యాక్టివా ఎలక్ట్రిక్ స్కూటర్‌ను కొనడానికి ఆసక్తి చూపించని జనాలు.. దీనికి అసలు కారణం ఏమిటి?

ఇండియాలో ప్రసిద్ధ టూవీలర్ తయారీదారు అయినటువంటి హోండా స్కూటర్ & మోటార్ సైకిల్ యాక్టివా వంటి స్కూటర్‌తో దేశవ్యాప్తంగా ఎంతో గొప్ప పేరు సంపాదించుకుంది. ఇది దేశంలోనే నెం.1 స్కూటర్. దీంతో దీనికి కొనసాగింపుగా ఈవీ మార్కెట్‌ను సైతం కైవసం చేసుకోవడానికి ఈ ఏడాది జనవరిలో రెండు కొత్త ఎలక్ట్రిక్ మోడళ్లను QC1, యాక్టివా E ప్రవేశపెట్టింది. విభిన్నంగా ఆకర్షణీయమైన డిజైన్, ఆధునిక సాంకేతికతతో పాటు సౌకర్యవంతమైన ధరలతో ఇవి మార్కెట్‌లోకి అడుగుపెట్టాయి. మొదటిగా, వినియోగదారుల నుండి కొంత ఆసక్తికరమైన స్పందన లభించినప్పటికీ, వీటికి సంబంధించిన అమ్మకాలు నెలలకొద్దీ క్రమంగా తగ్గుముఖం పట్టాయి.

గత మే నెలలో(2025), ఈ పరిస్థితి మరింత స్పష్టమయ్యింది. ఈ నెలలో హోండా యాక్టివా E ఒక్క యూనిట్ కూడా అమ్ముడుపోలేదు. ఆ మోడల్‌పై వినియోగదారుల ఆసక్తి చాలా తక్కువగా ఉందని చూపిస్తోంది. మరోవైపు, అదే కాలంలో హోండా QC1 ఎలక్ట్రిక్ స్కూటర్‌కు కొంతమేర ఆశజనకంగా కనిపించింది. ఈ మోడల్ 676 యూనిట్లను విక్రయించింది. దీనిని రష్‌లైన్ నివేదించింది. డేటా ప్రకారం, QC1 మాత్రం కొంత స్థిరమైన డిమాండ్‌ను కొనసాగిస్తోంది.

హోండా యాక్టివా E, QC1 స్కూటర్ల అమ్మకాలు తగ్గిపోవడానికి పలు కారణాలు ఉన్నట్టు పరిశీలనలో వెల్లడైంది. ప్రధానంగా, ఈ రెండు మోడళ్లు కూడా మార్కెట్లో ఇప్పటికే ఉన్న ఇతర ఎలక్ట్రిక్ స్కూటర్లతో సమాన ధర పరిధిలోనే లభిస్తున్నాయి. అయితే, ధర ఒక్కటే కాకుండా, పోటీదారులు అందిస్తున్న లేటెస్ట్ సాంకేతికత, ఎక్కువ రేంజ్, సౌకర్యవంతమైన ఫీచర్లు కస్టమర్లను ఆ స్కూటర్ల వైపు మరింత ఆకర్షిస్తున్నాయి.

ఇంకా ఒక కీలక కారణం, హోండా ఈ ఇ-స్కూటర్లను విస్తృత స్థాయిలో ప్రచారం చేయడంలో విఫలమైంది. సరైన మార్కెటింగ్ లేకుండా, కస్టమర్లలో అవగాహన తక్కువగానే ఉంది. అందువల్ల, పెద్ద ఎత్తున డిమాండ్ రాకుండా పోయింది. యాక్టివా E విషయంలో మరొక ప్రత్యేక పరిమితి ఉంది. దీని బ్యాటరీ ప్యాక్‌ను మార్చుకునే విధంగా రూపొందించడం ఈజీ అయినా, అదే సమయంలో అందుబాటులో ఉండే చార్జింగ్, సర్వీస్ సౌకర్యాలు ఇంకా పరిమితంగానే ఉన్నాయి.

అంతేకాక, ఈ మోడల్ చాలా ప్రధాన నగరాల్లో కూడా లభించకపోవడం పెద్ద సమస్య అయింది. ఇప్పటివరకు ఇది కేవలం బెంగళూరు, న్యూఢిల్లీ, వంటి కొన్ని మాత్రమే ప్రధాన కేంద్రాల్లోనే కొనుగోలుకు అందుబాటులో ఉంది. వీటితో పాటు, QC1 స్కూటర్ కొంత స్థాయిలో అమ్మకాలు సాధించినప్పటికీ, యాక్టివా E అంతగా వినియోగదారుల విశ్వాసం సంపాదించలేకపోవడం స్పష్టమవుతోంది. అన్ని కారణాలను కలిపి చూస్తే, ఇవన్నీ అమ్మకాలపై తీవ్ర ప్రభావం చూపినట్లు స్పష్టంగా అర్థమవుతోంది.

హోండా యాక్టివా E ఎలక్ట్రిక్ స్కూటర్ విషయానికి వస్తే, దీని ధర సుమారు రూ.1.17 లక్షల నుంచి రూ.1.52 లక్షల (ఎక్స్-షోరూమ్) వరకు ఉంటుంది. దీన్ని ప్రత్యేకంగా బ్యాటరీ-యాజ్-ఎ-సర్వీస్ పథకం కింద అందిస్తున్నారు. అంటే, మీరు స్కూటర్‌ను కొనుగోలు చేసిన తర్వాత కూడా బ్యాటరీని సొంతంగా కాకుండా చార్జ్ చేసి మారుస్తూ ఉపయోగించుకోవచ్చు.

ఈ స్కూటర్‌లో 1.5 కిలోవాట్ గంట (kWh) సామర్థ్యం గల రెండు విడత బ్యాటరీ ప్యాక్‌లు ఉంటాయి. పూర్తిగా ఛార్జ్ చేస్తే ఇది సుమారు 102 కిలోమీటర్ల పరిధి (రేంజ్) అందిస్తుంది. దీని వల్ల, మధ్యలో చార్జింగ్ కోసం ఎక్కువసేపు ఆగాల్సిన అవసరం లేకుండా, హోండా ఏర్పాటు చేసిన ఇ:స్వాప్ స్టేషన్ల వద్ద మీ ఖాళీ బ్యాటరీను అక్కడ ఉంచి పూర్తిగా ఛార్జ్ చేసిన మరో బ్యాటరీని స్కూటర్‌లో పెట్టుకోవచ్చు.

హోండా QC1 ఎలక్ట్రిక్ స్కూటర్ ధర సుమారు రూ.90,000 (ఎక్స్-షోరూమ్) కాబట్టి, యాక్టివా E తో పోలిస్తే కొంచెం తక్కువే అని చెప్పవచ్చు. ఇది 1.5 కిలోవాట్ గంట (kWh) సామర్థ్యం గల బ్యాటరీ ప్యాక్‌తో పనిచేస్తుంది. పూర్తిగా ఛార్జ్ చేసినప్పుడు సుమారు 80 కిలోమీటర్ల రేంజ్ ఇస్తుంది. అంటే, రోజువారీ చిన్నదైన దూరాల ప్రయాణాలకు తగినంత రేంజ్ అందుతుంది. టాప్ స్పీడ్ గంటకు 50 కి.మీల వరకు ఉంటుంది.