అదిరిపోయే అప్‌డేట్స్‌తో వచ్చేసిన బజాజ్ పల్సర్.. ఇప్పుడు కొత్త రైడ్ మోడ్‌లు, బ్లూటూత్ కనెక్టివిటీ కూడా

బజాజ్ ఆటో తమ అత్యంత ప్రజాదరణ పొందిన పల్సర్ సిరీస్‌లో భాగంగా 2025 బజాజ్ పల్సర్ NS125 ABS బైక్‌ను సరికొత్త అప్‌డేట్‌లతో విడుదల చేసింది. ఈ కొత్త మోడల్ రైన్, రోడ్, ఆఫ్-రోడ్ అనే మూడు డిఫరెంట్ రైడ్ మోడ్‌లతో వస్తుంది. అంతేకాదు కొత్త పర్ల్ మెటాలిక్ వైట్ కలర్లో కూడా అందుబాటులో ఉంది. ఇప్పుడు ఈ బైక్ ధర రూ.98,400 (ఎక్స్-షోరూమ్) గా ఉంది. ఈ అప్‌డేట్‌లతో 125సీసీ విభాగంలో టీవీఎస్ రైడర్ 125, హీరో ఎక్స్‌ట్రీమ్ 125R, హోండా SP125 వంటి బైక్‌లకు ఇది గట్టి పోటీ ఇవ్వనుంది.

కొత్త రైడ్ మోడ్‌లు రైడర్‌లకు వివిధ రైడింగ్ పరిస్థితులకు తగ్గట్టుగా బైక్ పర్ఫామెన్స్‎ను, ట్రాక్షన్‌ను మెరుగుపరచడానికి సహాయపడతాయి. రోడ్ మోడ్ సాధారణంగా పట్టణాలు, హైవేలలో ప్రయాణించడానికి ఉద్దేశించబడింది.

రైన్ మోడ్ వర్షం పడినప్పుడు లేదా జారే రోడ్లపై మెరుగైన బ్రేకింగ్ కంట్రోల్ అందిస్తుంది. ఆఫ్-రోడ్ మోడ్: మట్టి రోడ్లు లేదా పల్లపు ప్రాంతాలలో ప్రయాణించేటప్పుడు వీల్ స్లిప్ అవ్వకుండా, మంచి పట్టును అందిస్తుంది. ఈ కొత్త రైడ్ మోడ్‌ల చేరిక బైక్ వర్సాలిటీ, కంట్రోల్‎ను బాగా పెంచుతుంది.

బజాజ్ పల్సర్ NS125 మోటార్‌సైకిల్ ఇంజిన్ విషయానికి వస్తే, ఇందులో ఎటువంటి మార్పులు చేయలేదు. ఇది ఇప్పుడు కూడా అదే 124.45 సీసీ ఎయిర్-కూల్డ్, 4-వాల్వ్ SOHC ఇంజిన్‌ను కలిగి ఉంది. ఈ ఇంజిన్ 12 PS పవర్‌ను, 11 Nm టార్క్‌ను ఉత్పత్తి చేస్తుంది. ఇది 5-స్పీడ్ మ్యాన్యువల్ గేర్‌బాక్స్‌తో వస్తుంది. మైలేజ్ విషయానికి వస్తే లీటర్‌కు 64.75 కి.మీ మైలేజీని అందిస్తుంది.

ఈ బైక్‌లో సరికొత్త ఫీచర్లు కూడా చేర్చారు. బ్లూటూత్ కనెక్టివిటీ సాయంతో కాల్, SMS అలర్ట్‌ల కోసం మొబైల్‌కు కనెక్ట్ చేసుకోవచ్చు. డిజిటల్ ఇన్‌స్ట్రుమెంట్ క్లస్టర్‎లో నావిగేషన్ అసిస్ట్, గేర్ ఇండికేటర్, ఫ్యూయల్ ఎకానమీ, ట్రిప్ మీటర్ వంటి వివిధ సమాచారం ప్రదర్శితం అవుతుంది.

LED DRLs, LED టెయిల్ లైట్లు రాత్రిపూట మంచి విజిబిలిటీని అందిస్తాయి. యూఎస్‎బీ ఛార్జింగ్ పోర్ట్ ప్రయాణంలో మొబైల్‌ను ఛార్జ్ చేసుకోవడానికి వీలు కల్పిస్తుంది. స్ప్లిట్ సీట్లు రైడర్, ప్యాసింజర్ ఇద్దరికీ మెరుగైన సౌకర్యాన్ని అందిస్తాయి. బజాజ్ ప్రకారం, ఎంట్రీ-లెవల్ పెర్ఫార్మెన్స్ మోటార్‌సైకిళ్లకు అడ్వాన్సుడ్ టెక్నాలజీలను తీసుకురావడానికి ఈ అప్‌డేట్ సరిపోతుంది.

అప్‌డేట్ చేయబడిన NS125 ABS వేరియంట్ సేఫ్టీ కోసం సింగిల్-ఛానెల్ ABS (యాంటీ-లాక్ బ్రేకింగ్ సిస్టమ్) తో పాటు 240 మి.మీ. ఫ్రంట్ డిస్క్ బ్రేక్‌ను కలిగి ఉంది. వెనుక వైపు 130 మి.మీ. డ్రమ్ బ్రేక్‌తో కాంబి బ్రేక్ సిస్టమ్ ఉంది. సస్పెన్షన్ విషయానికి వస్తే.. ముందు వైపు టెలిస్కోపిక్ ఫ్రంట్ సస్పెన్షన్, వెనుక వైపు ఐదు-లెవల్స్ అడ్జస్ట్ చేయదగిన మోనోషాక్ సవారీ సౌకర్యాన్ని పెంచుతాయి.

కలర్స్ విషయానికి వస్తే.. అప్ డేట్ మోడల్ ఐదు రంగులలో లభిస్తుంది. బ్లాక్, బ్లూ, ఆరెంజ్, రెడ్, కొత్తగా పర్ల్ మెటాలిక్ వైట్. 145 కేజీల బరువు, 12 లీటర్ల ఇంధన ట్యాంక్ కెపాసిటీతో ఇది తేలికైన, స్పోర్టీ కమ్యూటర్ బైక్.

ఈ అప్‌డేట్ చేయబడిన పల్సర్ NS125 BT ABS వేరియంట్ ధర దాదాపు రూ.98,400 (ఎక్స్-షోరూమ్). ఇది ఫీచర్-రిచ్‌గా ఉండి, 125సీసీ విభాగంలో పోటీ ధరను కలిగి ఉంది. కొత్త రైడ్ మోడ్‌లు, కనెక్టివిటీ ఫీచర్లతో, స్టైల్, టెక్నాలజీ, రైడ్ కస్టమైజేషన్‌ను కోరుకునే యంగ్ సిటీ రైడర్లకు బెస్ట్ ఛాయిస్.