66 కి.మీ మైలేజ్.. హీరో బైక్ కొత్త వేరియంట్ లాంచ్.. ధర కూడా చాలా తక్కువ.. ఆఫీసుకు వెళ్లే వారికి బెస్ట్

హీరో మోటోకార్ప్ తన 125సీసీ విభాగంలో మరోసారి తన ఆధిపత్యాన్ని చూపిస్తూ, కొత్తగా హీరో ఎక్స్‌ట్రీమ్ 125R (Hero Xtreme 125r) డ్యూయల్ ఛానల్ ABS వేరియంట్‌ను విడుదల చేసింది. ఇప్పటికే ఉన్న ఎక్స్‌ట్రీమ్ 125R తన స్టైలిష్ డిజైన్, మైలేజ్, పనితీరుతో యువతలో మంచి పేరు తెచ్చుకుంది. ఇప్పుడు ఈ కొత్త వేరియంట్‌తో, కంపెనీ సేఫ్టీ ఫీచర్లలో కూడా పెద్ద అప్‌డేట్ తీసుకొచ్చింది. ఈ వేరియంట్‌లో ప్రధాన ఆకర్షణ డ్యూయల్ ఛానల్ ABS (యాంటీ-లాక్ బ్రేకింగ్ సిస్టమ్). సాధారణంగా, ఈ ఫీచర్ ఎక్కువగా 200సీసీ లేదా అంతకంటే ఉన్నత స్థాయి బైక్‌లలోనే లభిస్తుంది. కానీ హీరో ఈ ఫీచర్‌ను 125సీసీ కేటగిరీకి తీసుకురావడం వలన ఇది పెద్ద మార్పుగా భావించబడుతోంది.

ఇది రైడర్‌కి సడన్ బ్రేకింగ్ సమయంలో స్కిడ్ అవకుండా, రోడ్డుపై పూర్తి నియంత్రణను కలిగిస్తుంది. ఫలితంగా సిటీ ట్రాఫిక్‌లోనూ, హైవే రైడ్‌లోనూ గరిష్ట రక్షణ లభిస్తుంది. ధర పరంగా చూస్తే, కొత్త ఎక్స్‌ట్రీమ్ 125R డ్యూయల్ ఛానల్ ABS వేరియంట్ రూ. 1.04 లక్షల ఎక్స్-షోరూమ్ ధరలో లభిస్తుంది. ఈ ఫీచర్లు, సేఫ్టీ, లుక్‌కి ఇది చాలా సరసమైన ధర అని చెప్పాలి. డిజైన్ పరంగా కొన్ని మెరుగులు చేర్చబడ్డాయి.

ఫ్యూయల్ ట్యాంక్, బాడీ గ్రాఫిక్స్‌లో చిన్న మార్పులు చేయడం ద్వారా బైక్ స్టైలిష్‌గా కనిపిస్తుంది. లైట్ సెటప్ పరంగా, బైక్ పూర్తిగా LED ప్రొజెక్టర్ హెడ్‌ల్యాంప్, LED టెయిల్ ల్యాంప్, స్పోర్టీ లుక్ ఇచ్చే స్ప్లిట్ సీట్ సెటప్‌తో వస్తుంది. ఈ సీట్లు కంఫర్ట్, స్టైల్ రెండింటినీ సమపాళ్లలో కలిపి ఉంటాయి. ఇది బ్లాక్ పెర్ల్ రెడ్, మ్యాట్ షాడో గ్రే, లీఫ్ గ్రీన్ కలర్ ఆప్షన్‌లలో అందుబాటులో ఉంది.

కొత్త హీరో ఎక్స్‌ట్రీమ్ 125R డ్యూయల్ ఛానల్ ABS సేఫ్టీ ఫీచర్లతోనే కాదు, తన శక్తివంతమైన ఇంజిన్ పనితీరుతో కూడా బైక్ ప్రేమికులను ఆకట్టుకుంటుంది. ఈ మోటార్‌సైకిల్‌లో ఉన్న 124.7cc ఎయిర్-కూల్డ్, 4-స్ట్రోక్, సింగిల్-సిలిండర్ పెట్రోల్ ఇంజిన్ తన తరగతిలో అత్యుత్తమమైన పవర్ అవుట్‌పుట్‌ను అందిస్తుంది. ఈ ఇంజిన్ 8250 rpm వద్ద 11.4 PS హార్స్‌పవర్, 6500 rpm వద్ద 10.5 Nm పీక్ టార్క్ ఉత్పత్తి చేస్తుంది.

ఇది పట్టణ రైడింగ్‌కి సరిపోయే మృదువైన పనితీరు, వేగవంతమైన స్పందన రెండింటినీ అందిస్తుంది. దీని 5-స్పీడ్ గేర్‌బాక్స్ గేర్ షిఫ్ట్‌లను మరింత సులభంగా, స్మూత్‌గా చేస్తుంది. సిటీ డ్రైవింగ్‌లో గాని, ఓపెన్ రోడ్‌పై గాని, ఈ బైక్ రైడర్‌కి నిరంతర ఉత్సాహాన్ని కలిగిస్తుంది. పనితీరుతో పాటు, ఇది ఇంధన సామర్థ్యంలోనూ తన తరగతిలో ముందంజలో ఉంది. కొత్త ఎక్స్‌ట్రీమ్ 125R లీటర్‌కు 66 కి.మీ. వరకు మైలేజీని అందిస్తుంది.

మైలేజ్ ప్రధానంగా రోజువారి ప్రయాణాలు చేసే వారికి ఖర్చులను చాలా వరకు తగ్గించడానికి ఉపయోగపడుతుంది. దీని 10 లీటర్ల ఇంధన ట్యాంక్ సామర్థ్యంతో మీరు తరచూ ఫ్యూయల్ స్టేషన్లను వెతకాల్సిన అవసరం ఉండదు. ఈ బైక్ గరిష్టంగా గంటకు 95 కి.మీ. వేగం అందుకోగలదు. కేవలం 6.3 సెకన్లలో 0 నుండి 60 కి.మీ./గంట వేగాన్ని చేరుతుంది. స్పోర్టీ పర్ఫార్మెన్స్‌ని ఆస్వాదించాలనుకునే యువ రైడర్లకు ఇది సరైన ఎంపిక.

ఇది సాంకేతిక ఫీచర్లతో కూడిన స్మార్ట్ బైక్‌గా కూడా నిలుస్తోంది. 4.2-అంగుళాల కలర్ LCD ఇన్స్ట్రుమెంట్ కన్సోల్, ద్వారా రైడర్ స్పీడ్, గేర్ పొజిషన్, ట్రిప్ వివరాలు, ఫ్యూయల్ లెవెల్, టైమ్ వంటి కీలక సమాచారం అందించబడుతుంది. దీని స్మార్ట్‌ఫోన్ కనెక్టివిటీ ఫీచర్ ద్వారా బైక్, ఫోన్ మధ్య సులభమైన కమ్యూనికేషన్ సాధ్యమవుతుంది. ఐడిల్ స్టార్ట్-స్టాప్ టెక్నాలజీ (i3S) ఫీచర్ వంటివి కూడా దీనిలో ఉన్నాయి.