రేసింగ్ కాదు... రెస్ట్ తీసుకుంటూ ప్రయాణం..క్రూయిజ్ కంట్రోల్ ఫీచర్‌తో హీరో గ్లామర్ X 125 బైక్ వచ్చేసింది

భారతీయ మార్కెట్‌లో అత్యధికంగా అమ్ముడవుతున్న బైక్‌లలో హీరో మోటోకార్ప్ ఎప్పుడూ ముందుంటుంది. ఇప్పుడు హీరో సరికొత్త టెక్నాలజీతో తన 2025 హీరో గ్లామర్ ఎక్స్ 125 బైక్‌ను భారత మార్కెట్‌లో విడుదల చేసింది. ఈ బైక్ బేస్ డ్రమ్ వేరియంట్ ధర రూ.89,999 (ఎక్స్-షోరూమ్)గా ఉంది, టాప్-స్పెక్ డిస్క్ వేరియంట్ ధర రూ.లక్ష (ఎక్స్-షోరూమ్)గా ఉంది. స్టైలిష్ డిజైన్‌తో పాటు అనేక కొత్త ఫీచర్లతో ఈ బైక్ వచ్చింది.

క్రూయిజ్ కంట్రోల్ ఫీచర్ : హీరో గ్లామర్ ఎక్స్ 125 అతిపెద్ద హైలైట్ ఏమిటంటే.. ఈ సెగ్మెంట్‌లో మొదటిసారిగా క్రూయిజ్ కంట్రోల్ సిస్టమ్‌ను పరిచయం చేయడం. ఈ ఫీచర్ సాధారణంగా కేటీఎం 390 డ్యూక్, టీవీఎస్ అపాచీ ఆర్టీఆర్ 310 వంటి ప్రీమియం బైక్‌లలో మాత్రమే కనిపిస్తుంది. ఈ ఫీచర్‌ను ఆన్ చేయడానికి, ఆఫ్ చేయడానికి, వేగాన్ని సెట్ చేయడానికి, రీసెట్ చేయడానికి బైక్‌కు స్పెషల్ బటన్ ఉంది.

అడ్వాన్సుడ్ ఫీచర్లు : క్రూయిజ్ కంట్రోల్ కాకుండా, ఈ బైక్‌లో మరిన్ని అడ్వాన్సుడ్ ఫీచర్లు ఉన్నాయి. ఇందులో రైడ్-బై-వైర్ థ్రాటిల్ సిస్టమ్, మూడు రైడింగ్ మోడ్‌లు ఉన్నాయి. అవి ఎకో (Eco), రోడ్ (Road), పవర్ (Power). మీరు సెలక్ట్ చేసుకున్న మోడ్‌ను బట్టి ఇంజిన్ పర్ఫామెన్స్ మారుతుంది.

వీటితో పాటు హీరో గ్లామర్ ఎక్స్ 125లో బ్లూటూత్ కనెక్టివిటీతో కూడిన కలర్ టీఎఫ్‌టీ ఇన్‌స్ట్రుమెంట్ క్లస్టర్ కూడా ఉంది. ఇది టర్న్-బై-టర్న్ నావిగేషన్‌ను కూడా అందజేస్తుంది. ఇంకా ఫుల్-ఎల్ఈడీ లైటింగ్, యూఎస్బీ టైప్-సీ ఛార్జింగ్ పోర్ట్, సింగిల్-ఛానల్ ఏబీఎస్ వంటి ఫీచర్లు ఉన్నాయి.

ఈ బైక్‌లో రైడర్‌కు, వెనుక కూర్చున్న వారికి కూడా మంచి సౌకర్యంగా ఉంటుంది. పెద్ద పిలియన్ సీట్, వెడల్పైన గ్రాబ్ రైల్, మెరుగైన సీట్ కుషనింగ్ వల్ల లాంగ్ రైడ్స్‌లో కూడా అలసట ఉండదు. సీటు కింద ఒక యుటిలిటీ బాక్స్ ఉంది. ఇందులో రెండు మొబైల్ ఫోన్లు, టూల్‌కిట్, ఫస్ట్-ఎయిడ్ కిట్‌ను స్టోర్ చేసుకోవచ్చు. 2 ఆంప్స్ టైప్-సి యూఎస్బీ ఛార్జింగ్ పోర్ట్ వల్ల స్మార్ట్‌ఫోన్‌ను వేగంగా ఛార్జ్ చేసుకోవచ్చు.

స్పోర్టీ, స్టైలిష్ డిజైన్ : డిజైన్ విషయానికి వస్తే, గ్లామర్ ఎక్స్ 125 ఒక స్పోర్టీ, షార్ప్ లుక్‌తో ఆకట్టుకుంటుంది. బైక్‌కు పెద్ద, షార్ప్ ట్యాంక్ కవర్‌లు, ఆకర్షణీయమైన ఫ్రంట్ ఎండ్ ఉన్నాయి. దీని డిజైన్‌లో చాలా లైన్లు, ఫోల్డ్స్ ఉన్నాయి. ఇవి బైక్‌కు అగ్రెసివ్ లుక్‌ ఇస్తాయి.

హీరో గ్లామర్ ఎక్స్ 125లో అప్‌డేట్ చేసిన 125సీసీ, సింగిల్-సిలిండర్ ఇంజిన్‌ను ఉపయోగించారు. ఇది 8,250 ఆర్‌పిఎం వద్ద 11.4 బీహెచ్‌పి పవర్, 6,000 ఆర్‌పిఎం వద్ద 10.5 ఎన్ఎమ్ టార్క్‌ను ఉత్పత్తి చేస్తుంది. ఇది హీరో ఎక్స్‌ట్రీమ్ 125ఆర్ బైక్ ఇంజిన్ పర్ఫామెన్స్‎కు దగ్గరగా ఉంటుంది. ఈ ఇంజిన్ 5-స్పీడ్ గేర్‌బాక్స్‌తో వస్తుంది.

వేరియంట్లు, కలర్స్ : గ్లామర్ ఎక్స్ 125 రెండు వేరియంట్లలో అందుబాటులో ఉంది. డ్రమ్, డిస్క్. ఈ బైక్ మొత్తం ఐదు రంగులలో లభిస్తుంది. డ్రమ్ వేరియంట్ మ్యాట్ మాగ్నెటిక్ సిల్వర్, క్యాండీ బ్లేజింగ్ రెడ్ రంగులలో లభిస్తుంది. డిస్క్ వేరియంట్ మెటాలిక్ నెక్సస్ బ్లూ, బ్లాక్ టీల్ బ్లూ, బ్లాక్ పెర్ల్ రెడ్ పెయింట్ స్కీమ్స్‌లో అందుబాటులో ఉంది.

దేశవ్యాప్తంగా ఉన్న అన్ని హీరో డీలర్‌షిప్‌లలో, కంపెనీ అధికారిక వెబ్‌సైట్‌లో బుకింగ్‌లు ప్రారంభమయ్యాయి. బైక్‌ల డెలివరీలు కూడా త్వరలోనే మొదలవుతాయి.