మోటార్ సైకిల్‌లా కాదు.. ఇది ఎలక్ట్రిక్ సైకిల్.. భలే ఉంది.. రేటు తక్కువ.. ఫీచర్లు ఎక్కువ!

పెట్రోల్ ధరల నుంచి ఉపశమనం పొందాలనుకునే వారికి, ఎలక్ట్రిక్ సైకిల్స్ మంచి పరిష్కారంగా మారాయి. ప్రముఖ ఎలక్ట్రిక్ మొబిలిటీ కంపెనీ ఇమోటార్డ్ (EMotorad), యువతరం కోసం ప్రత్యేకంగా సస్పెన్షన్ సౌకర్యంతో కూడిన డోప్(Dope) అనే కొత్త ఎలక్ట్రిక్ సైకిల్‌ను విడుదల చేసింది. దీని ధర, ఫీచర్ల గురించి వివరంగా ఈ వార్తలో తెలుసుకుందాం.

భారతదేశంలో ప్రముఖ ఎలక్ట్రిక్ మొబిలిటీ కంపెనీ అయిన ఇమోటార్డ్ (EMotorad), యువతరం కోసం ఒక కొత్త ఎలక్ట్రిక్ సైకిల్‌ను మార్కెట్‌లోకి తీసుకొచ్చింది. దీని పేరు డోప్. ఈ సైకిల్ కేవలం రూ.19,999 ధరతో అందుబాటులో ఉంది. ఇది తక్కువ బడ్జెట్‌లో మంచి ఫీచర్లతో వచ్చింది.

డిజైన్, సేఫ్టీ ఫీచర్లు
డోప్ ఎలక్ట్రిక్ సైకిల్ డిజైన్‌లో సేఫ్టీ, సౌకర్యానికి ఎక్కువ ప్రాధాన్యత ఇచ్చారు. ఇందులో ఫ్రంట్ వీల్ పైన 80 మిల్లీమీటర్ల సస్పెన్షన్ ఫోర్క్ ఉంది. దీనివల్ల రోడ్లు సరిగా లేకపోయినా, గుంతలు ఉన్నా ప్రయాణం సాఫీగా ఉంటుంది. ఇందులో ఉన్న ఆటో కట్-ఆఫ్ ఇ-బ్రేక్‌లు అత్యవసర పరిస్థితుల్లో సైకిల్‌ను వెంటనే ఆపేస్తాయి. దీనివల్ల సేఫ్టీ పెరుగుతుంది.

పర్ఫామెన్స్, ఇంజిన్
ఈ సైకిల్‌లో వెనుక భాగంలో 36 వోల్ట్స్, 250 వాట్స్ మోటార్ ఉంది. ఇది యూత్ ఈజీగా నడపగలిగేంత ఎనర్జీ ఇస్తుంది. దీని సహాయంతో ఎక్కువ దూరం, ఎత్తు ఉన్న ప్రాంతాలకు కూడా సులభంగా వెళ్ళొచ్చు. ఇందులో ఉన్న 14-అంగుళాల ఐరన్ ఫ్రేమ్, 24-అంగుళాల నైలాన్ టైర్లు చాలా బలంగా ఉంటాయి. ఈ సైకిల్ సింగిల్-స్పీడ్ డ్రైవ్‌ట్రెయిన్‌తో వస్తుంది. ఇది నడపడానికి సులభంగా ఉంటుంది.

బ్యాటరీ, ఛార్జింగ్
డోప్ ఎలక్ట్రిక్ సైకిల్‌లో 36 వోల్ట్స్, 5.2 ఆంపియర్స్ కెపాసిటీ ఉన్న లిథియం-అయాన్ బ్యాటరీ ఉంది. ఈ బ్యాటరీని సైకిల్ నుంచి తీసి ఛార్జ్ చేసుకోవచ్చు. సైకిల్‌ను పూర్తిగా ఛార్జ్ చేయడానికి 2-3 గంటల సమయం పడుతుంది.

కెపాసిటీ, వెయిట్
ఈ ఎలక్ట్రిక్ సైకిల్ టాప్ స్పీడు గంటకు 17 కిలోమీటర్లు. పెడల్ సహాయంతో గంటకు 22 కిలోమీటర్ల వేగంతో ప్రయాణించవచ్చు. ఈ సైకిల్ బరువు 80 కిలోలు. ఈ సైకిల్‌ను 4.2 అడుగుల నుండి 4.9 అడుగుల ఎత్తు ఉన్నవారు కూడా నడపడానికి అనుకూలంగా ఉంటుంది.

వారంటీ వివరాలు
ఇమోటార్డ్ కంపెనీ ఈ సైకిల్‌కు వివిధ భాగాలపై వారంటీని ప్రకటించింది. ఫ్రేమ్ కోసం 5 సంవత్సరాలు, మోటార్, మోటార్ షెల్, కంట్రోలర్‎కు సంవత్సరం, బ్యాటరీకి 2 సంవత్సరాలు, ఇతర భాగాలు (లైట్లు, ఛార్జర్)లకు 6 నెలలు వారంటీ అందిస్తుంది.

ఎక్కడ కొనాలి?
ఈ సైకిల్‌ను ఇమోటార్డ్ డీలర్ నెట్‌వర్క్ లేదా అమెజాన్, ఫ్లిప్‌కార్ట్ వంటి ఆన్‌లైన్ ప్లాట్‌ఫారమ్‌ల ద్వారా కొనుగోలు చేయవచ్చు. ఆన్‌లైన్‌లో కొనుగోలు చేసేవారికి ప్రత్యేకంగా సీ గ్రీన్ వేరియంట్ లభిస్తుంది.

డ్రైవ్‎స్పార్క్ అభిప్రాయం : ఇమోటార్డ్ కంపెనీ తీసుకొచ్చిన ఈ డోప్ ఎలక్ట్రిక్ సైకిల్ పిల్లలకు సురక్షితమైన, సరదా ప్రయాణాన్ని అందిస్తుంది. తక్కువ ధరలో మంచి క్వాలిటీ, సేఫ్టీని కోరుకునే తల్లిదండ్రులకు ఇది ఒక మంచి ఆప్షన్.