ఫుల్ ఛార్జ్‌పై 100 కి.మీ రేంజ్.. రూ.60,000 కే ఎలక్ట్రిక్ స్కూటర్.. రోజూ ఆఫీసుకు వెళ్లే వాళ్లకు బెస్ట్ ఆప్షన్

Published: Tuesday, November 11, 2025, 7:20 [IST]

భారతదేశంలో ఎలక్ట్రిక్ స్కూటర్ల (EVs) మార్కెట్ ఇప్పుడు స్టార్టప్ బ్రాండ్ల నుంచి పెద్ద తయారీదారుల చేతుల్లోకి మళ్లింది. బజాజ్, టీవీఎస్, హీరో మోటోకార్ప్ (Hero MotoCorp) వంటి దిగ్గజాలు తమ ఉత్పత్తులతో మార్కెట్‌లో బలమైన పోటీని ఇస్తున్నాయి.

దేశంలోనే అతిపెద్ద టూ వీలర్ తయారీ సంస్థ అయిన హీరో, సామాన్య ప్రజల కోసం తక్కువ ధరలో ఈవీలను అందించడంలో ముందంజలో ఉంది. తాజాగా, హీరో మోటోకార్ప్ ఈవీ సెగ్మెంట్ విడా(Vida), తమ VX2 గో (VX2 Go) సిరీస్‌లో కొత్త 3.4 kWh మోడల్‌ను విడుదల చేసింది. ఈ స్కూటర్ బ్యాటరీ-యాజ్-ఎ-సర్వీస్ (BaaS) పథకంలో కేవలం రూ.60,000 కే లభిస్తుంది.

Hero Vida Launches New VX2 Go 3 4 kWh E-Scooter Offers 100 Km Real-World Range

హీరో మోటోకార్ప్ ఎలక్ట్రిక్ టూ వీలర్ సెగ్మెంట్ విడా, తమ VX2 ఈ-స్కూటర్ శ్రేణిలోకి మీడియం రేంజ్ వేరియంట్‌గా VX2 గో 3.4 kWh మోడల్‌ను విడుదల చేసింది. కేంద్ర రోడ్డు రవాణా, రహదారుల మంత్రి నితిన్ గడ్కరీ ఈ ఈవీని దేశానికి అంకితం చేశారు. ఈ కొత్త వేరియంట్ ఎక్స్-షోరూమ్ ధర రూ.1,02,000 (సబ్సిడీలు, రాష్ట్ర ప్రయోజనాలు మినహాయించి) గా ఉంది.

ఈ కొత్త 3.4 kWh వేరియంట్ మెరుగైన పనితీరును, ఎక్కువ రేంజ్‌ను ఇస్తుంది. కంపెనీ అంచనాల ప్రకారం ఇది ఫుల్ ఛార్జ్‌పై 100 కిలోమీటర్ల వరకు రియల్-వరల్డ్ రేంజ్‌ను అందిస్తుంది. VX2 గో 3.4 kWh వేరియంట్ గరిష్టంగా 70 కిలోమీటర్ల వేగాన్ని అందుకోగలదు. ఈ స్కూటర్ శక్తివంతమైన ఇంజన్, సౌకర్యవంతమైన డ్రైవింగ్ కోసం రెండు రైడింగ్ మోడ్‌లను కలిగి ఉంది.

ఇందులో డ్యుయల్ రిమూవబుల్ బ్యాటరీ ప్యాక్‌ను అమర్చారు. మోటార్ 6 kW పీక్ పవర్ అవుట్‌పుట్, 26 Nm టార్క్‌ను ఉత్పత్తి చేస్తుంది. ఈ ఎలక్ట్రిక్ స్కూటర్‌లో ఎకో (Eco), రైడ్ (Ride) అనే రెండు రైడింగ్ మోడ్‌లు ఉన్నాయి. రైడింగ్ పరిస్థితులను బట్టి పనితీరు, ప్రతిస్పందనను మెరుగుపరచడానికి ఈ మోడ్‌లు సహాయపడతాయి. VX2 గో 3.4 kWh వేరియంట్ కాంపాక్ట్, ప్రాక్టికల్ డిజైన్‌ను కొనసాగిస్తుంది.

ఇందులో ఫ్లాట్ ఫ్లోర్‌బోర్డ్, పెద్ద సీటు, 27.2 లీటర్ల అండర్-సీట్ స్టోరేజ్ వంటి సౌకర్యాలు ఉన్నాయి. భారతీయ రోడ్ల పరిస్థితులకు అనుగుణంగా సస్పెన్షన్ వ్యవస్థను రూపొందించినట్లు కంపెనీ పేర్కొంది. రైడ్ సమాచారాన్ని అందించే ప్రాథమిక డిజిటల్ ఇన్‌స్ట్రుమెంట్ క్లస్టర్ ను అమర్చారు. బ్రేకింగ్ కోసం ముందు, వెనుక భాగాలలో కంబైన్డ్ బ్రేకింగ్ సిస్టమ్ (CBS) ఫీచర్‌తో కూడిన డ్రమ్ బ్రేక్‌లను ఉపయోగించారు.

హీరో మోటోకార్ప్ బ్యాటరీ-యాజ్-ఎ-సర్వీస్(BaaS) పథకం ద్వారా ఈ కొత్త VX2 గో 3.4 kWh వేరియంట్‌ను వినియోగదారులు చాలా తక్కువ ధరకే కొనుగోలు చేయవచ్చు. ఈ పథకంలో ఎలక్ట్రిక్ స్కూటర్ ఎక్స్-షోరూమ్ ధర కేవలం రూ.60,000 మాత్రమే. బ్యాటరీ సబ్‌స్క్రిప్షన్ కింద ప్రయాణించే ప్రతి కిలోమీటరుకు 90 పైసలు మాత్రమే ఖర్చు అవుతుంది.

ఈ పథకం వల్ల స్కూటర్ కొనుగోలు ఖర్చు గణనీయంగా తగ్గుతుంది. బ్యాటరీ అద్దెకు తీసుకున్నందున, వినియోగదారులు అధిక బ్యాటరీ రీప్లేస్‌మెంట్ ఖర్చుల గురించి ఆందోళన చెందాల్సిన అవసరం ఉండదు.