ఆ ఎలక్ట్రిక్ మోపెడ్‌ చూసి ఫిదా అయిన ప్రముఖ కంపెనీ సీఈఓ.. త్వరలో కీలక నిర్ణయం

ఆటో మొబైల్ కంపెనీలు క్రమంగా ఈవీ తయారీ రంగంలోకి అడుగుపెడుతున్న విషయం తెలిసిందే. ఈ క్రమంలో ఓ ప్రముఖ కార్ల తయారీ సంస్థ కూడా ఎలక్ట్రిక్ టూ వీలర్ తయారు చేసేందుకు రంగం సిద్ధం చేస్తున్నట్లు సమాచారం. ఇంతకీ ఆ కంపెనీ ఏంటి.. పూర్తి సమాచారం ఈ కథనంలో..

గ్లోబల్ మార్కెట్లో ప్రముఖ కార్ల తయారీ తయారీదారుల్లో మినీ ఆటోమేకర్(Mini Auto Maker) ఒకటి. ఈ కంపెనీ ఇప్పుడు ఎలక్ట్రిక్ టూ వీలర్ల తయారీని ప్రారంభించబోతోందని సమాచారం వెల్లడైంది. కాగా ప్రపంచవ్యాప్తంగా ఎలక్ట్రిక్ ద్విచక్ర వాహనాలకు ప్రజాదరణ పెరుగుతుండగా.. అనేక కార్ల కంపెనీలు ఈ రంగంలోకి అడుగుపెడుతున్నాయి.

ఈ దశలో, మినీ కంపెనీ ఎలక్ట్రిక్ బైక్‌లు మరియు స్కూటర్ల తయారీ, విక్రయ విభాగంలోకి మినీ.. అడుగుపెట్టాలని యోచిస్తున్నట్లు నివేదికలు వెల్లడిస్తున్నాయి. కంపెనీ ఇప్పటికే ఎలక్ట్రిక్ కార్ల ఉత్పత్తిని ప్రారంభించగా.. దీని ఎలక్ట్రిక్ కార్లకు మంచి ఆదరణ లభిస్తోంది. ఇక టూ వీలర్ తయారీ విభాగంలోనూ సత్తా చాటేందుకు యత్నిస్తోంది.

ఎలక్ట్రిక్ కార్ల విభాగంలో సక్సెస్ చూసిన మాదిరిగానే.. ద్విచక్ర వాహనాల వైపు కూడా ప్రజలను ఆకర్షించడానికి, కంపెనీ ఎలక్ట్రిక్ ద్విచక్ర వాహనాల విభాగంలోకి ప్రవేశించాలని చూస్తోంది. ఈ నేపథ్యంలో ఇటీవల, మినీ CEO స్టెఫానీ వర్స్ట్ BMW CE 02 ఎలక్ట్రిక్ ద్విచక్ర వాహనాన్ని నడిపిన వీడియో బయటకు వచ్చింది. ఆ వాహనం సీఈఓను విపరీతంగా ఆకట్టుకుంది.

ఈ దశలోనే మినీ బ్రాండ్‌తో ఎలక్ట్రిక్ ద్విచక్ర వాహనాన్ని తయారు చేయాలనే ఆలోచన అతనికి వచ్చినట్లు సమాచారం. అవును, BMW CE02 పై రైడ్.. మినీ బ్రాండ్ ఎలక్ట్రిక్ ద్విచక్ర వాహనాల ఉత్పత్తిలోకి ప్రవేశించాలనే ఆలోచనకు పునాది వేసింది. కాగా BMW మినీ బ్రాండ్ యొక్క మాతృ సంస్థ అని గమనించాలి.

BMW Motorrad ఈ కంపెనీలో ఒక భాగంగా ఉండగా.. CE02 మరియు CE04 ఎలక్ట్రిక్ ద్విచక్ర వాహనాలు BMW Motorrad క్రింద అమ్మకానికి అందుబాటులో ఉన్నాయి. ఇందులో మినీ సీఈవో..CE02 మోడల్‌ను నడిపారు. ఇది ఎలక్ట్రిక్ మోపెడ్. ఈ వాహనంలో 11 కిలోవాట్ల ఎలక్ట్రిక్ మోటారును ఉపయోగించారు. గరిష్ఠంగా 90 kmph వేగంతో వెళ్తుంది. కేవలం 3 సెకన్లలో 0 నుండి 50 కి.మీ వేగాన్ని అందుకుంటుంది.

BMW CE02 అంత శక్తివంతమైన వాహనంగా పేరు పొందింది. ఈ ఎలక్ట్రిక్ మోపెడ్ ఒక్కసారి ఛార్జింగ్ చేస్తే 90 కి.మీ రేంజ్ ఇస్తుంది. ఈ వాహనంలో ఎల్ఈడీ లైట్లు, కనెక్టివిటీ, నావిగేషన్, డిజిటల్ స్క్రీన్ వంటి ఎన్నో టెక్నికల్ ఫీచర్లను బీఎండబ్ల్యూ మోటోరాడ్ అందిస్తోంది.

CE02 ఎలక్ట్రిక్ మోపెడ్‌లో అత్యుత్తమ డ్రైవింగ్ అనుభవాన్ని అందించడానికి షాక్ అబ్జార్బర్ (వెనుక వైపు) మరియు టెలిస్కోపిక్ సస్పెన్షన్ (ముందు వైపు) ఉన్నాయి. ఇంకా, రెండు చక్రాలకు డిస్క్ బ్రేక్‌లు ఉన్నాయి. ఇది కాకుండా, ఈ వాహనంలో రీజనరేషన్ బ్రేకింగ్ సదుపాయాన్ని కూడా సంస్థ అందించింది.

ముఖ్యంగా, బీఎమ్‌డబ్ల్యూ మోటోరాడ్ ఈ ఎలక్ట్రిక్ మోపెడ్‌ను ఇతర ఎలక్ట్రిక్ స్కూటర్లకు పూర్తి భిన్నంగా రూపొందించింది. దీంతో మినీ కంపెనీ సీఈవీకి ఈ మోపెడ్ అంతగా నచ్చింది. అందుకే మినీ నుంచి కూడా త్వరలో ఇలాంటి ప్రత్యేకమైన లుక్‌తో ఎలక్ట్రిక్ టూ వీలర్‌ను విడుదల చేస్తారని ఆటో నిపుణులు భావిస్తున్నారు.

ఎలక్ట్రిక్ ద్విచక్ర వాహనాలకు భారతదేశంలోనే కాకుండా ప్రపంచవ్యాప్తంగా మంచి ఆదరణ లభిస్తోంది. ఫలితంగా, ప్రముఖ ఆటో మేకర్ బ్రాండ్లు మరియు స్టార్టప్ కంపెనీలు ఎలక్ట్రిక్ ద్విచక్ర వాహనాల అభివృద్ధిలో కీలక పాత్ర పోషిస్తున్నాయి. త్వరలో ఈ జాబితాలో మినీ కూడా చేరనుంది.