ఆటమ్ 1.0 ఎలక్ట్రిక్ బైక్ డిజైన్‌కి పేటెంట్ మంజూరు, ధర రూ.55,000 మాత్రమే!

ఆటమ్ 1.0 ఎలక్ట్రిక్ బైక్‍‌ను కంపెనీ అక్టోబర్ 5, 2020వ తేదీన భారత మార్కెట్లో విడుదల చేసింది. ఈ మోడల్ కోసం ఇప్పటి వరకూ 850 బుకింగ్స్ వచ్చినట్లు కంపెనీ తెలిపింది. దేశీయ విపణిలో ఈ ఎలక్ట్రిక్ బైక్ ధర రూ.55,000 లుగా ఉంది.

కంపెనీ ఈ ఎలక్ట్రిక్ బైక్‌ను పాతకాలపు కేఫ్-రేసర్ స్టైల్‌లో డిజైన్ చేసింది. దీని డిజైన్ చాలా సింపుల్‌గా, మినిమలిస్టిక్‌గా ఉంటుంది. దీనిని టీనేజర్లు, యువకులు వయోజనలు వంటి అన్ని వర్గాల కస్టమర్లను దృష్టిలో ఉంచుకొని తయారు చేశారు.

ఆటమ్ 1.0 ఎలక్ట్రిక్ బైక్‍‌లో బెస్ట్-ఇన్-క్లాస్ 14-లీటర్ స్టోరేజ్ కెపాసిటీ ట్యాంక్ ఉంటుందని మరియు స్పోర్టియర్ రైడింగ్ కోసం ఇందులో లో-స్లంగ్ హ్యాండిల్ బార్ ఉంటుందని ఆటమ్మొబైల్స్ ప్రైవేట్ లిమిటెడ్ లిమిటెడ్ వ్యవస్థాపకుడు మరియు సీఈఓ వంశీ గడ్డం తెలిపారు.

ఆటమ్ 1.0 ఎలక్ట్రిక్ మోటార్‌సైకిల్‌లో 48 వోల్ట్ 250 వాట్ ఎలక్ట్రిక్ మోటారును అమర్చబడి ఉంటుంది. ఇది పోర్టబుల్ లిథియం-అయాన్ బ్యాటరీ ప్యాక్‌తో పనిచేస్తుంది. ఇందులోని ఎలక్ట్రిక్ మోటార్ పూర్తి ఛార్జ్‌పై గరిష్టంగా 100 కిలోమీటర్ల పరిధిని అందిస్తుందని కంపెనీ పేర్కొంది.

ఈ ఎలక్ట్రిక్ మోటార్‌సైకిల్ యొక్క గరిష్టం వేగం గంటకు 25 కిలోమీటర్లు. ఈ మోటార్‌సైకిల్‌లోని లిథియం-అయాన్ బ్యాటరీ పూర్తిగా ఛార్జ్ చేయడానికి 4 గంటలు పడుతుందని, దీనిని స్టాండర్డ్ 3-పిన్ సాకెట్ ఉపయోగించి ఎక్కడైనా ఛార్జ్ చేసుకోవచ్చని కంపెనీ తెలిపింది.

ఆటమ్ 1.0 ఎలక్ట్రిక్ బైక్‌లోని బ్యాటరీ ఫుల్ చార్జ్ కోసం కేవలం 1 యూనిట్ విద్యుత్‌ను మాత్రమే మాత్రమే వినియోగిస్తుంది. అంటే, దీనిపై సగటున 100 కిలోమీటర్లకు కేవలం 7 నుండి 10 రూపాయల వరకూ మాత్రమే ఖర్చు అవుతుంది.

ఈ బైక్ చూడటానికి సింపుల్‌గా ఉన్నప్పటికీ, ఇందులో అనేక ఫీచర్లు ఉన్నాయి. ఎల్‌ఈడి హెడ్‌ల్యాంప్స్, ఎల్‌ఈడి టెయిల్ లైట్స్, ఎల్‌ఈడి టర్న్ ఇండికేటర్స్, సౌకర్యవంతమైన సింగిల్ పీస్ సీట్, పెద్ద టైర్లు, బెస్ట్-ఇన్-క్లాస్ గ్రౌండ్ క్లియరెన్స్ (280 మి.మీ) ఇన్‌స్ట్రుమెంట్ కన్సోల్ కోసం డిజిటల్ డిస్‌ప్లే మొదలైన ఫీచర్లు ఇందులో ఉన్నాయి.

ఆటమ్ 1.0 ఎలక్ట్రిక్ బైక్‌ ఇంటర్నేషనల్ సెంటర్ ఫర్ ఆటోమోటివ్ టెక్నాలజీ (ఐసిఎటి) ద్వారా లో-స్పీడ్ ఎలక్ట్రిక్ టూవీలర్‌గా ధృవీకరించబడింది. ఈ బైక్‌కు రిజిస్ట్రేషన్ అవసరం లేదు. అంతేకాదు దీనిని నడపటానికి రైడర్‌కు లైసెన్స్ కూడా అవసరం ఉండదు.