీ, ఫ్రంట్ సస్పెన్షన్‌లో మాత్రం మార్పు ఉండే అవకాశం ఉంది.

యమహా ఎక్స్ఎస్ఆర్ 155 బైక్ ఇండియా లాంచ్‌పై డ్రైవ్‌స్పార్క్ అభిప్రాయం.

యమహా అంతర్జాతీయ మార్కెట్లలో విడుదల చేసిన ఎక్స్ఎస్ఆర్ 155 బైక్, దాని రెట్రో-మోడ్రన్ డిజైన్‌తో మంచి ఆదరణ పొందింది. ఇదే బైక్ భారత మార్కెట్లో విడుదలైతే, 150సీసీ సెగ్మెంట్లో యమహా ఓ కొత్త విభాగాన్ని ప్రారంభించినట్లు అవుతుంది. సిటీ మరియు హైవే కమ్యూటింగ్ రెండింటికీ అనుకూలంహా ఉండేలా యమహా కొత్త ఎక్స్ఎస్ఆర్ 155 మోటార్‌సైకిల్‌ను తయారు చేసింది.