పెరిగిన బజాజ్ డొమినార్ బైక్స్ ధరలు; ఏయే మోడల్‌పై ఎంతంటే..

బజాజ్ డొమినార్ 250 మోటార్‌సైకిల్ ధర రూ.2003 పెరిగి రూ.1.65 లక్షల నుండి రూ.1.67 లక్షలకు చేరుకుంది. ఇకపోతే బజాజ్ డొమినార్ 400 మోటార్‌సైకిల్ ధర రూ.1997 పెరిగి రూ.1.97 లక్షల నుండి రూ.1.99 లక్షలకు చేరుకుంది (అన్ని ధరలు ఎక్స్-షోరూమ్, ఢిల్లీ).

బజాజ్ ఆటో తమ డొమినార్ మోడళ్ల ధరలను పెంచడం ఇదేం మొదటిసారి కాదు. గత 2019లో బజాజ్ డొమినార్ బిఎస్6 వెర్షన్ మోటార్‌సైకిళ్లు మార్కెట్లో విడుదలైనప్పటి నుండి ఇప్పటి వరకూ వీటి ధరలు సుమారు రూ.27,000 వరకూ పెరిగాయి.

బజాజ్ డొమినార్ 250 మోటార్‌సైకిల్‌లో 248సిసి సింగిల్ సిలిండర్ లిక్విడ్-కూల్డ్ ఇంజన్‌ను ఉపయోగించారు. ఈ ఇంజన్ గరిష్టంగా 25 బిహెచ్‌పి పవర్‌ను మరియు 23.5 ఎన్ఎమ్ టార్క్‌ను ఉత్పత్తి చేస్తుంది. ఈ ఇంజన్ సిక్స్-స్పీడ్ గేర్‌బాక్స్‌తో స్లిప్-అసిస్టెడ్ క్లచ్‌తో జతచేయబడి ఉంటుంది.

ఇక డొమినార్ 400 విషయానికి వస్తే, ఈ మోటార్‌సైకిల్‌లో 373సిసి సింగిల్ సిలిండర్ లిక్విడ్-కూల్డ్ ఇంజన్‌ను ఉపయోగించారు. ఈ ఇంజన్ గరిష్టంగా 39.4 బిహెచ్‌పి పవర్‌ను మరియు 35 ఎన్ఎమ్ టార్క్‌ను ఉత్పత్తి చేస్తుంది. ఈ ఇంజన్ కూడా సిక్స్-స్పీడ్ గేర్‌బాక్స్‌తో స్లిప్-అసిస్టెడ్ క్లచ్‌తో జతచేయబడి ఉంటుంది.

ఈ రెండు మోటార్‌సైకిళ్లలో ప్రధానంగా ఇంజన్లలో మార్పు మినహా మిగిలిన మెకానికల్ హార్డ్‌వేర్ మరియు డిజైన్‌లోని చాలా అంశాలు ఒకేలా ఉంటాయి. ఇందులో ఆల్ ఎల్‌ఈడి లైటింగ్, ఫుల్-డిజిటల్ ఇన్‌స్ట్రుమెంట్ క్లస్టర్, ట్విన్-బారెల్ ఎగ్జాస్ట్, సింగిల్-పీస్ హ్యాండిల్ బార్, డైమండ్-కట్ అల్లాయ్ వీల్స్, 13-లీటర్ల ఫ్యూయల్ ట్యాంక్, సెకండరీ డిస్‌ప్లే, స్ప్లిట్ సీట్స్ వంటి ఫీచర్లు ఉన్నాయి.

బజాజ్ డొమినార్ 400 మోటార్‌సైకిల్‌తో పోటీపడే కెటిఎమ్ డ్యూక్ 390 ధర రూ.2.70 లక్షలు (ఎక్స్-షోరూమ్) నుండి ప్రారంభమవుతుంది. ఈ రెండు మోడళ్ల మధ్య దాదాపు రూ.70,000 ధరల వ్యత్యాసం ఉంది.

అలాగే, బజాజ్ డొమినార్ 250 మోటార్‌సైకిల్‌తో పోటీపడే కెటిఎమ్ డ్యూక్ 250 మోడల ధర రూ.2.17, లక్షలు (ఎక్స్-షోరూమ్) నుండి ప్రారంభమవుతుంది. ఈ రెండు మోడళ్ల మధ్య దాదాపు రూ.50,000 ధరల వ్యత్యాసం ఉంది.

బజాజ్ ఆటో కేవలం డొమినార్ బైక్స్ ధరలనే కాకుండా, మొత్తం తమ మోటారుసైకిల్ లైనప్‌లోని అన్ని మోడళ్ల ధరలను కూడా పెంచింది. జనవరి 2021లో తయారు చేయబడి మరియు విక్రయించబడే అన్ని మోటార్‌సైకిళ్లకు ఈ కొత్త ధరలు వర్తిస్తాయని కంపెనీ పేర్కొంది.