అమ్మకాల్లో కొత్త మైలురాయిని చేరుకున్న టీవీఎస్ ఐక్యూబ్ ఎలక్ట్రిక్ స్కూటర్!

భారత మార్కెట్లో టీవీఎస్ ఐక్యూబ్ ఎలక్ట్రిక్ స్కూటర్ ప్రవేశించినప్పటి నుండి ఇప్పటి వరకూ దీని అమ్మకాలు 1000 యూనిట్లను దాటినట్లు కంపెనీ ప్రకటించింది. గడచిన మార్చి నెలలోనే ఈ స్కూటర్ అమ్మకాలు 355 యూనిట్లుగా నమోదయ్యాయని కంపెనీ వివరించింది.

ప్రస్తుతం టీవీఎస్ ఐక్యూబ్ ఎలక్ట్రిక్ స్కూటర్ కేవలం బెంగుళూరు మరియు ఢిల్లీ మార్కెట్లలో మాత్రమే అమ్ముడవుతోంది. కాగా, ఈ ఎలక్ట్రిక్ స్కూటర్‌ను దేశంలోని మరిన్ని ఇతర మార్కెట్లలో విడుదల చేయాలని కంపెనీ ప్లాన్ చేస్తోంది. ఢిల్లీ మార్కెట్లో టీవీఎస్ ఐక్యూబ్ ఎలక్ట్రిక్ స్కూటర్ ఆన్-రోడ్ ధర రూ.1.08 లక్షలుగా ఉంది.

టీవీఎస్ ఐక్యూబ్ ఎలక్ట్రిక్ స్కూటర్‌ను కొనుగోలు చేసే కస్టమర్లు ఫేమ్ 2 పథకం క్రింద ఎలక్ట్రిక్ వాహనాలపై కేంద్ర ప్రభుత్వం అందించే రాయితీలను పొందవచ్చు. ఈ స్కూటర్‌ను బుక్ చేసుకోవాలనుకునే వారు ఆన్‌లైన్‌లో కానీ లేదా డీలర్‌షిప్‌లలో కానీ రూ.5,000 చెల్లించి బుక్ చేసుకోవచ్చు.

ఇటీవలి కాలంలో భారత మార్కెట్లో ఎలక్ట్రిక్ స్కూటర్ల డిమాండ్ గణనీయంగా పెరగడంతో టీవీఎస్ ఐక్యూబ్ అమ్మకాలు కూడా క్రమంగా పెరుగుతున్నాయి. ప్రీమియం ఎలక్ట్రిక్ స్కూటర్ విభాగంలో విడుదలైన టీవీఎస్ ఐక్యూబ్, ఈ విభాగంలో బజాజ్ చేతక్ ఎలక్ట్రిక్ మరియు ఏథర్ 450ఎక్స్ వంటి ఎలక్ట్రిక్ స్కూటర్లకు పోటీగా నిలుస్తుంది.

టీవీఎస్ ఐక్యూబ్ ఎలక్ట్రిక్ స్కూటర్ 4.4 కిలోవాట్ల హబ్-మౌంటెడ్ ఎలక్ట్రిక్ మోటార్ ఉంటుంది. ఇందులో అమర్చిన 3 లిథియం అయాన్ బ్యాటరీ ప్యాక్‌లతో ఈ ఎలక్ట్రిక్ మోటార్ పనిచేస్తుంది. ఈ స్కూటర్ గరిష్ట వేగం గంటకు 80 కిలోమీటర్లు. పూర్తి చార్జ్‌పై ఈ స్కూటర్ 80 కిలోమీటర్ల రేంజ్‌ను (ఎకో మోడ్‌లో) ఆఫర్ చేస్తుంది.

టీవీఎస్ ఐక్యూబ్ ఎలక్ట్రిక్ స్కూటర్ కేవలం 4.2 సెకన్లలో గంటకు 0-40 కిలోమీటర్ల వేగాన్ని చేరుకుంటుంది. కేవలం నాలుగు గంటల వ్యవధిలోనే ఇందులోని బ్యాటరీలను 0 నుండి 75 శాతం వరకు ఛార్జ్ చేసుకోవచ్చని కంపెనీ చెబుతోంది. పూర్తి ఛార్జ్ చేయటానికి ఐదు గంటలకు పైగా సమయం పడుతుంది.

ఈ ఎలక్ట్రిక్ స్కూటర్ బ్రాండ్ యొక్క లేటెస్ట్ స్మార్ట్ కనెక్ట్ టెక్నాలజీతో లభిస్తుంది. దీని సాయంతో స్కూటర్‌కు సంబంధించిన అనేక విషయాలను స్మార్ట్ ఫోన్ ద్వారా తెలుసుకోవటం మరియు కంట్రోల్ చేయటం చేయవచ్చు.

ఐక్యూబ్ ఎలక్ట్రిక్ స్కూటర్‌లో ఎల్‌ఈడీ హెడ్‌ల్యాంప్‌లు, ఎల్‌ఈడీ టెయిల్ లైట్లు, పెద్ద టీఎఫ్‌టీ ఇన్‌స్ట్రుమెంట్ కన్సోల్, క్యూ-పార్క్ అసిస్ట్ మరియు రీజెనరేటివ్ బ్రేకింగ్ సిస్టమ్ వంటి ఫీచర్లు కూడా ఉన్నాయి.