యాక్టివా, జూపిటర్‌కు షాక్.. ప్రపంచాన్ని ఊపేస్తున్న భారతీయ స్కూటర్.. ఎగుమతుల్లో రికార్డులు

భారతదేశ ఆటోమొబైల్ రంగం గర్వంగా చెప్పుకునే విషయం ఇది. మన 'మేడ్ ఇన్ ఇండియా' స్కూటర్లు ప్రపంచ మార్కెట్‌లో సత్తా చాటుతున్నాయి. హోండా యాక్టివా, టీవీఎస్ జూపిటర్ వంటి దిగ్గజాలను సైతం వెనక్కి నెట్టి, ఒక స్కూటర్ విదేశీయుల హృదయాలను కొల్లగొడుతోంది. త్వరలో సరికొత్త హంగులతో మీ ముందుకు రాబోతున్న ఆ సంచలనం ఏంటో వివరంగా తెలుసుకుందాం.

భారతదేశంలో అత్యధికంగా అమ్ముడయ్యే స్కూటర్ల జాబితాలో హోండా యాక్టివా, టీవీఎస్ జూపిటర్ మొదటి స్థానాల్లో ఉండొచ్చు. కానీ, ఎప్పుడైతే మన దేశంలో తయారైన స్కూటర్లను విదేశాలకు ఎగుమతి చేసే విషయం వస్తుందో, అప్పుడు ఈ రెండు కంపెనీల ఇతర మోడళ్లు వాటిని దాటి ముందుకెళ్తున్నాయి.

అలాంటి ఒక అద్భుతమైన స్కూటర్ ఇప్పుడు మరింత పవర్ఫుల్ అప్‌డేట్‌తో త్వరలో విడుదల కానుంది. ఆ స్కూటర్ పేరు టీవీఎస్ ఎన్‌టార్క్ (TVS NTorq). 2024-25 ఆర్థిక సంవత్సరంలో ఈ ఒక్క స్కూటర్ ఏకంగా 64,988 యూనిట్లు విదేశాలకు ఎగుమతి చేసింది. అదే సమయంలో, మనదేశంలో అత్యంత ప్రజాదరణ పొందిన హోండా యాక్టివా కేవలం 41,026 యూనిట్లు, టీవీఎస్ జూపిటర్ కేవలం 19,504 యూనిట్లు మాత్రమే ఎగుమతి కావడం విశేషం.

ఈ గణాంకాలు టీవీఎస్ ఎన్‌టార్క్, అంతర్జాతీయ స్థాయి ఆదరణను స్పష్టంగా తెలియజేస్తున్నాయి. ఇప్పుడు టీవీఎస్ కంపెనీ ఈ సక్సెస్ఫుల్ స్కూటర్‌లో కొన్ని కీలకమైన మార్పులు తీసుకురావడానికి సిద్ధమవుతోంది.

టీవీఎస్ గత ఏడు సంవత్సరాలుగా ఎన్‌టార్క్ బ్రాండ్‌తో విభిన్నమైన స్కూటర్లను మార్కెట్‌లో విక్రయిస్తోంది. ఈ శ్రేణిలో మొదటగా 125సీసీ ఇంజన్‌తో కూడిన స్కూటర్‌ను విడుదల చేసింది.

భారతీయ మార్కెట్‌లో ఈ స్కూటర్ హోండా యాక్టివా 125, టీవీఎస్ జూపిటర్ 125, సుజుకి యాక్సెస్ 125, హీరో బర్గ్‌మన్ స్ట్రీట్ 125, యమహా రేజర్ 125తో పోటీపడుతుంది.

అయితే, ప్రస్తుతం స్కూటర్ సెగ్మెంట్‌లో 150సీసీ, 160సీసీ ఇంజన్ల పెర్ఫార్మెన్స్ వాహనాలకు డిమాండ్ పెరుగుతోంది. ఈ ట్రెండ్‌ను గుర్తించిన టీవీఎస్, ఇప్పుడు ఎన్‌టార్క్ బ్రాండ్ కింద 150సీసీ ఇంజన్‌తో సరికొత్త స్కూటర్‌ను తీసుకురావడానికి సన్నాహాలు చేస్తోంది.

పండుగల సీజన్‌కు ముందు టీవీఎస్ తమ ఎలక్ట్రిక్ స్కూటర్ ఐక్యూబ్ తక్కువ ధర కలిగిన వేరియంట్‌ను విడుదల చేయడానికి ప్రణాళికలు సిద్ధం చేస్తోంది. విశ్వసనీయ మీడియా నివేదికల ప్రకారం, అదే సమయంలో లేదా కొద్ది రోజుల వ్యవధిలో కంపెనీ తమ 150సీసీ టీవీఎస్ ఎన్‌టార్క్ స్కూటర్‌ను కూడా మార్కెట్‌లోకి విడుదల చేసే అవకాశం ఉంది. ఒకవేళ ఇది నిజమైతే, ఈ కొత్త స్కూటర్ నేరుగా యమహా ఏరోక్స్ 155 (Yamaha Aerox 155), హీరో జూమ్ 160 (Hero Xoom 160) వంటి పవర్పుల్ స్కూటర్‌లతో పోటీ పడనుంది.

కొత్తగా రాబోయే టీవీఎస్ ఎన్‌టార్క్ 150సీసీ స్కూటర్‌లో అనేక ప్రత్యేకమైన ఫీచర్లు ఉండబోతున్నాయి. ప్రస్తుతం టీవీఎస్ 300సీసీ కంటే తక్కువ కెపాసిటీ గల లిక్విడ్ కూల్డ్ ఇంజన్‌లను అభివృద్ధి చేయడంపై ప్రత్యేక దృష్టి సారించింది. ఎందుకంటే ఈ కేటగిరీలో ప్రస్తుతం కంపెనీ కలిగి ఉన్న ఇంజన్‌లు ఎక్కువగా ఎయిర్ కూల్డ్ టెక్నాలజీతో పనిచేస్తున్నాయి.

కాబట్టి, టీవీఎస్ ఈ సరికొత్త లిక్విడ్ కూల్డ్ ఇంజన్‌తోనే తమ కొత్త 150cc ఎన్‌టార్క్ స్కూటర్‌ను విడుదల చేసే అవకాశం ఉంది. అంతేకాకుండా, ఈ స్కూటర్‌లో అత్యాధునిక డిజిటల్ ఇన్‌స్ట్రుమెంట్ కన్సోల్, స్ప్లిట్ సీటు (రెండు భాగాలుగా ఉండే సీటు), పెద్ద అల్లాయ్ వీల్స్ వంటి స్టైలిష్, ఉపయోగకరమైన ఫీచర్లు కూడా ఉండవచ్చని అంచనా వేస్తున్నారు.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు.