హీరో నుంచి మరో సంచలన ఎలక్ట్రిక్ బైక్.. EICMA 2025లో మెగా సర్‌ప్రైజ్

భారతదేశంలోని ప్రముఖ ద్విచక్ర వాహన తయారీ సంస్థ హీరో మోటోకార్ప్ (Hero Motocorp), తన ఎలక్ట్రిక్ వాహన విభాగం విడా (VIDA)ను మరింత బలోపేతం చేయడానికి ఒక కొత్త అధ్యాయాన్ని ప్రారంభించబోతోంది. ఇప్పటివరకు స్కూటర్లపై దృష్టి పెట్టిన హీరో, ఇప్పుడు పూర్తిస్థాయి ఎలక్ట్రిక్ మోటార్‌సైకిల్‌ను మార్కెట్లోకి తీసుకురావడానికి సన్నాహాలు చేస్తోంది. ఈ రాబోయే మోడల్‌ను ప్రపంచవ్యాప్తంగా ఎంతో ప్రతిష్ఠాత్మకమైన ఆటో షో EICMA 2025 (మిలన్)లో తొలిసారిగా ప్రజలకు పరిచయం చేయనున్నారు. ఈ మోటార్‌సైకిల్‌ను హీరో ప్రాజెక్ట్ VXZ పేరుతో అభివృద్ధి చేస్తోంది. గతంలో కంపెనీ ఉబెక్స్ (UBEX) అనే కాన్సెప్ట్‌కు సంబంధించిన టీజర్ ఇమేజ్‌ను విడుదల చేసింది, అయితే ఆ ప్రాజెక్ట్ గురించి తర్వాత ఎలాంటి సమాచారం రాలేదు.

ఆసక్తికరంగా, ఆ టీజర్ ఇప్పుడు అధికారికంగా తొలగించబడింది. దాని స్థానంలో హీరో, ప్రాజెక్ట్ VXZ అనే కొత్త టీజర్‌ను విడుదల చేయడం ద్వారా కొత్త మోడల్‌పై ఊహాగానాలకు తెరలేపింది. ఇప్పటివరకు విడుదలైన టీజర్ చిత్రాలు వాహనం యొక్క పూర్తి డిజైన్‌ను చూపించకపోయినా, కొన్ని కీలక అంశాలు మాత్రం స్పష్టంగా కనిపిస్తున్నాయి. పదునైన హెడ్‌లైట్ హౌసింగ్, ఆకర్షణీయమైన టెయిల్ సెక్షన్ ఉంటాయి.

అలాగే స్టీపర్ స్ప్లిట్ సీటు డిజైన్ ఈ మోటార్‌సైకిల్ స్పోర్టీ లుక్‌ను ప్రతిబింబిస్తున్నాయి. వెనుక భాగంలో ఉన్న గ్రాబ్ రైల్స్, రైడర్, పిలియన్ సౌకర్యానికి తోడ్పడతాయి. అదనంగా, టీజర్‌లో కనిపించిన ప్రొజెక్టర్ హెడ్‌లైట్‌లు, విడా సిగ్నేచర్ LED DRL డిజైన్, ఈ బైక్‌ను విజువల్‌గా మరింత ప్రత్యేకంగా చూపిస్తున్నాయి. దీని లైటింగ్ సెటప్ ఆధునికంగా ఉండడం వల్ల రాత్రి ప్రయాణాలకు ఇది సురక్షితమైనదిగా, స్టైలిష్‌గా ఉండనుందని అంచనా.

హీరో విడా VXZ గురించి ఇంకా సాంకేతిక వివరాలు వెల్లడించనప్పటికీ, పరిశ్రమ వర్గాలు అధిక సామర్థ్య గల మిడ్-రేంజ్ ఎలక్ట్రిక్ బైక్‌గా ఉండే అవకాశముందని భావిస్తున్నాయి. ఇది నగర ప్రయాణాలు మాత్రమే కాకుండా, హైవే రైడింగ్‌కు కూడా అనుకూలంగా ఉండవచ్చు. మొత్తం మీద, విడా VXZ హీరో ఎలక్ట్రిక్ ప్రయాణంలో కొత్త దశను సూచిస్తోంది. ఇప్పటివరకు స్కూటర్లకు పరిమితమైన విడా పోర్ట్‌ఫోలియో, ఈ కొత్త మోటార్‌సైకిల్‌తో మరింత విస్తృతం కానుంది.

రేపటి నుంచి ప్రారంభమయ్యే EICMA 2025 ఆటో ఎక్స్‌పోలో హీరో మోటోకార్ప్ తన తాజా ఆవిష్కరణను ప్రపంచానికి పరిచయం చేయడానికి సిద్ధంగా ఉంది. ఈ మోటార్‌సైకిల్‌కు సంబంధించిన ఖచ్చితమైన ఫీచర్ల జాబితా ఆవిష్కరణ సమయంలోనే వెల్లడవుతుందని హీరో తెలిపింది. అయితే పరిశ్రమ వర్గాలు చెబుతున్న వివరాల ప్రకారం, ఈ మోడల్‌లో అత్యాధునిక TFT ఇన్స్ట్రుమెంట్ క్లస్టర్ లభించే అవకాశం ఉంది.

ఈ డిస్‌ప్లే రైడర్‌కు కేవలం వేగం, రేంజ్ సమాచారం మాత్రమే కాకుండా, రైడ్ మోడ్‌లు, టర్న్-బై-టర్న్ నావిగేషన్, అలాగే కనెక్టెడ్ టెక్నాలజీ ఫీచర్లు వంటి ఆధునిక సదుపాయాలను అందించే అవకాశం ఉంది. ఇంకా ఒక ఆసక్తికరమైన అంశం ఏమిటంటే, విడా VXZ బెల్ట్ డ్రైవ్ సిస్టమ్‌ను ఉపయోగించేలా కనిపిస్తోంది. సాధారణ చైన్ డ్రైవ్‌తో పోలిస్తే, బెల్ట్ డ్రైవ్ సిస్టమ్ శబ్దం తక్కువగా ఉంటుంది.

దీని నిర్వహణ ఖర్చు తక్కువగా ఉండటం వంటి ప్రయోజనాలను కలిగి ఉంటుంది. ఇది స్మూత్, సైలెంట్ రైడింగ్ అనుభవాన్ని అందిస్తుంది. అలాగే, ఈ బైక్‌లో మిడ్-మౌంటెడ్ ఎలక్ట్రిక్ మోటార్ అమర్చబడిందని టీజర్ ద్వారా స్పష్టమవుతోంది. దీని కింద భాగంలో ఉండే తక్కువ-స్లంగ్ బ్యాటరీ ప్యాక్ వాహనం సెంటర్ ఆఫ్ గ్రావిటీని తగ్గించి, స్థిరమైన రైడింగ్ అనుభవాన్ని అందిస్తుంది. దీంతో బైక్ బ్యాలెన్స్ మెరుగుపడటమే కాకుండా, హ్యాండ్లింగ్ కూడా సులభంగా ఉంటుంది.