పెట్రోల్‌కు గుడ్‌బై చెప్పండి.. ఇంత తక్కువ ధరకే మంచి ఎలక్ట్రిక్ స్కూటర్.. ఇప్పుడు ఇదే ట్రెండింగ్‌

భారత ఎలక్ట్రిక్ టూ-వీలర్ మార్కెట్‌లో తనకంటూ ప్రత్యేక స్థానాన్ని సంపాదించుకున్న కంపెనీలలో ఏథర్ ఎనర్జీ (Ather Energy) ఒకటి. ఈ కంపెనీ స్థాపించినప్పటి నుండి నిరంతరంగా కొత్త సాంకేతికతలను, అధునాతన ఫీచర్లను అందిస్తూ, యువతరాన్ని ఆకట్టుకుంటూ వస్తోంది. ముఖ్యంగా, ఈ కంపెనీ విడుదల చేసిన ఏథర్ రిజ్టా (Ather Rizta) ఎలక్ట్రిక్ స్కూటర్ ప్రస్తుతం భారత మార్కెట్లో అత్యంత సరసమైన, మోడల్‌గా గుర్తింపు పొందింది. ఏథర్ రిజ్టా ప్రస్తుతం రెండు వేరియంట్లలో వినియోగదారులకు అందుబాటులో ఉంది. ఇది నగర ప్రయాణాలకు మాత్రమే కాకుండా, రోజువారీ ఉపయోగానికి కూడా చాలా అనుకూలంగా ఉండటంతో, వినియోగదారులు దీన్ని విస్తృతంగా స్వీకరిస్తున్నారు. దీని శక్తివంతమైన బ్యాటరీ ప్యాక్, స్మార్ట్ ఫీచర్లు, ఆకర్షణీయమైన డిజైన్, నాణ్యతతో కూడిన నిర్మాణం కారణంగా, ఈ స్కూటర్ అమ్మకాలు రోజురోజుకీ పెరుగుతున్నాయి.

అమ్మకాల పరంగా చూస్తే, సెప్టెంబర్ 2025 నెలలో ఏథర్ రిజ్టా స్కూటర్ రికార్డు స్థాయిలో 18,919 యూనిట్లు విక్రయించబడ్డాయి. అదే సమయంలో, సెప్టెంబర్ 2024లో ఈ సంఖ్య కేవలం 9,867 యూనిట్లకు మాత్రమే పరిమితమైంది. అంటే, ఒక్క సంవత్సరం వ్యవధిలో ఏథర్ రిజ్టా అమ్మకాలు దాదాపు రెండింతలకుపైగా పెరిగాయి. గణాంకాల ప్రకారం, సెప్టెంబర్ 2024తో పోలిస్తే 9,052 యూనిట్లు ఎక్కువగా విక్రయించబడ్డాయి, ఇది 91.74 శాతం వృద్ధిని సూచిస్తోంది.

ఇది ఏథర్ కంపెనీకి పెద్ద మైలురాయి. ఎలక్ట్రిక్ వాహనాలపై ప్రజల అవగాహన పెరగడం, ప్రభుత్వ సబ్సిడీలు, అలాగే ఇంధన ధరల పెరుగుదల వంటి అంశాలు కూడా ఈ పెరుగుదలలో ప్రధాన పాత్ర పోషించాయి. అంతేకాదు, ఏథర్ కంపెనీ తన ఉత్పత్తి నాణ్యతను, సర్వీస్ నెట్‌వర్క్‌ను, ఛార్జింగ్ ఇన్ఫ్రాస్ట్రక్చర్‌ను క్రమంగా విస్తరించడం వల్ల వినియోగదారుల విశ్వాసం మరింత బలపడింది. మొత్తంగా, ఏథర్ రిజ్టా సెప్టెంబర్ 2025లో బలమైన సేల్స్‌ను నమోదు చేసింది.

సెప్టెంబర్ 2025 నెలలో స్కూటర్ మార్కెట్ పోటీగా ఉన్నప్పటికీ, ఏథర్ రిజ్టా(Ather Rizta) తన ప్రత్యేక స్థానాన్ని కొనసాగించగలిగింది. అమ్మకాల పరంగా అద్భుతమైన వృద్ధిని నమోదు చేసిన ఈ ఎలక్ట్రిక్ స్కూటర్, ఆ నెలలో అత్యధికంగా అమ్ముడైన టాప్ 10 స్కూటర్ల జాబితాలో 10వ స్థానాన్ని దక్కించుకుంది. ఇది ఏథర్ కంపెనీకి పెద్ద విజయంగా చెప్పుకోవచ్చు, ఎందుకంటే ఈ జాబితాలో ఉన్న మిగతా మోడళ్లలో చాలా వరకు పెట్రోల్ స్కూటర్లే.

సెప్టెంబర్ 2025 టాప్ 10 స్కూటర్ల జాబితాలో ముందువరుసలో హోండా యాక్టివా, టీవీఎస్ జూపిటర్, సుజుకి యాక్సెస్, టీవీఎస్ ఎన్‌టార్క్, టీవీఎస్ ఐక్యూబ్, బజాజ్ చేతక్, సుజుకి బర్గ్‌మాన్, యమహా రేజెడ్ఆర్, హోండా డియో ఉన్నాయి. వీటిలో మధ్యతరగతి వినియోగదారులకు అందుబాటులో ఉండే పెట్రోల్ స్కూటర్లు ప్రధానంగా ఉండగా, వాటి మధ్య ఏథర్ రిజ్టా ఎలక్ట్రిక్ మోడల్ నిలదొక్కుకోవడం గమనించదగ్గ విషయం.

ఏథర్ రిజ్టా ప్రస్తుతం రెండు వేరియంట్లలో S వేరియంట్, Z వేరియంట్‌లలో అమ్ముడవుతోంది. S వేరియంట్ ప్రారంభ ధర రూ. 1,04,999, Z వేరియంట్ ప్రారంభ ధర రూ. 1,30,447(ఎక్స్-షోరూమ్). ఈ ధరల్లో కంపెనీ అందించే టెక్నాలజీ, పనితీరు, సౌకర్యాలు చూస్తే, రిజ్టా మార్కెట్లో అత్యంత విలువైన ఎంపికగా నిలుస్తుంది.

పనితీరు పరంగా చూస్తే, ఈ ఎలక్ట్రిక్ స్కూటర్ ఒక్కసారి పూర్తి ఛార్జ్ చేస్తే గరిష్టంగా 159 కిలోమీటర్ల దూరం ప్రయాణించగలదు. అలాగే, దీని గరిష్ట వేగం గంటకు 80 కిలోమీటర్లు, 0 నుండి 40 కిమీ/గంట వేగాన్ని కేవలం 4.7 సెకన్లలో చేరుతుంది. ఈ వేగం, రైడ్ క్వాలిటీ, స్మార్ట్ డిస్‌ప్లేలు, కనెక్టివిటీ ఫీచర్లతో కలిపి, నగర ప్రయాణాలకు రిజ్టా అనువైన స్కూటర్‌గా నిలుస్తోంది.