ఒక్క చార్జ్‌తో 100 కి.మీ ప్రయాణించే ఎలక్ట్రిక్ సైకిల్; ధర రూ.42,000 మాత్రమే!

నెక్స్‌జు మొబిలిటీ విడుదల చేసిన ఈ స్టాండర్డ్ వెర్షన్ ఎలక్ట్రిక్ సైకిల్ యొక్క ఎక్స్-షోరూమ్ ధర రూ.42,000గా ఉంది. కాగా, ఇందులో కార్గో వేరియంట్‌ను కంపెనీ అదే ధరతో విడుదల చేసింది. కార్గో వేరియంట్ కావాలనుకునే వారి కోసం కంపెనీ వివిధ రకాల కస్టమైజబల్ క్యారియర్ ఆప్షన్లను కూడా అందిస్తోంది.

కంపెనీ పేర్కొన్న సమాచారం ప్రకారం, కొత్త నెక్స్‌జు రోడ్‌లార్క్ కార్గో వెర్షన్ గరిష్టంగా 50 కిలోల వరకు బరువును మోయగలదు. ఈ వాహనాన్ని నడపడానికి డ్రైవింగ్ లైసెన్స్ లేదా రిజిస్ట్రేషన్ కూడా అవసరం లేదు. ఇదొక లో-స్పీడ్ ఎలక్ట్రిక్ సైకిల్. ఈ సైకిల్ గరిష్టంగా గంటకు 25 కిలోమీటర్ల వేగంతో పరుగులు తీస్తుంది.

కస్టమర్ అవసరాలకు అనుగుణంగా నెక్స్‌జు రోడ్‌లార్క్ కార్గో వేరియంట్‌ను మార్చుకోవచ్చు. వినియోగదారుల అవసరాలు మరియు వారి ప్రాధాన్యతలకు అనుగుణంగా కంపెనీ అనేక రకాల క్యారియర్ ఆప్షన్లను అందిస్తోంది. వీటిలో బాస్కెట్స్, బ్యాగ్స్ మరియు బాక్సులు కూడా ఉన్నాయి.

నెక్స్‌జు రోడ్‌లార్క్ కార్గో డ్యూయల్ బ్యాటరీలతో పనిచేస్తుంది. ఇవి రెండూ మొత్తం రైడ్ రేంజ్‌ను మెరుగుపరచడంలో సహకరిస్తాయి. ఈ రెండు బ్యాటరీలలో ఒకటి 5.2 ఆంపియర్ సామర్థ్యం కలిగిన లిథియం-అయాన్ బ్యాటరీ. దీనిని శాశ్వతంగా సైకిల్‌కే అమర్చబడి ఉంటుంది.

కాగా, ఈ రెండు బ్యాటరీలలో మరొకటి 8.7 ఆంపియర్ లిథియం-అయాన్ బ్యాటరీ. దీనిని సైకిల్ నుండి విడిగా వేరు చేసి, చార్జ్ చేసుకునే సౌలభ్యం ఉంటుంది. ఈ ఎలక్ట్రిక్ సైకిల్ 250 వాట్ 36 వోల్ట్ ఎలక్ట్రిక్ మోటారుతో పనిచేస్తుంది. ఈ మోటార్ సాయంతో ఈ సైకిల్ గరిష్టంగా 25 కిలోమీటర్ల వేగాన్ని సాధిస్తుంది.

నెక్స్‌జు రోడ్‌లార్క్ కార్గో ఎలక్ట్రిక్ సైకిల్‌లోని ఇతర ఫీచర్లను గమనిస్తే, ఇందులో స్టీల్ ఫ్రేమ్, ఫుల్ ఫెండర్లు, లైట్లు మరియు డ్యూయల్ డిస్క్ బ్రేక్‌లు మొదలైనవి ఉన్నాయి. నెక్సస్ మొబిలిటీ వినియోగదారులు ఇప్పుడు భారతదేశం అంతటా ఉన్న డీలర్‌షిప్‌లలో కానీ లేదా బ్రాండ్ యొక్క అధికారిక వెబ్‌సైట్ ద్వారా ఈ ఎలక్ట్రిక్ కార్గో సైకిల్‌ను కొనుగోలు చేయవచ్చు.

ఈ సైకిల్‌లోని రెండు బ్యాటరీలు పూర్తిగా ఛార్జ్ కావడానికి సుమారు 3 నుండి 4 గంటలు పడుతుందని కంపెనీ తెలిపింది. ఈ మోడల్‌ను కోల్డ్-రోల్డ్ స్టీల్ చాస్సిస్‌పై నిర్మించారు. ఫలితంగా, ఇది ధృడమైన నిర్మాణాన్ని కలిగి ఉంటుంది.

నెక్స్‌జు రాడ్‌లార్క్ కార్గో ఎలక్ట్రిక్ సైకిల్ ముందు భాగంలో టెలిస్కోపిక్ సస్పెన్షన్ మరియు వెనుక భాగంలో ఒక స్వింగార్మ్ ఫ్రేమ్ ఉంటుంది. ఈ సైకిల్‌పై బ్రేకింగ్ సిస్టమ్‌ను గమనిస్తే, ముందు మరియు వెనుక వైపు డిస్క్ బ్రేక్‌లు ఉంటాయి.

రాడ్‌లార్క్ కార్గోలో డిజిటల్ డిస్ప్లేతో పాటు ఫ్లాట్ హ్యాండిల్‌బార్ కూడా ఉంటుంది. ఇది ఛార్జ్ శాతం, ప్రయాణించగలిగే దూరం మరియు అనేక ఇతర వివరాలను ప్రదర్శిస్తుంది. మార్కెట్లో ఈ కార్గో సైకిల్ ధర రూ.42,000 (ఎక్స్-షోరూమ్)గా ఉంది.