మార్కెట్‌లో దూసుకుపోతున్న ట్రయంఫ్‌ బైక్‌.. బుకింగ్‌ ఫీజుతో పాటు ధర కూడా పెంపు..

బజాజ్‌ భాగస్వామ్యంతో ట్రయంఫ్ మోటార్‌సైకిల్స్ ఇటీవల భారతీయ మార్కెట్లో ఎంతో ఆసక్తిగా ఎదురుచూస్తున్న ట్రయంఫ్ స్పీడ్ 400 బైక్‌ను విడుదల చేసింది. విడుదలైన కొద్ది రోజుల్లోనే, ట్రయంఫ్ స్పీడ్ 400 10,000 బుకింగ్‌లతో భారతీయ మార్కెట్లో భారీ సంచలనం సృష్టించింది. దేశంలో బజాజ్ వీటిని తయారు చేసి విక్రయిస్తుంది.

భారతీయ మార్కెట్‌లో ట్రయంఫ్ స్పీడ్ 400 ఎక్స్ షోరూమ్ ధర రూ. 2.33 లక్షలుగా ఉంది. ట్రయంఫ్ స్పీడ్ 400 బైక్‌ను కొనుగోలు చేయాలనుకునే వినియోగదారులు ట్రయంఫ్ ఇండియా అధికారిక సైట్ ద్వారా బుక్ చేసుకునే వెసులుబాటు ఉంది. అయితే స్క్రాంబ్లర్‌ 400X బైక్‌ విక్రయాలు అక్టోబర్‌ నుంచి ప్రారంభమవుతాయి. ఈ దశలో ట్రయంఫ్ స్పీడ్ 400 బైక్ బుకింగ్ ఫీజును పెంచినట్లు సమాచారం.

గతంలో ట్రయంఫ్‌ స్పీడ్ 400 బైక్ కోసం ప్రీ రిజిస్ట్రేషన్లు కేవలం రూ. 2 వేల ఫీజు ఉండగా.. ఇప్పుడు ఫీజు రూ. 10 వేలకు పెంచినట్లు సమాచారం. ట్రయంఫ్ బైక్ ప్రీ రిజిస్ట్రేషన్ ఫీజును పెంచడమే కాకుండా, దాని ఎక్స్ షోరూమ్ ధరను కూడా పెంచింది. అయితే మీరు బైక్‌ బుక్‌ చేసుకున్న తర్వాత రద్దు చేసుకోవాలనుకుంటే కంపెనీ అడ్వాన్స్‌ మొత్తం రీఫండ్‌ చేస్తుంది.

మొదటగా బుక్‌ చేసుకున్న 10 వేల కస్టమర్లకు రూ. 2.23 లక్షల ధరలో ఆఫర్‌ ప్రకటించింది. అయితే ట్రయంఫ్‌ స్పీడ్‌ 400 బైక్‌ బుకింగ్‌లు పదివేలకు చేరుకోవడంతో ఆఫర్‌ ధరను నిలిపివేసింది. ఇప్పుడు మొదట ప్రకటించిన ధరతో పాటు బుకింగ్‌ ఫీజును పెంచింది. ఇప్పుడు ట్రయంఫ్ స్పీడ్‌ 400 బైక్‌ ధర రూ. 2.33 లక్షలు కాగా, బుకింగ్‌ ఫీజు ధర రూ. 10 వేలకు పెంచింది.

కొత్త ట్రయంఫ్ స్పీడ్ 400 బైక్ ఇంజిన్‌ విషయానికొస్తే ఇందులో 398.15 cc, లిక్విడ్ కూల్డ్, 4-వాల్వ్, DOHC, ఓవర్ స్క్వేర్ ఇంజిన్‌తో వస్తుంది. ఈ ఇంజిన్ 8,000 rpm వద్ద 39.5 bhp మరియు 6,500 rpm వద్ద 37.5 Nm టార్క్‌ను ఉత్పత్తి చేస్తుంది. ఈ ఇంజిన్ కూడా స్పీడ్ గేర్‌బాక్స్‌తో జతచేయబడి ఉంటుంది.

కొత్త ట్రయంఫ్ స్పీడ్ 400 బైక్ దాని 'టియర్ డ్రాప్' ఆకారపు ఇంధన ట్యాంక్ మరియు LED హెడ్‌ల్యాంప్‌లు, LED టర్న్ ఇండికేటర్‌లు, వెనుక వీక్షణ అద్దాలు మరియు LED టెయిల్ ల్యాంప్స్ వంటి వృత్తాకార డిజైన్ అంశాలతో ఆకర్షణీయమైన నియో రెట్రో థీమ్‌ను కలిగి ఉంది. కొత్త ట్రయంఫ్‌ స్పీడ్‌ 400 బైక్‌ ఆకర్షణీయ డిజైన్‌ను కలిగి ఉంది.

ఇక సస్పెన్షన్ విషయానికొస్తే, ట్రయంఫ్ స్పీడ్ 400 బైక్‌లో బోల్ట్ ఆన్ రియర్ సబ్‌ఫ్రేమ్ మరియు ట్విన్ సైడ్ అల్యూమినియం స్వింగార్మ్‌తో ఫ్రేమ్ ఉంది. ఇక సస్పెన్షన్ సెటప్‌ను పరిశీలిస్తే, ఇది ముందు వైపున 43mm USD ఫోర్కులు మరియు వెనుక భాగంలో గ్యాస్ ఛార్జ్డ్ మోనోషాక్‌తో రూపుదిద్దుకుంది.

ట్రయంఫ్ స్పీడ్ 400 బైక్ బ్రేకింగ్ సిస్టమ్‌ గురించి చెప్పాలంటే ముందు భాగంలో 300 mm డిస్క్ బ్రేక్ మరియు వెనుక 230 mm డిస్క్ బ్రేక్ కలిగి ఉంది. అదనపు భద్రత కోసం బైక్‌లో డ్యూయల్ ఛానల్ ABS ను జత చేసింది.

ట్రయంఫ్ స్పీడ్ 400, స్క్రాంబ్లర్ 400 X బైక్‌లను మహారాష్ట్రలోని చకన్‌లో బజాజ్‌ ఆటో కొత్తగా నిర్మించిన 'చేతక్ 2' అనే మ్యానుఫ్యాక్చరింగ్ యూనిట్‌లో ఉత్పత్తి చేస్తుంది. ఇప్పటికే ప్లాంట్‌లో 25,000 బైక్‌లు సిద్ధంగా ఉన్నాయి. ట్రయంఫ్ కంపెనీ ఈ రెండు బైక్‌లపై రెండేళ్ల అపరిమిత మైలేజ్ వారంటీని అందిస్తోంది.