ఈ స్కూటర్ కొంటే 10 ఏళ్ల పాటు ఎలాంటి టెన్షన్ ఉండదు.. ఇండియాలో అందరి ఫేవరెట్

హోండా యాక్టివా (Honda Activa) పేరే వినిపిస్తే, భారత్‌లో స్కూటర్‌ల ప్రపంచంలో ఒక రాజు రూపం కళ్ల ముందుకొస్తుంది. ఎందుకంటే ఈ స్కూటర్‌ కేవలం ఒక వాహనం మాత్రమే కాదు, మిలియన్ల మంది నమ్మకాన్ని గెలుచుకున్న కుటుంబ సభ్యంలా మారిపోయింది. దాదాపు రెండు దశాబ్దాలకు పైగా యాక్టివా మార్కెట్‌లో ఉన్నా, ప్రతీ కొత్త మోడల్ వచ్చినప్పుడు కూడా అదే క్రేజ్, అదే డిమాండ్ కనిపించడం దీని గ్రేట్‌నెస్‌కు నిదర్శనం. యాక్టివాను నంబర్ 1 స్కూటర్‌గా పిలిచే కారణాలు ఒక్కటి రెండు కావు. దాని డిజైన్ చూడగానే సింపుల్‌గా, క్లీన్‌గా, అందరికీ నచ్చేలా ఉంటుంది. చిన్న పిల్లల నుంచి పెద్దవారివరకు ఎవరి చేతుల్లోనైనా యాక్టివా బాగా సెట్ అవుతుంది. ఈ స్కూటర్‌కు సంబంధించి గత నెల అమ్మకాలను ఒకసారి చూద్దాం.

అక్టోబర్ నెల హోండా యాక్టివాకు నిజమైన పండుగ నెలగా మారిపోయింది. ఒక్క నెలలోనే యాక్టివా విక్రయాలు గణాంకాలను కొత్తస్థాయికి తీసుకెళ్లాయి. ఈ అక్టోబర్‌లో మొత్తం 3,26,551 యూనిట్లు కొనుగోలుదారుల చేతికి చేరడం ఒక రికార్డు. గత సంవత్సరం ఇదే కాలంలో అమ్ముడైన 2,66,806 యూనిట్లతో పోల్చితే, ఈ సారి అమ్మకాలు భారీగా పెరిగాయి. గణాంకాలను పరిశీలిస్తే, 22.39% భారీ గ్రోత్ యాక్టివా సాధించింది.

ఈ పెరుగుదల వెనుక కారణాలు ఉన్నాయి. సెప్టెంబర్ 22 నుండి అమల్లోకి వచ్చిన GST సవరణ హోండా యాక్టివా ధరను తగ్గించింది. ధర తగ్గగానే, మార్కెట్‌లో డిమాండ్ సహజంగానే పెరిగింది. ఇక దీపావళి పండుగ సీజన్‌లో కుటుంబాలు కొత్త వాహనాలు కొనాలనే ఉత్సాహంతో ఉండటం వల్ల యాక్టివా డీలర్‌షిప్‌ల వద్ద రద్దీ మరింత పెరిగింది. ఈ రెండు అంశాలు కలిసి అక్టోబర్ నెలలో యాక్టివా అమ్మకాలను కొత్త గరిష్టానికి తీసుకెళ్లాయి.

నమ్మకమైన ఇంజిన్, తక్కువ మెయింటెనెన్స్, మంచి మైలేజ్.. ఇవి యాక్టివాను ఎప్పుడూ డిమాండ్‌లో ఉంచుతూనే ఉంటాయి. కానీ ఈసారి ప్రభుత్వం చేసిన పన్ను సవరణలు, పండుగ సీజన్ బూస్ట్ కలిసి అమ్మకాలను విపరీతంగా ముందుకు నెట్టాయి. ఇలా చూస్తే యాక్టివా ఎందుకు భారతదేశంలో నంబర్ వన్ స్కూటర్‌గా నిలుస్తుందో మరోసారి రుజువైంది. ఇది యాక్టివా 110, యాక్టివా 125 అనే రెండు వేరియంట్లలో లభిస్తుంది.

హోండా యాక్టివా 110 ధర విషయంలో కూడా అందరికీ అందుబాటులో ఉండేలా రూపొందించబడింది. మార్కెట్‌లో ఇది రూ. 83,918 నుండి రూ. 96,938 (ఎక్స్-షోరూమ్) ధర పరిధిలో లభిస్తుంది. ఈ ధరకు లభించే ఫీచర్లు, రీలయబిలిటీ, పెర్ఫార్మెన్స్‌ను చూస్తే, ఈ స్కూటర్ ఎందుకు ఇంత ప్రాచుర్యం సాధించిందో అర్థమవుతుంది. ఇది 109.51cc ఎయిర్-కూల్డ్ సింగిల్-సిలిండర్ ఇంజిన్ రోజువారీ ప్రయాణాలకు సరిపోతుంది. ఇది సుమారు 55 kmpl వరకు మైలేజ్ ఇస్తుంది.

హోండా యాక్టివా 125, యాక్టివా కుటుంబంలో మరింత శక్తివంతమైన, మరింత ప్రీమియమ్ ఫీల్ ఇచ్చే స్కూటర్‌గా నిలుస్తుంది. దీని ధర రూ. 86,085 నుండి రూ. 95,744 (ఎక్స్-షోరూమ్) వరకు ఉండడం వల్ల, 110cc స్కూటర్ కంటే కొంచెం ఎక్కువ పనితీరు కోరుకునే వారికి ఇది సరైన ఎంపికగా మారింది. ఈ స్కూటర్‌లోని 123.92cc పెట్రోల్ ఇంజిన్ పవర్, స్మూత్‌నెస్ రెండింటినీ సమతుల్యం చేస్తుంది.

రోజువారీ కమ్యూటింగ్ అయినా, కొంచెం దూర ప్రయాణం అయినా, ఈ ఇంజిన్ స్పందన చాలా బాగుంటుంది. మైలేజ్ విషయంలో ఇది సుమారు 47 kmpl అందించడం మంచి బ్యాలెన్స్. దీని టాప్ స్పీడ్ 90 kmph, అలాగే 0 నుండి 60 kmph కి కేవలం 10 సెకన్లలో చేరడం దీని పెర్ఫార్మెన్స్‌ను స్పష్టంగా చూపిస్తుంది. ఇంధన ట్యాంక్ సామర్థ్యం 5.3 లీటర్లు.