Greta Glide ఎలక్ట్రిక్ స్కూటర్: ధర తక్కువ & రేంజ్ అదుర్స్

భారతీయ విఫణిలో విడుదలైన కొత్త గ్రెటా గ్లైడ్‌ ఎలక్ట్రిక్ స్కూటర్ ధర రూ. 80,000 (ఎక్స్-షోరూమ్). కంపెనీ ఇప్పుడు ఈ స్కూటర్ యొక్క బుకింగ్స్ కూడా ప్రారంభించింది. అంతే కాకుండా ఈ స్కూటర్ కొనుగోలుపైన కొంత తగ్గింపులను కూడా అందించనున్నట్లు ప్రకటించింది.

ఈ కొత్త ఎలక్ట్రిక్ స్కూటర్ కొనాలనుకునే వినియోగదారులు ఆన్‌లైన్ లో రో. 6,000 చెల్లించి బుక్ చేసుకోవచ్చు. అయితే డీలర్‌షిప్‌ల ద్వారా ఈ ఎలక్ట్రిక్ స్కూటర్ బుక్ చేస్తే బుకింగ్ ధరలో కూడా రూ. 2,000 తగ్గింపు లభిస్తుంది. కావున కొనాలనుకునే కస్టమర్లు ఈ అవకాశం ఉపయోగించుకోవచ్చు.

గ్రెటా గ్లైడ్ ఎలక్ట్రిక్ స్కూటర్ చూడటానికి చాలా సింపుల్ గా ఉంటుంది. కానీ చాలా ఆకర్షణీయంగా ఉంటుంది. ఈ ఎలక్ట్రిక్ స్కూటర్ లిథియం-అయాన్ బ్యాటరీతో శక్తిని పొందుతుంది. ఈ ఎలక్ట్రిక్ స్కూటర్ ని కేవలం 2.5 గంటల వ్యవధిలో 0 నుంచి 100% వరకు ఛార్జ్ చేయవచ్చు. కావున ఇది వాహన వినియోగదారులు సమయాన్ని కూడా ఆదా చేస్తుంది.

గ్రెటా గ్లైడ్ ఎలక్ట్రిక్ స్కూటర్ అనేక ఆధునిక ఫీచర్స్ తో పరిచయం చేయబడింది. ఈ కొత్త స్కూటర్ మార్కెట్లో 7 విభిన్న రంగులలో విక్రయానికి అందుబాటులో ఉంది. ఈ కలర్స్ అన్నీ కూడా చాలా అకర్షణీయంగా ఉంటాయి. ఎక్కువ కలర్ ఆప్సన్స్ అందుబటులో ఉండటం వల్ల మీకు నచ్చిన కలర్ ఎంచుకోవడానికి అవకాశం ఉంటుంది.

ఈ కొత్త ఎలక్ట్రిక్ స్కూటర్‌లో ఎల్ఈడీ హెడ్‌లైట్, టెయిల్ లైట్ మరియు LED DRL వంటివి ఉన్నాయి. ఇది మధ్యలో డిజిటల్ ఇన్‌స్ట్రుమెంట్ క్లస్టర్‌తో బైక్ లాంటి స్ట్రెయిట్ హ్యాండిల్‌బార్‌ను కలిగి ఉంది. ఈ స్కూటర్‌లో DRL, EBS మరియు స్మార్ట్ షిఫ్ట్ వంటి ఫీచర్లు కూడా ఉన్నాయి. ఇవన్నీ కూడా వినియోగదారులకు చాలా అనుకూలంగా ఉంటాయి.

గ్రెటా గ్లైడ్ ఎలక్ట్రిక్ స్కూటర్ ఆధునిక ఫీచర్ అయిన రివర్స్ మోడ్‌తో పాటు మూడు-స్పీడ్ మోడ్‌ను కూడా పొందుతుంది. అంతే కాకూండా ఇందులో ఎల్ఈడీ డిజిటల్ ఇన్స్ట్రుమెంట్ క్లస్టర్, కీలెస్ స్టార్ట్ మరియు ఫ్రంట్ గ్లోవ్ బాక్స్ వంటి వాటిని కూడా పొందుతుంది.

కంపెనీ ఈ స్కూటర్‌ను సురక్షితంగా ఉంచడానికి మరియు దొంగతనాల భారీ నుంచి కాపాడటానికి, ఫైండ్ మై వెహికల్ అలారం మరియు యాంటీ థెఫ్ట్ అలారం వంటి ఫీచర్లను కూడా అందించింది. ఈ ఎలక్ట్రిక్ స్కూటర్‌లో ఫ్రంట్ గ్లోవ్ బాక్స్, పెద్ద లెగ్‌రూమ్, లెదర్ సీట్ కవర్ మరియు మొబైల్ ఫోన్ ఛార్జింగ్ కోసం USB పోర్ట్ కూడా ఉన్నాయి.

గ్రేటా గ్లైడ్ ఎలక్ట్రిక్ స్కూటర్ 3.5-ఇంచెస్ వెడల్పు గల ట్యూబ్‌లెస్ టైర్‌తో వస్తుంది, కావున ఇది రహదారిపై మెరుగైన పట్టును అందించగలదు. స్కూటర్ ముందువైపు టెలిస్కోపిక్ ఫోర్కులు మరియు వెనుకవైపు డ్యూయల్ హైడ్రాలిక్ సెల్ షాకర్లను పొందుతుంది. బ్రేకింగ్‌ను మెరుగుపరచడానికి కంపెనీ ఈ స్కూటర్ యొక్క రెండు చక్రాలకు డిస్క్ బ్రేక్‌లను అందించింది.

కంపెనీ ఈ ఎలక్ట్రిక్ స్కూటర్‌ను విభిన్న శ్రేణి బ్యాటరీ ప్యాక్‌లతో అందిస్తోంది. కావున ఇవన్నీ ఈ ఎలక్ట్రిక్ స్కూటర్ యొక్క పరిధిని పెంచడంలో సహాయపడతాయి. ఇందులో 60 కిలోమీటర్ల పరిధికి వి2 48వి-24యాంపియర్ బ్యాటరీ ప్యాక్ మరియు 100 కిలోమీటర్ల పరిధి కోసం వి3 48వి-30యాంపియర్ బ్యాటరీ ప్యాక్ ఉన్నాయి. ఇవి మంచి పనితీరుని మరియు అద్భుతమైన పర్ఫామెన్స్ అందిస్తుంది.

ప్రస్తుతం భారతీయ మార్కెట్లో ఎలక్ట్రిక్ వాహన వినియోగాలను పెంచడానికి కేంద్ర మరియు రాష్ట్ర ప్రభుత్వాలు చాలా వరకు ప్రోత్సహిస్తున్నాయి. ఇందులో భాగంగానే ఫేమ్-2 స్కీమ్ మరియు రాష్ట్ర ప్రభుత్వాలు అందించే రాయితీలు అందుబటులో ఉన్నాయి. కావున ఎలక్ట్రిక్ వాహన కొనుగోలుదారులు ఇప్పుడు ఈ సదుపాయాలను వినియోగించుకోవచ్చు.