ఎన్నో అంచనాల మధ్య లాంచ్ అయిన క్లచ్‌లెస్‌ బైక్‌ TVS Jive.. ఎందుకు ఫెయిల్‌ అయింది.??

కొన్నేళ్ల క్రితం టీవీఎస్ మోటార్స్‌.. జీవ్ బైక్‌ను క్లచ్‌లెస్ బైక్‌గా భారతదేశంలో విక్రయించింది. మార్కెట్‌లోని ఇతర బైక్‌ల కంటే విభిన్నమైన హ్యాండ్లింగ్ కారణంగా ఈ బైక్ ప్రత్యేకంగా ఉన్నా.. ఈ బైక్ ప్రస్తుతం అమ్మకానికి అందుబాటులో లేదు. ఈ బైక్‌ను సంస్థ ఎందుకు నిలిపివేసింది? ఇలాంటి బైక్‌లు ఎందుకు ఇప్పుడు విక్రయంలో లేవు.? పూర్తి సమాచారం ఈ కథనంలో..

ద్విచక్ర వాహనాల సేల్స్‌ పరంగా భారత మార్కెట్‌ చాలా పెద్దది. వాటిలో టీవీఎస్‌ బైక్‌లకు దేశంలో ప్రజాదరణ ఎక్కువగా ఉంటుంది. కాగా కంపెనీ కొన్నేళ్ల క్రితం ద్విచక్ర వాహన విభాగంలో భారీ విప్లవం సృష్టించింది. ప్రస్తుత ద్విచక్ర వాహనాల విభాగంలో, చాలా మంది స్కూటర్‌ను క్లచ్‌లెస్ వాహనంగా భావిస్తారు. కానీ TVS ఇప్పటికే ఇతర గేర్ బైక్‌ల మాదిరిగా క్లచ్ లేని గేర్ బైక్‌ను ప్రవేశపెట్టింది.

ఈ క్లచ్‌లెస్‌ బైక్‌ల గురించి చాలా మందికి తెలియకపోవచ్చు. అయితే TVS Jive తెలిసిన వారికి ఈ బైక్ పేరు తప్పకుండా గుర్తుండిపోతుంది. TVS మోటార్స్ ప్రారంభించిన జీవ్‌.. భారత్‌లో మొట్టమొదటి క్లచ్‌లెస్ బైక్. ఈ బైక్‌ ద్వారా కొత్త రైడర్‌లు క్లచ్‌ని పట్టుకుని, స్లో రిలీజ్ యాక్సిలరేటర్‌ని ఇవ్వడానికి ఇబ్బంది పడాల్సిన అవసరం లేదు. మీరు సులభంగా గేర్ మార్చవచ్చు మరియు బైక్ నడపవచ్చు.

నగరాల్లో సాఫీగా ప్రయాణించే చాలా మందికి ఈ బైక్ ఉపయోగకరంగా ఉండేది. ట్రాఫిక్‌లో నిలబడి బైక్‌ను నడిపే వ్యక్తులు ఈ బైక్‌ను ఎక్కువగా ఇష్టపడేవారు. భారత్ లాంటి దేశాలకు కచ్చితంగా ఇలాంటి బైక్ అవసరమనే అప్పట్లో మార్కెట్‌ వర్గాలు కూడా భావించాయి. దీని వల్ల ఈ టెక్నాలజీతో రకరకాల బైక్‌లను విక్రయించాలనే యోచనలో పలు ఆటో మేకర్లు ఉన్నారు.

టీవీఎస్ ఈ జీవ్ బైక్‌ను క్లచ్‌లెస్ డిమాటిక్ ఇంజిన్‌తో అమర్చింది. ఇందులో 110సీసీ ఇంజిన్‌.. రోటరీ క్లచ్‌తో ఆటో క్లచ్ టెక్నాలజీతో పనిచేసేలా రూపొందించారు. పవర్‌ట్రెయిన్‌ విషయానికొస్తే, ఈ ఇంజిన్ 7500 rpm వద్ద 8.4 bhp పవర్ మరియు 5500 rpm వద్ద 8.3 nm టార్క్‌ను ఉత్పత్తి చేసేలా రూపొందించారు.

కాగా టీవీఎస్‌ జీవ్‌ బైక్ మొత్తం బరువు 100 కిలోలు మాత్రమే. దీంతో ట్రాఫిక్‌లో ఈ బైక్‌లను సులభంగా నడిపించవచ్చు. అదే సమయంలో, బైక్ దాదాపు 60 నుండి 65 కి.మీ మైలేజ్‌ను ఇస్తుంది. టీవీఎస్ ఈ బైక్‌ను తొలిసారిగా 2009లో విడుదల చేసింది.

ఈ బైక్‌ను విడుదల చేసినప్పుడు, క్లచ్‌లెస్ బైక్ అనే పేరు మాత్రమే కాకుండా మరికొన్ని ఫీచర్లు కూడా ప్రత్యేకంగా ఉన్నాయి. ప్రధానంగా ఈ బైక్‌కు సీటు కింద స్టోరేజీ సౌకర్యం ఉంది. సాధారణంగా బైక్‌లకు ఇలాంటి సౌకర్యాలు ఉండవు. వాటర్ బాటిల్ పెట్టుకోవడానికి ప్రత్యేక స్థలం, గొడుగు పెట్టడానికి ప్రత్యేక స్థలం మొదలైనవి ఉండేవి.

ఇన్ని ప్రత్యేకతలతో కూడిన ఈ బైక్ కేవలం రూ.41,000 ధరకే భారత మార్కెట్లో లాంచ్ అయింది. దీంతో ప్రజలు ఈ బైక్‌ను కొనుగోలు చేయడం సులభతరం ఉన్నా.. ఇదంతా ఆశించిన స్థాయిలో జరగలేదు. ప్రజలు ఈ టెక్నాలజీని పెద్దగా ఇష్టపడకపోవడంతో.. విక్రయాలు కూడా ఆశించిన స్థాయిలో లేవు. దీంతో ఈ బైక్ ఉత్పత్తి సగంలోనే ఆగిపోయింది.

2012 నుండి, TVS ఈ బైక్ ఉత్పత్తిని నిలిపివేసింది. ఈ బైక్ అమ్మకాలు ఆశించిన స్థాయిలో లేకపోవడం బాధాకరం. చాలా మంది కొత్త బైక్ కొనుగోలుదారులు క్లచ్ లేని బైక్‌ను ఎంచుకుంటారని అంచనా వేయగా, ఈ బైక్ నడపడం వల్ల తమకు చెడ్డ పేరు వస్తుందని ప్రజలు అభిప్రాయపడ్డారు.

క్లచ్ ఉన్న బైక్ పూర్తి బైక్ మరియు క్లచ్ లేని బైక్ రైడ్ చేయడం తెలియని వ్యక్తుల కోసం రూపొందించారు. దీంతో చాలా మంది ఈ బైక్‌ను ఇష్టపడలేదు. ఎంతో ఆసక్తిగా ఎదురుచూసిన బైక్ ఆ ఫీచర్ కారణంగానే అమ్మకాలలో తిరోగమనాన్ని చవిచూసింది. క్లచ్‌లెస్ బైక్ అని ప్రచారం జరిగినప్పుడు, చాలా మంది ఇది స్కూటర్ లాంటి గేర్‌లెస్ బైక్ అని భావించారు.

కానీ ఈ బైక్‌లో బైక్‌లలో సాధారణ బైక్‌ మాదిరిగా అన్ని గేర్ ఆప్షన్లు ఉన్నాయి. ఇది కేవలం క్లచ్ పట్టుకోవలసిన అవసరం లేకుండా ఉంది. కానీ జనాల్లోకి పెద్దగా వెళ్లలేదు. అమ్మకాలు లేకపోవడంతో, TVS ఈ బైక్ ఉత్పత్తిని నిలిపివేయవలసి వచ్చింది. ఇది జరిగి ఏళ్లు గడిచాయి. కానీ నేటికీ ఏ ఇతర కంపెనీ కూడా ఈ టెక్నాలజీని ఉపయోగించడం లేదు.