దక్షిణ భారతదేశంలో సరికొత్త రికార్డ్ సృష్టించిన హోండా టూవీలర్స్

అమ్మకాల పరంగా, హోండా దేశంలోని దక్షిణ ప్రాంతంలో నంబర్ వన్ టూవీలర్ బ్రాండ్‌గా కొనసాగుతున్నట్లు కంపెనీ ప్రకటించింది. ఇందులో కర్ణాటక, తమిళనాడు, కేరళ, ఆంధ్రప్రదేశ్, తెలంగాణ, పుదుచ్చేరి మరియు అండమాన్ కేంద్రపాలిత ప్రాంతాలు ఉన్నాయని కంపెనీ తెలిపింది.

దక్షిణ భారతదేశంలో 1.5 కోట్ల అమ్మకాల మైలురాయిని సాధించడానికి కంపెనీకి 20 సంవత్సరాలు పట్టిందని హోండా టూ-వీలర్ ఇండియా ఓ ప్రకటనలో పేర్కొంది. వీటిలో మొదటి 75 లక్షల అమ్మకాలు సాధించడానికి 15 సంవత్సరాలు పట్టిందని (2001 - 2016) హోండా తెలిపింది.

కాగా, తాజా 75 లక్షల అమ్మకాలను కేవలం 5 సంవత్సరాల్లోనే (2017 - 2021) సాధించగలిగామని, ఇతర మార్కెట్లతో పోల్చుకుంటే దక్షిణ ప్రాంతంలో హోండా ఉత్పత్తుల అమ్మకాలు 3 రెట్లు వేగంగా పెరుగుదలను నమోదు చేశాయని కంపెనీ పేర్కొంది.

దేశంలో హోండా బ్రాండ్ మొత్తం అమ్మకాలకు దక్షిణ భారతదేశపు మార్కెట్లు అతిపెద్ద మార్కెట్‌గా అవతరించాయని, ఈ మార్కెట్లలో హోండా ఆక్టివా మరియు డియో స్కూటర్ మోడళ్లు అత్యధిక డిమాండ్‌ను కలిగి ఉన్నాయని హెచ్ఎమ్ఎస్ఐ ప్రకటించింది.

హోండా బ్రాండ్‌కు ఈ మార్కెట్లలో దేశీయ బైక్ మరియు స్కూటర్ లైనప్‌తో పాటు, ప్రీమియం (బిగ్‌వింగ్) డీలర్‌షిప్‌లు కూడా ఉన్నాయి. ప్రస్తుతం ఈ ప్రాంతాల్లో హోండా బిగ్‌వింగ్ టాప్‌లైన్ షోరూమ్‌ను మరియు 5 బిగ్‌వింగ్ షోరూమ్‌లను నిర్వహిస్తోంది. ఇవి దేశంలో 300 సిసి - 1800 సిసి మధ్యలో ఉన్న ప్రీమియం ద్విచక్ర వాహనాలను ప్రత్యేకంగా విక్రయిస్తున్నాయి.

హోండా టూవీలర్స్‌కి సంబంధించిన ఇటీవలి వార్తలను గమనిస్తే, కంపెనీ తమ యాక్టివా స్కూటర్ కొనుగోలుదారుల కోసం ప్రత్యేక ఆఫర్లను ప్రకటించింది. హోండా యాక్టివా 6జి స్కూటర్ కొనుగోలుపై భారీ ఆఫర్లను మరియు 100 శాతం ఫైనాన్స్ ఆప్షన్‌ను అందిస్తోంది.

అంతేకాకుండా, హోండా ఇప్పుడు ఈ స్కూటర్‌ను అతి తక్కువ డౌన్ పేమెంట్ వద్ద కేవలం రూ.2,499 లకే అందిస్తోంది. యాక్టివా 6 జి కొనుగోలు చేసే వినియోగదారులు డెబిట్ లేదా క్రెడిట్ కార్డు ఈఎమ్ఐ ద్వారా చెల్లింపులు చేస్తే, కంపెనీ రూ.5,000 వరకూ క్యాష్‌బ్యాక్‌ను కూడా అందిస్తోంది. - మరిన్ని వివరాల కోసం ఈ లింకుపై క్లిక్ చేయండి.