ఇండియాలో మొట్టమొదటి AI స్కూటర్లు.. కండిషన్ 10 సెకన్లలోనే చెక్.. 70కి పైగా స్మార్ట్ యాప్ ఫీచర్లు

భారతదేశంలో ఎలక్ట్రిక్ వాహన రంగం వేగంగా అభివృద్ధి చెందుతున్న సమయంలో, కొత్త కంపెనీలు తమ సృజనాత్మకతతో వినియోగదారుల దృష్టిని ఆకర్షిస్తున్నారు. అలాంటి కంపెనీలలో ఒకటైన E3 Electric.Ai తాజాగా రెండు విభిన్నమైన ఎలక్ట్రిక్ వాహనాలను భారతీయ మార్కెట్లోకి ఆవిష్కరించింది. వీటిలో ఒకటి దేశంలో మొట్టమొదటి స్మార్ట్ ఎలక్ట్రిక్ ఫ్యామిలీ స్కూటర్, మరొకటి డెలివరీ, లాజిస్టిక్స్ రంగాన్ని దృష్టిలో పెట్టుకుని రూపొందించబడిన బలమైన క్రాస్ఓవర్ డెలివరీ మోపెడ్. ఫ్యామిలీ స్కూటర్ విషయానికి వస్తే, ఇది పూర్తిగా భవిష్యత్ తరహా డిజైన్‌తో ఆకర్షణీయంగా తీర్చిదిద్దబడింది. కుటుంబ అవసరాలను దృష్టిలో ఉంచుకుని రూపొందించిన ఈ స్కూటర్, కేవలం ఒక ప్రయాణ సాధనం మాత్రమే కాదు, ఇంటెలిజెంట్ AI సాంకేతికతతో నిండిన ఒక స్మార్ట్ వాహనం.

మరోవైపు, క్రాస్ఓవర్ డెలివరీ మోపెడ్ పూర్తిగా ప్రాక్టికల్ యుటిలిటీని ముందుంచుకుని రూపొందించబడింది. డెలివరీ, లాజిస్టిక్స్, బిజినెస్ అవసరాలకు అనుకూలంగా ఉండే ఈ మోడల్, బలమైన బాడీ, పలు విధాలుగా ఉపయోగ ఫీచర్లతో వస్తోంది. దీని దృఢమైన నిర్మాణం కారణంగా కఠినమైన రోడ్లపైనా, బరువైన లోడ్లపైనా సులభంగా పనిచేయగలదు. ఈ విధంగా, ఇది కేవలం డెలివరీ బాయ్‌లకే కాదు, చిన్న వ్యాపారాలకు కూడా ఒక విశ్వసనీయ భాగస్వామిగా మారబోతోంది.

రోజువారీ ప్రయాణం సౌకర్యవంతంగా, భద్రంగా, పర్యావరణహితంగా మారేలా E3 Electric.Ai వీటిని రూపకల్పన చేసింది. ఈ రెండు వాహనాల ప్రత్యేకత ఏమిటంటే, పూర్తిగా కంపెనీ యాజమాన్య VOLTCORE మాడ్యులర్ పవర్‌ట్రెయిన్, TRIAXISFRAME ప్లాట్‌ఫామ్‌‌‌లపై నిర్మించబడ్డాయి. అంటే, వీటికి భవిష్యత్‌లో మరిన్ని అప్‌డేట్స్, కస్టమైజేషన్ అవకాశాలు, విస్తృతమైన అప్లికేషన్లు వస్తాయి. AI ఆధారిత మాడ్యులర్ ఛాసిస్ ప్లాట్‌ఫామ్‌తో ఇవి కేవలం ప్రస్తుత అవసరాలకే కాకుండా, రేపటి అవసరాలకు కూడా సిద్ధంగా ఉంటాయి.

TRIPSENSE: AI. ప్రత్యేకంగా EVల కోసం అభివృద్ధి చేయబడిన, పేటెంట్ పొందిన ట్రిప్ అస్యూరెన్స్ టెక్నాలజీ. ఈ సాంకేతికత ద్వారా వినియోగదారులు తమ మొబైల్ ఫోన్‌ను ఉపయోగించి కేవలం 10 సెకన్లలోనే ప్రిడిక్టివ్ హెల్త్ స్కాన్ చేయగలరు. అంటే, వాహనం రోడ్డుపైకి వెళ్లే ముందే దాని కండిషన్ ఎలా ఉందో, ఏవైనా సమస్యలు వస్తాయా అన్నది ముందుగానే తెలుసుకోవచ్చు. సమస్యలు వచ్చే ముందు వాటిని గుర్తించి వినియోగదారులకు నోటిఫై చేస్తుంది.

E3 Electric.Ai తన కొత్త వాహనాలలో ప్రవేశపెట్టిన మరో విశేషమైన సాంకేతికత AI-ఆధారిత మొబైల్ క్లస్టర్ ఇంటిగ్రేషన్. ఈ ఫీచర్ ద్వారా మీ ఆండ్రాయిడ్ లేదా యాపిల్ మొబైల్ ఫోన్ నేరుగా EV డిజిటల్ క్లస్టర్‌‌తో కనెక్ట్ అవుతుంది. అంటే, వాహనంలోని డాష్‌బోర్డ్ క్లస్టర్‌ను కేవలం సమాచారం చూపించే సాధనంగా కాకుండా, ఒక స్మార్ట్ అసిస్టెంట్‌‌గా మార్చేస్తుంది. దీంతో వినియోగదారులకు 70కి పైగా APP-ఆధారిత అంశాలు అందుబాటులోకి వస్తాయి.

వీటిలో ప్రధానంగా, స్మార్ట్ నావిగేషన్.. సులభమైన మార్గాలను సూచించడం మాత్రమే కాకుండా, ట్రాఫిక్ పరిస్థితులను బట్టి డైనమిక్ రూట్ మార్పులను కూడా చేస్తుంది. స్మార్ట్ ఛార్జింగ్ పాయింట్ డిస్కవరీ.. సమీపంలోని EV ఛార్జింగ్ స్టేషన్‌లను ఆటోమేటిక్‌గా గుర్తించి, రియల్-టైమ్‌లో వివరాలు అందిస్తుంది. ఇంటరెస్టింగ్ పాయింట్స్ డిస్కవరీ.. డ్రైవింగ్ చేస్తున్నప్పుడు మార్గమధ్యంలో ఉన్న ముఖ్యమైన లేదా ఆసక్తికరమైన ప్రదేశాలను గుర్తించి చూపిస్తుంది.

E3 Electric.Ai వాహనాల్లో ఆకట్టుకునే మరో ముఖ్యమైన అంశం AI Vision Safety Feature. ఈ అధునాతన సిస్టమ్ రోడ్డుపై ప్రయాణించే సమయంలో అడ్డంకులు లేదా గుంతలు ఉన్నప్పుడు డ్రైవర్‌కు వెంటనే అలర్ట్ ఇస్తుంది. దీంతో వాహనం అనుకోని పరిస్థితుల్లో చిక్కుకోవడం, ప్రమాదాలు జరగడం వంటి అవకాశాలు గణనీయంగా తగ్గుతాయి. ఇప్పటివరకు ఇలాంటి అధునాతన సేఫ్టీ టెక్నాలజీలు ప్రధానంగా ఖరీదైన లగ్జరీ కార్లలో మాత్రమే కనిపించేవి.

ఇంకా ఒక విప్లవాత్మక సాంకేతికతగా VOLTPORT Battery Digital Twin Technology కూడా ఇందులో భాగం. ఈ టెక్నాలజీ వాహనంలోని బ్యాటరీ స్థితిని కేవలం మానిటర్ చేయడం మాత్రమే కాదు, భవిష్యత్‌లో సంభవించే ఏవైనా సమస్యలను ముందుగానే అంచనా వేసి భద్రతను నిర్ధారిస్తుంది. దీని వలన వినియోగదారులు నమ్మకంగా ప్రయాణించగలరు, అలాగే బ్యాటరీ లైఫ్ కూడా ఎక్కువకాలం నిలుస్తుంది.