రాయల్ ఎన్‌ఫీల్డ్‌కి గుడ్‌న్యూస్.. అడ్వెంచర్ బైక్ లవర్స్‎కు బ్యాడ్ న్యూస్.. ఆ బైక్ అమ్మకాలు నిలిపేసిన కేటీఎం

ఇండియాలో ఒకప్పుడు ఉన్న పేరు ప్రఖ్యాతులు కోల్పోయి ఇబ్బందుల్లో ఉన్న ఆస్ట్రియన్ టూ వీలర్ తయారీ సంస్థ కేటీఎం. తమ డ్యూక్ సిరీస్ ద్వారా నిర్మించుకున్న సామ్రాజ్యం నెమ్మదిగా కేటీఎం చేజారిపోతోంది. లేటెస్ట్ బైక్‌లు పెరిగిపోవడంతో బ్రాండ్ అమ్మకాలు కొద్దిగా తగ్గాయి. కానీ ఇప్పుడు, కొత్త తరం మోడల్స్‌తో కేటీఎం పూర్వ వైభవానికి వస్తోంది. ఇటీవల విడుదలైన అడ్వెంచర్ మోడల్స్ హిట్ అవ్వడంతో, షోరూమ్‌లకు జనం మళ్లీ రావడం మొదలుపెట్టారు.

ఈ క్రమంలోనే తమ సిరీసులోని ఒక మోడల్‌ను నిలిపివేస్తున్నట్లు కేటీఎం ప్రకటించింది. 390 అడ్వెంచర్ X మోటార్‌సైకిల్ అమ్మకాలను ఈ ఆస్ట్రియన్ బ్రాండ్ నిలిపివేసింది. భారతదేశం అంతటా 390 అడ్వెంచర్ X ఎడిషన్ కోసం కేటీఎం ఇప్పటికే బుకింగ్‌లను నిలిపివేసిందని నివేదికలు చెబుతున్నాయి. అయితే అభిమానులు బాధపడాల్సిన అవసరం లేదు.

KTM 390 అడ్వెంచర్ X మోడల్‌కు బదులుగా, మరిన్ని ఫీచర్లతో నిండిన కొత్త 390 అడ్వెంచర్ X ప్లస్ అనే వేరియంట్‌ను భారత మార్కెట్‌లో విడుదల చేయడానికి కంపెనీ ప్లాన్ చేస్తోంది. 390 అడ్వెంచర్ సిరీస్‌ను అప్‌డేట్ చేయాలనే నిర్ణయం స్వాగతించదగినది. స్టాండర్డ్ KTM 390 అడ్వెంచర్ నుండి తీసుకున్న IMU బేస్డ్ ఎలక్ట్రానిక్స్ ప్యాకేజీ 390 అడ్వెంచర్ X ప్లస్‌కు అతిపెద్ద హైలైట్.

స్విచ్చబుల్ కార్నరింగ్ ఎబిఎస్, స్విచ్చబుల్ కార్నరింగ్ ట్రాక్షన్ కంట్రోల్, క్రూయిస్ కంట్రోల్ వంటి ఫీచర్లు ఇందులో లభిస్తాయి. ఇవి కాకుండా, X ప్లస్‌లో స్ట్రీట్, రెయిన్, ఆఫ్-రోడ్ అనే మూడు రైడ్ మోడ్‌లు కూడా ఉంటాయని సమాచారం. ఇది స్టాండర్డ్ మోడల్‌లో వలె వివిధ రోడ్డు పరిస్థితులలో రైడర్‌కు మరింత నియంత్రణను అందిస్తుంది.

కొత్త KTM 390 అడ్వెంచర్ X ప్లస్ 19 అంగుళాల ఫ్రంట్, 17 అంగుళాల రియర్ అల్లాయ్ వీల్స్‌తో మార్కెట్‌లోకి వస్తుంది. తేలికపాటి ఆఫ్-రోడ్ కెపాసిటీకి కూడా ఈ మోటార్‌సైకిల్‌కు ఉంటుంది. అయితే, స్టాండర్డ్ మోడల్‌లోని అడ్జస్టబుల్ సస్పెన్షన్ కొత్త వేరియంట్‌లో ఉండదనేది చాలా మందిని నిరాశపరచవచ్చు.

అడ్జస్టబుల్ సస్పెన్షన్ ఉండడం మంచిదే అయినా.. 390 అడ్వెంచర్ X మోడల్‌లోని స్టాక్ సెటప్ సౌకర్యం, స్పోర్టీ డైనమిక్స్ మధ్య మంచి బ్యాలెన్స్ అందిస్తుందని కేటీఎం చెబుతోంది. IMU ఆధారిత ఫీచర్లు కూడా చేర్చడంతో, అడ్వెంచర్ X ప్లస్ ప్రస్తుత అడ్వెంచర్ X ఎడిషన్ కంటే సుమారు రూ. 15,000 నుంచి 20,000 వరకు ఎక్కువగా ఉండవచ్చు.

అదనపు డబ్బు ఖర్చు చేయకుండానే స్టాండర్డ్ మోడల్‌లో ఎక్కువ ఫీచర్లను కోరుకునే వారికి ఈ కొత్త మోడల్ సహాయపడుతుంది. రాబోయే వారంలో బైక్ విడుదల ఉంటుందని భావిస్తున్నారు. సరికొత్త 390 డ్యూక్‎లో ఉన్న అదే 399 సీసీ సింగిల్ సిలిండర్ ఇంజిన్ 390 అడ్వెంచర్ X మోటార్‌సైకిల్‌కు గుండె లాంటిది. 6 స్పీడ్ గేర్‌బాక్స్, బైడైరెక్షనల్ క్విక్-షిఫ్టర్‌తో కలిపి, ఈ ఇంజిన్ 46 బీహెచ్‌పి పవర్, 39 ఎన్‌ఎం టార్క్‎ను ఉత్పత్తి చేస్తుంది.

కొత్త KTM 390 అడ్వెంచర్ X ప్లస్ వచ్చినప్పుడు కూడా ఇదే ఇంజిన్ ఉంటుంది. ఇటీవల ఆస్ట్రియన్ ద్విచక్ర వాహన తయారీ సంస్థ కేటీఎం తీసుకుంటున్న ఆలోచనలన్నీ విజయవంతం అవుతున్నాయి కాబట్టి, ఈ కొత్త అడుగు కూడా విజయవంతం అవుతుందని భావించవచ్చు.

డ్రైవ్‌స్పార్క్ అభిప్రాయం: కేటీఎం 390 అడ్వెంచర్ X మోడల్‌ను నిలిపివేయడం, దాని స్థానంలో మెరుగైన ఫీచర్లతో X ప్లస్ వేరియంట్‌ను తీసుకురావడం ఒక తెలివైన ఎత్తుగడ. ధర కొద్దిగా పెరిగినా, IMU ఆధారిత ఎలక్ట్రానిక్స్, రైడ్ మోడ్‌లు వంటి అదనపు ఫీచర్లు రైడర్‌లకు మెరుగైన అనుభవాన్ని అందిస్తాయి. ఇది మార్కెట్‌లో కేటీఎం స్థానాన్ని మరింత బలోపేతం చేయడంలో సాయపడుతుంది. అడ్వెంచర్ బైక్ విభాగంలో రాయల్ ఎన్‌ఫీల్డ్‌కు గట్టి పోటీనిస్తుంది.