జనాలు ఈవీ టూవీలర్స్‌ను తెగ కొంటున్నారు.. జనవరి నుంచి జూలై వరకు టాప్ 5 కంపెనీల హోరాహోరీ పోటీ

భారతదేశంలో ఎలక్ట్రిక్ టూవీలర్ మార్కెట్ ఇటీవలి కాలంలో వేగంగా పెరుగుతోంది. పెరుగుతున్న పెట్రోల్ ధరలు, పర్యావరణంపై అవగాహన, ప్రభుత్వ ప్రోత్సాహకాలు వృద్ధికి ప్రధాన కారణాలు. పట్టణ ప్రాంతాల్లో ట్రాఫిక్ పరిస్థితులు, చిన్న దూర ప్రయాణాలకు తక్కువ ఖర్చుతో, సైలెంట్‌గా, తక్కువ నిర్వహణతో ఉపయోగపడే ఈ-స్కూటర్లు, ఈ-బైక్‌లు ప్రజల్లో విపరీతమైన ఆదరణ పొందుతున్నాయి. ఓలా, ఏథర్, టీవీఎస్, హీరో ఎలక్ట్రిక్ వంటి బ్రాండ్‌లు కొత్త మోడళ్లు, అధిక రేంజ్, ఆధునిక ఫీచర్లతో వినియోగదారులను ఆకర్షిస్తున్నాయి. గ్రామీణ మార్కెట్‌లో కూడా ఇప్పుడు నెమ్మదిగా వీటికి డిమాండ్ పెరుగుతోంది, ముఖ్యంగా రోజువారీ ఖర్చులు తగ్గించుకోవాలనుకునే వారికి ఇవి మంచి ప్రత్యామ్నాయం అవుతున్నాయి. 2025 సంవత్సరానికి అమ్మకాల గణాంకాలు విడుదలయ్యాయి. ఆ వివరాలను ఈ కింది కథనంలో చూద్దాం.

2025 జనవరి నుంచి జూలై వరకు భారత ఎలక్ట్రిక్ టూవీలర్ మార్కెట్‌లో టీవీఎస్ మోటార్ కంపెనీ అగ్రస్థానాన్ని దక్కించుకుంది. ఈ ఏడాది మొదటి ఏడు నెలల్లో టీవీఎస్(Tvs) మొత్తం 1,66,204 యూనిట్లు విక్రయించగా, గత ఏడాది ఇదే కాలంలో అమ్మిన 1,09,952 యూనిట్లతో పోలిస్తే ఇది 51 శాతం వృద్ధి. ఈ పెరుగుదల, కంపెనీ కొత్త మోడళ్లు, మెరుగైన రేంజ్, విశ్వసనీయత, పెరుగుతున్న డిమాండ్‌ను స్పష్టంగా చూపిస్తుంది.

ఇక రెండో స్థానంలో బజాజ్(Bajaj) నిలిచింది. జనవరి నుంచి జూలై వరకు కంపెనీ 1,62,203 యూనిట్లు విక్రయించగా, గత ఏడాది ఇదే కాలంలో విక్రయించిన 84,370 యూనిట్లతో పోలిస్తే అమ్మకాలలో 92 శాతం పెరుగుదల సాధించింది. ఇది బజాజ్ ఎలక్ట్రిక్ టూవీలర్ మార్కెట్‌లో ఎంత వేగంగా విస్తరిస్తోందో సూచిస్తోంది. గత సంవత్సరం వరకు ఈ విభాగంలో అగ్రస్థానాన్ని దక్కించుకున్న ఓలా ఎలక్ట్రిక్‌కు ఈసారి భారీ దెబ్బ తగిలింది.

మార్కెట్ పోటీ, వినియోగదారుల అభిరుచుల్లో మార్పులు, కొత్త బ్రాండ్ల ఆకర్షణీయ ఆఫర్లు కారణంగా కంపెనీ అమ్మకాలు గణనీయంగా తగ్గాయి. 2025 జనవరి నుండి జూలై వరకు ఓలా మొత్తం 1,33,328 యూనిట్లు విక్రయించగా, గత ఏడాది ఇదే కాలంలో విక్రయించిన 2,70,344 యూనిట్లతో పోలిస్తే ఇది చాలా తక్కువ. ఈ గణాంకాలు కంపెనీకి 51 శాతం అమ్మకాల తగ్గుదలను చూపిస్తున్నాయి. అగ్రస్థానంలో నుండి నేరుగా మూడో స్థానానికి జారిపోయింది.

నాల్గవ స్థానంలో ఏథర్ ఎనర్జీ స్థానం దక్కించుకుంది. ప్రీమియం ఎలక్ట్రిక్ స్కూటర్ల విభాగంలో బలమైన బ్రాండ్ ఇమేజ్‌తో ఉన్న ఈ కంపెనీ, 2025 జనవరి నుండి జూలై వరకు మొత్తం 98,014 వాహనాలను విక్రయించింది. గత ఏడాది ఇదే కాలంలో విక్రయించిన 53,258 వాహనాలతో పోలిస్తే, ఈసారి ఏథర్ అమ్మకాలు గణనీయంగా పెరిగాయి. గణాంకాల ప్రకారం, కంపెనీ 84 శాతం వృద్ధి సాధించింది.

ఐదవ స్థానంలో హీరో మోటోకార్ప్ నిలిచింది. 2025 జనవరి నుండి జూలై వరకు మొత్తం 43,891 ఎలక్ట్రిక్ టూవీలర్ వాహనాలను విక్రయించింది. ఇది గత ఏడాది ఇదే కాలంలో విక్రయించిన 18,901 యూనిట్లతో పోలిస్తే చాలా ఎక్కువ. ఈ గణాంకాలు చూస్తే, హీరో మోటోకార్ప్ ఈ విభాగంలో బలంగా దూసుకుపోతున్నట్లు తెలుస్తోంది. కొత్త మోడళ్లు, డీలర్ నెట్‌వర్క్, గ్రామీణ-పట్టణ ప్రాంతాల్లో పెరుగుతున్న డిమాండ్ వలన కంపెనీ అమ్మకాలు గణనీయంగా పెరిగాయి.