బడ్జెట్ ధరలో కొత్త ఎన్‌ఫీల్డ్.. ఒకసారి చూస్తే షోరూమ్‌కు వెళ్లాల్సిందే! మైండ్‌ బ్లోయింగ్ ఫీచర్స్

బైకుల రారాజు అంటే అందరికి గుర్తుకు వచ్చేది రాయల్ ఎన్‌ఫీల్డ్ (Royal Enfield) మాత్రమే. ఈ పేరు వింటేనే ఒక ప్రత్యేకమైన గౌరవం, ఒక క్లాస్ ఫీలింగ్ కలుగుతుంది. అటువంటి కంపెనీ నుంచి కొత్త మోడల్ వస్తే, బైక్ ప్రియులు ఎంత ఆసక్తిగా ఎదురుచూస్తారో చెప్పాల్సిన పనిలేదు. అలాంటి అంచనాల నడుమ, భారతీయ మార్కెట్‌లోకి రాయల్ ఎన్‌ఫీల్డ్ తాజాగా అప్‌డేట్ చేసి విడుదల చేసిన మరో అద్భుతం 2025 మీటియర్ 350 (2025 Meteor 350). ఈ బైక్ రూపకల్పనలో చేసిన మార్పులు, కొత్త తరహా ఫీచర్లు చూసినప్పుడు, రాయల్ ఎన్‌ఫీల్డ్ తన క్లాసిక్ ఇమేజ్‌ను కాపాడుకుంటూనే ఆధునికతను ఎలా కలగలిపిందో స్పష్టంగా తెలుస్తుంది. యువతను ఆకట్టుకునేలా,అలాగే, అన్ని వయస్సుల వారికి సరిపోయేలా దీన్ని తీర్చిదిద్దారు. దీని ప్రతి అంగుళం లోయల్టీ, స్టైల్, పవర్ కలయికగా కనిపిస్తుంది.

ఫ్యూయల్ ట్యాంక్ ఆకర్షణీయమైన గ్రాఫిక్స్‌తో మరింత స్టైలిష్‌గా డిజైన్ చేయబడింది. రోడ్డుపై దూసుకెళ్లే సమయంలో ఈ బైక్ మీద కూర్చున్న రైడర్‌కే కాకుండా, చూసే వారికి కూడా ప్రత్యేకమైన అనుభూతి కలిగేలా ఉంటుంది. ధర కూడా వినియోగదారులను ఆకర్షించేలా నిర్ణయించబడింది. ఎక్స్-షోరూమ్ ధర రూ. 1.95 లక్షల నుండి రూ. 2.15 లక్షల మధ్య ఉండడం వల్ల, క్లాసిక్ బైక్‌కి ఆశపడే యువతకు ఇది సరైన ఎంపికగా మారింది.

ముఖ్యంగా, ఫైర్‌బాల్, స్టెల్లార్, అరోరా, సూపర్నోవా అనే నాలుగు వేరియంట్లలో దీన్ని అందుబాటులోకి తీసుకువచ్చారు. ప్రతి వేరియంట్‌కి ప్రత్యేకమైన స్టైల్, కలర్స్ ఉండడం వల్ల, వినియోగదారులు తమ అభిరుచికి తగిన మోడల్‌ను ఎంచుకోవచ్చు. కొత్త రాయల్ ఎన్‌ఫీల్డ్ మీటియర్ 350 రూపకల్పన, ఫీచర్ల పరంగా మార్పులు పొందినప్పటికీ, దాని పవర్‌ట్రెయిన్ మాత్రం పాత మోడల్ మాదిరిగానే కొనసాగుతోంది.

ఇందులో 349 సీసీ ఎయిర్-కూల్డ్, సింగిల్ సిలిండర్ పెట్రోల్ ఇంజిన్ అమర్చబడింది. ఇది 6,100 ఆర్‌పిఎమ్ వద్ద గరిష్టంగా 20.2 బిహెచ్‌పి శక్తిని, 4,000 ఆర్‌పిఎమ్ వద్ద 27 ఎన్ఎమ్ పీక్ టార్క్‌ను ఉత్పత్తి చేస్తుంది. శక్తివంతమైన ఈ ఇంజిన్‌తో బైక్ సిటీ రైడింగ్‌కే కాకుండా, లాంగ్ హైవే ప్రయాణాల్లోనూ మంచి పనితీరును అందిస్తుంది. ఇక గేర్ ట్రాన్స్‌మిషన్ విషయానికి వస్తే, 5-స్పీడ్ గేర్‌బాక్స్‌ ద్వారా రైడింగ్ సాఫ్ట్‌గా ఉంటుంది.

పవర్ డెలివరీ క్రమబద్ధంగా ఉండటంతో పాటు, ప్రతి గేర్‌లోనూ సౌకర్యవంతమైన డ్రైవ్ అనుభూతి కలుగుతుంది. మైలేజీ పరంగా కూడా ఈ బైక్ వినియోగదారులకు ఆకట్టుకునే స్థాయిలో ఉంది. లీటరుకు సగటున 35 కిలోమీటర్లు ప్రయాణించే సామర్థ్యం ఉన్నదని అంచనా. అంటే, శక్తి, స్టైల్, సౌలభ్యం మాత్రమే కాకుండా, ఇంధన ఖర్చు పరంగా కూడా ఇది మధ్య తరగతి బైక్ ప్రియులకు సరైన ఎంపికగా నిలుస్తుంది.

ఫీచర్ల విషయానికి వస్తే, సెమీ-డిజిటల్ ఇన్‌స్ట్రుమెంట్ కన్సోల్, స్మార్ట్ కనెక్టివిటీ ఆప్షన్స్, సౌకర్యవంతమైన రైడింగ్ పొజిషన్ వంటి వాటితో ఆధునికంగా మారింది. టర్న్-బై-టర్న్ నావిగేషన్‌, ఇక USB టైప్-సి ఫాస్ట్ ఛార్జింగ్ పోర్ట్ వల్ల, మీరు ప్రయాణం చేస్తూనే మొబైల్ లేదా ఇతర పరికరాలను సులభంగా ఛార్జ్ చేసుకోవచ్చు. డిజైన్ విషయానికి వస్తే, ఆకర్షణీయమైన LED హెడ్‌ల్యాంప్, LED టర్న్ ఇండికేటర్స్ ఈ బైక్‌కు ప్రీమియమ్ లుక్‌ను ఇస్తాయి.

కలర్స్ విషయానికి వస్తే, ఫైర్‌బాల్ ఆరెంజ్, ఫైర్‌బాల్ గ్రే, స్టెల్లార్ మ్యాట్ గ్రే, స్టెల్లార్ మెరైన్ బ్లూ, అరోరా రెట్రో గ్రీన్, అరోరా రెడ్, సూపర్నోవా బ్లాక్ వంటి ఆకట్టుకునే రంగుల్లో విడుదల చేశారు. ప్రతి కలర్ వేరియంట్‌లో ప్రత్యేకత ఉంటుంది. భద్రతా పరంగా ముందు టెలిస్కోపిక్ ఫ్రంట్ ఫోర్కులు, వెనుక ట్విన్ ట్యూబ్ ఎమల్షన్ షాక్ అబ్జార్బర్ సస్పెన్షన్, డ్యూయల్ ఛానల్ ABS, డ్యూయల్ డిస్క్ బ్రేక్‌లు ఉన్నాయి.